'Colombiana'

Bueltan da egungo flamenko kantaririk heterodoxo, konprometitu eta ausartena, Niño de Elche. Ez dira doan irabazitako superlatiboak, diskoz disko garatzen ari den ibilbide zentzudunaren emaitza baizik. Adibidez, azken Colombiana honetan, izpiritu berarekin heltzen die Hego Amerikako hainbat erritmori: cumbia, son, chicha, chacarera... eta lotsagabe uztartzen ditu hainbat palo flamenkorekin, esaterako, tangoekin, petenerekin eta colombianekin. Halako ezinegon musikala du, gai dela colombiana batean Maialen Lujanbio kantari jartzeko Beñat Axiariren laguntzarekin. Horrela jarrai dezala urte luzez Niño de Elchek, bideak zabaltzen bere lanen entzuleon irudimenari.