Noiz sortua: 2020-06-11 00:30:00

Datuak ezkutatzea eta dokumentuak faltsutzea du ardatz EAren auziak

Atzo hasi zen EAko primarioen auziaren epaiketa. «Legearen barruan» aritu direla dio ildo ofizialak, eta afiliatuen zerrenda ez eguneratzea eta datuen sarbidea ezkutatzea salatu dute kritikoek
Maiorga Ramirez EAko Nafarroako presidentea, atzo, auzitegian.
Maiorga Ramirez EAko Nafarroako presidentea, atzo, auzitegian. J.FONTANEDA / FOKU Tamaina handiagoan ikusi

Maider Galardi F. Agirre -

2020ko ekainak 11

«Saiatu gara alderdi barruan konpontzen, baina tristeziaz diogu ez dugula lortu», hitz horiek esanda sartu da Maiorga Ramirez Nafarroako EAko presidente eta alderdiko sektore kritikoko kidea Gasteizko Justizia Jauregira. «Nahiago genuke albiste izan krisiari irtenbidea eman diogulako», esan du Iker Ruiz de Egino EAko Nazio Batzorde Eragileko bozeramaile eta ildo ofizialeko kideak epaitegi kanpoan: «Azken unera arte, auzia etxe barruan bideratzen ahalegindu gara». Heldu da, azkenean, EAko primarioetako ustezko irregulartasunei buruzko afera auzitegietara. Urtebeteko ika-miken ostean, alderdiko bi ildoak aurrez aurre jarri ziren atzo, Gasteizko lehen auzialdiko epaitegian. Lehen saioa izan zen atzokoa, baina datorren astearte eta asteazkenean ere izango du segida. Eta, itxura guztien arabera, atzoko eskema segituko dute datorren saioek ere: kritikoek frogatu nahi dute ez direla alderdiko estatutuak bete primarioen prozesua abiatzeko orduan, eta datu basea zuzendaritzaren esku gelditu dela «alderdia kontrolatzeko». Ildo ofizialekoek, ordea, esan dute «legearen barruan» jokatu dutela, eta baieztapen horri helduko diote auzi saioetan. Afera argitzeko launa lekukok emango dute beren testigantza egunotan.

Alderdikideak izateaz gain, aspalditik elkarren ezagunak dira aretotik pasatuko diren kide gehienak, eta tentsio hori nabari da auzitegiko korridoreetan eta epailearen aurrean. Koronabirusaren krisiaren ondorioz, osasun neurri bereziak bete behar dira epaitegian. Gehienez ere, bederatzi lagun egon daitezke gune berean, epailea barne. Hortaz, lehen saioan sartu-irtenean aritu dira alde bateko eta besteko kideak. Bertan izan dira Mikel Goenaga, Iratxe Lopez de Aberasturi eta Maiorga Ramirez auzi jartzaileak, eta baita ildo ofizialeko Joseba Gezuraga eta Iker Ruiz de Egino ere. Saio guztiak iraun bitartean egon da auzi eskatzailearen aulkian eserita Ramirez, eta deklaratzen lehena, berriz, Gezuraga izan da, salatu gisa.

Izatez, sektore kritikoak alderdiko zuzendaritzaren aurka jo du, baina, Pello Urizarrek orain dela urtebete dimisioa eman ostean Gezuraga behin-behinean alderdiko idazkari nagusi izan zenez, eta primarioen prozesua abian jartzeko agindua zuenez, hark erantzun du zuzendaritzaren izenean. Gogor egin du auzi eskatzaileen abokatu Jose Luis Soldevillak galdeketan. Besteak beste, Gezuragak baieztatu du joan den uztailaren 4an hartu zuela jarduneko idazkari nagusi izateko kargua, eta uztailaren 19an egindako ezohiko batzar nazionalean adostu zutela irailaren 16ra arte epea zutela primarioen prozesua abiarazteko. Bi data baieztapen horietatik tiraka, auzi eskatzaileen abokatuak zalantzan jarri du zuzendaritzak EAko estatutuak errespetatu ote zituen.

Estatutuak eta datu basea

Batetik, Gezuragak esan du datuen babeserako legea berritu ostean, Datuen Babeserako Agentziari eskaera egin ziotela gaia aztertzeko, baina Soldevillak azpimarratu du txostena baliogabea dela, Gezuraga idazkari nagusi izan arren Pello Urizarren izena agertzen delako bertan.

Gezuragak irmo heldu dio datuen babeserako legearen kontuari: «Argi utzi nahi dut gauza bat: batzorde exekutiboak ez du inoiz izan sarbidea datuen basera». Ondoren adierazi du datuak lurraldekakoak direla, eta lurraldeko koordinatzaileek dituztela datu horientzako sarbideak. Ez, ordea, beste herrialdeetakoenak.

Aurkakoa frogatzen ahalegindu dira kritikoak. Horretarako, lekukoak deitu dituzte aretora, eta Bruno Zubizarreta EAko Bilboko koordinatzaile eta udaleko zinegotziak esan du berak baduela sarbide hori. Defentsaren abokatuak, ordea, iradoki du Zubizarretak datu horiek erabili zituela Ramirezen hautagaitzaren mesederako.

Gainera, defentsaren abokatuak azpimarratu du ez direla gauza bera afiliatuen eta bozkatzaileen zentsua, eta primarioetako hautagaiek —Eba Blancok, Ramirezek eta Juan Luis Cristobal Zendoiak— beharrezko datuak zituztela prozesuarekin segitzeko: «Guztiek datu berak», zehaztu du Gezuragak.

Aktak faltsutzea

Primarioen prozesuaz harago joan da auzia, ordea, eta kritikoen defentsak dokumentuak eta afiliazio zerrenda faltsutzea leporatu die ildo ofizialekoei. Epaileak esan du hori beste auzibide bat dela, baina abokatuak du ezohiko batzarrera deitzeko akta desitxuratuta dagoela, eta hildako jendea oraindik afiliatuen zerrendan dagoela. Hari horiek solte gelditu dira lehen egunean, eta ikusteko dago datozenetan zein norabide hartuko duen auziak. Asteartean ekingo diote berriro.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Ordizian Barrena parkearen goiko aldean, osasun etxearen alboan jarri duten gunea. / ©Jon Ruiz

Ordizia, Etxezarreta kaleko zerbitzarien emaitzen zain

Jon Ordoñez Garmendia

Ekainaren 27az geroztik Etxezarreta kaleko ostatuetan ibili direnei PCR probak egiteko eskatu die Osakidetzak, badaezpada, eta ilara luzea sortu da horretarako jarritako gunean. Ordiziako Udalak bertan behera utzi ditu gaur hastekoak ziren udalekuak, eta Ordiziako EH Bilduk, kanpaina.

Herritar batzuk PCR proba egiten, Ordizian ©Jon Urbe / Foku

Hego Euskal Herriko herritarren %4,3k izan dute COVID-19a

Irati Urdalleta Lete

Seroprebalentzia azterketaren emaitzen arabera, ia 124.000 pertsona kutsatu dira Hego Euskal Herrian.

Maskara sorta salgai ©Marisol Ramirez / Foku

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna