Albistea entzun

LARREPETIT

Makuluak

Danele Sarriugarte -

2015eko urtarrilak 23

Mudatu genuen egutegia, eta baita atzean laga ere solstizioa, kurtso-hasiera aldapatsutik bizkarrean genekarren urtaroa behingoz gainetik kendu, madarikatua, oro soiltzearen sasoia; kide askori udazkenak eragiten die animoetan bortitzen, txarrera, noski: seko jo, xixko utzi.

Mudatu, atzean laga, gainetik kendu, eta azkenean ere iritsi ziren lehen hotzak, oro kexu ahoan, baina orokorrean pozarren eginda abegia, urri-azaro epelegien ajeak ordaintzera bailetozen abenduko izotzak, edo, are ahaztuaraztera, baliogabetzera ezbairik gabe ero dabilgun klima; horrela funtzionatuko balu bezala, batak bestea orekatuko balu bezala, ezabatuko.

Eta baietz, lehen hotzak eta egutegi berria eta bazen garaia negua, baina ikur ikusgarriagoak behar dira sarri eta ez guk geuk asmatutako mugarriak joan badoan denbora koadratuki egokitzeko gure pentsatzeko moldera, edo hobeto neurtzeko zenbateraino garen produktiboak, edo sendoago eusteko kontrol-sentipenari. Horrelaxe galdatu dugu ikusgarrietan ikusgarriena, mantsoa, motela, mara-mara datozen malutak.

Eta, gero, zer eskatzen diogun elurrari berari, hori ere bai baita zerbait; izan ere, hiri handi hartan genbiltzanean, zoriaren zoriz ibili ere hiri erraldoi hartan ekaitzak aireportu guztiak itxiarazi baino bi ordu lehenago hartu genuen-eta lur, hasieran ederretsi genuen estalki zuria baina berandu baino lehen higuindu gintuen, zikin zegoelako kale-kantoietan pilatuta semaforo-posteen oinarriak trinkotzen, zaila zelako estoldetako uretatik bereizten, gune batetik aurrera, zerutik hain lirainki eroritako hura. Esan genuen, oroitzen dut, hobeto legokeela mendian.

Elurra behar dugu, estaltzeko, elur garbia, zertarako eta oro estaltzeko, egiteko gai izan ez garen guztia, egin nahi izan ez genukeena, gure egun koldarrak, gure egun zekenak, gure egun geurekoienak; gure gloriarik ezaren kondarrak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.