'Zazpi'

Urte askoan belaunaldi bat markatu duen rocka apaltzen doan heinean, doinu urbano bezala ezagutzen ditugunak indar handiz sartu dira gazteen gustukoenen artean, baita musikazale ez hain gazteon artean ere. Garai aproposenean azaldu zen, beraz, rap, trap eta elektronika doinuak jorratzen dituen Nizuri Tazuneri bikotea euskal eszenan. Maketa baten ondoren, 2017an lehen diskoarekin zeresana eman zuen bikoteak, eta orain, sorpresaz bigarren lan luzea argitaratu berri dute. Zazpi izeneko disko kontzeptuala 14 abestiz osatua dago, zazpi bekatu kapitalak eta beraien aurkakoak azalduz. Aurreko lanetako doinuak mantenduz eta hitzei garrantzia emanez guztion entzungailuetan sartzeko asmoz datoz, eta askorekin lortu dute.