'Promises'

Pharoah Sanders jazz espiritualeko saxofoi jotzaile estatubatuar mitikoaren eta Sam Shepherd Floating Points ekoizle britainiarraren arteko lankidetza da Promises, Londresko Orkestra Sinfonikoarekin batera. Musikariek klasikoa, elektronika eta free-jazza uztartu dituzte ametsetako bederatzi mugimendu eder haizatzeko. Esperimentu sofistikatua da, entzulea amestera bultzatzen duena. Pharoahren esanetan: «Itsasontzi batean nago. Ozeanoan. Puruak erretzen dituzten hartzak gerturatzen dira. Hartzek abesten dute: 'Musika daukagu. Bilatzen duzuna daukagu'». Etiketak txikitzen dituen obra handia da, maisulan hipnotiko eta lasaigarria, lebitatzeko sortua.