Oinarrian oinarrizkoa

Rodrigo Ely funtsezko bihurtu da berriz Alavesen atzeko lerroan, belauneko lesio larria gainditu eta gero. Asier Garitanok hasieratik jarri du lehen hiru lehietan.
Rodrigo Ely, Angel Rodriguez Getafekoarekin lehian.
Rodrigo Ely, Angel Rodriguez Getafekoarekin lehian. SEBASTIAN MARISCAL / EFE Tamaina handiagoan ikusi

Eñaut Agirrebengoa -

2019ko irailak 12

Izan zenera ari da itzultzen Rodrigo Ely (Lajeado, Brasil, 1993). Lesio baten erruz galdutako garrantzia berreskuratu du atzelariak. Fisikoki sasoi betean dago, denboraldi-aurrea inolako arazorik gabe osatu ondotik, eta Asier Garitanok haren alde egin du hasierako hamaikakorako. Guillermo Maripanen irteera eta Victor Laguardia eta Ximo Navarroren arazo fisikoak direla medio, brasildarra finkoa izan da Alavesek orain arte jokatu dituen hiru neurketetan. Lehenik, Maripanekin jokatu zuen; gero, Ruben Duarterekin, eta Getafen, Laguardiarekin. Bada, bikotekidea bata edo bestea izan, oso ondo aritu da.

Defentsakoa da lerrorik garrantzitsuena Alavesen. Izan ere, ahalik eta golik gutxien jasotzean datza, nagusiki, taldearen arrakasta. Ezinbestekoa da atzelariak harkaitza bezain gogorrak izatea, batik bat goitik datozen baloiak urruntzean. Bada, baldintza horiek goitik behera betetzen ditu Elyk. Bermea da aurkariak oldartu eta erdiraketak bata bestearen atzetik egiten hasten direnean, baita jokaldiak sortzeko joko zuzena darabiltenean ere. Defentsa garaia da 1,88 metro da luze, eta indarrez egiten du jauzi; beraz, goitik nekez gaindi diezaiokete. Eta azpitik ere, antzera, fisikoki oso ahaltsua izaki. Horrez gain, baloiarekin ere ez da herrena, nahiz eta Alavesen erdiko atzelariek luze jokatzeko agindua duten.

Ezaugarri horiei esker, funtsezko bihurtu zen Gasteizera iritsi orduko, 2016-2017ko sasoiko bigarren zatian. Milanek utzita etorri zen, eta Mauricio Pellegrinok tokia egin zion hasierako hamaikakoan berandu gabe. Liga amaierako norgehiagoka gehienak jokatu zituen, baita Espainiako Kopako final historikoa ere, alboan Zou Feddal zuela. Marokoarrak taldea utzi zuen udako merkatuan, eta Laguardia luzerako zegoen min hartuta. Hori horrela, brasildarra lau urterako fitxatu zuen Alavesek, hiru milioi euro ingururen truke. Atzelariak taldearen ezina nozitu zuen ligako lehen herenean, Luis Zubeldia eta Gianni De Biasiren esanetara; baina bere itxurarik onena eman zuen gero, Abelardo Fernandez iritsi ondotik. 31 partida jokatu zituen guztira, horietatik 30 titular moduan.

Haatik, haren garapena brastakoan eten zuen belauneko lesio batek. Iazko denboraldi-aurrean hartu zuen min, eta osatze prozesuak uste baino luzeago jo zuen. Martxoaren 30ean itzuli zen. Soilik bost partidatan hartu zuen parte. Ondo finkatuta zeuden Laguardia eta Maripan atzeko lerroan, eta brasildarrak erritmo falta logikoa zeukan. Horrenbestez, itzalpean gelditu zen, berriz ere argitara noiz itzuliko zain. Bada, berehala iritsi zaio aukera, denboraldi berria hasi orduko. Oraingoz, ondo profitatu du abagunea, eta, itxuraz, oinarrian oinarrizko izaten jarraituko du.

Lehia Magallanekin

Edonola ere, hobe du ez lokartu, ate joka ariko baita Lisando Magallan. Atzelari argentinarra izan zen Alavesek udako merkatuan egin zuen azken fitxaketa. Ajaxek utzita iritsi da Gasteizera, defentsen arteko lehia handitzeko. Elyren adinkidea da 25 urte ditu, eta etorkizun oparoa iragartzen diote askok. Adibidez, Ajaxeko kirol arduradunek, haren truke bederatzi milioi euro ordaindu baitzizkioten Boca Juniorsi.

Koska bat beherago, Alberto Rodriguez Tachi ageri da. Kapitaina zen Atletico Madrilen bigarren taldean, baina Diego Pablo Simeoneren deirik jaso ez, eta beste nonbait proba egitea deliberatu zuen. Elitean jokatzea da espainiarraren helburua, eta hamabi minutuz jokatu du oraingoz.

Ondo bidean, haien aurretik izango da Ely; bai kalitateagatik, bai eskarmentuagatik. Laugarren sasoia du Gasteizen, hamargarrena Europan. 16 urterekin fitxatu zuen Milanek, eta Italian zaildu ondotik, bidea ari da egiten Alavesen.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Salvador Illa Espainiako Osasun ministroa, atzoko agerraldian. ©CHEMA MOYA / EFE

Jaurlaritzak osasun larrialdia ezarriko du astelehenetik aurrera

Irati Urdalleta Lete - Olatz Esteban Ezkati

Tapia eta Murga sailburuek gaurko agerraldian emango dituzte xehetasunak. Madrilek hartu ditu lehen neurriak, egoera epidemiologikoak okerrera egin duela eta: tabernek 01:00ean itxi beharko dute, eta gauerditik aurrera ezingo da bezero gehiagorik sartu. Kalean erretzea ere debekatuta egongo da, bi metroko tartea bermatu ezin bada.

 ©ARITZ LOIOLA / FOKU

«Martxoko egun zailenetan PCRak orain bezala eginda, 6.000 kasu izango genituen»

Maite Asensio Lozano

Pandemiaren jarraipena egiten ari den lantaldeari esker COVID-19aren transmisioa moteldu egin dela uste du Ignacio Garitano epidemiologoak. Bigarren olatua iritsi dela berretsi du, baina orain askoz positibo gehiago detektatzen direla nabarmendu du.

Bilboko Zorrozgoiti zahar etxeko egoiliar bat, atzo. ©MIGUEL TOÑA / EFE

Etsipena, beldurra eta nekea zahar etxeetan

Aloña Beraza Peña

Zahar etxeetako kutsatzeek gorakada nabarmena izan dute azken asteetan, eta langileak beldur dira ez ote diren itzuliko gaitzaren lehenengo olatuko egoerara. Egoiliarren artean ere kezka da nagusi.

Jendea paseoan Donostiako alde zaharreko kaleetan, atzo. ©Juan Carlos Ruiz/FOKU

618 kasu atzeman dituzte Hego Euskal Herrian

Berria

Bizkaian behera egin dute kasuek; Araban, Gipuzkoan eta Nafarroan, aldiz, igo egin dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna