Andre Mari Zuriaren jaiak

Sei egun eta bost gau ospatzeko

Zeledonen jaitsierarekin piztuko da Gasteizko jaietako euforia gaur: euritako morea emango du aurten. Txupinazora ezingo da sartu kristalezko botilarik, ezta latarik ere. Txosnagunea eta Aihotz plaza jadanik irekita daude.
18:00etan jaitsiko da Zeledon.
18:00etan jaitsiko da Zeledon. JUANAN RUIZ / FOKU

Eider Etxeberria -

2018ko abuztuak 4
Gasteizko Andre Maria Zuriaren jaiak ate joka datoz. Blusa eta neskak gogotsu daude beste behin jan, edan, dantzatu eta gozatzeko. Izan ere, horiek gozatuko baitute gehien Zeledonen jaitsieraren ondorengo egunetan. Plaza, kale eta tabernak musika doinuz eta giro atseginez izango dira datozen sei egunetan.

Gaur, arratsaldeko seietan piztuko da euforia, txupinazoan. Andre Maria Zuriaren plaza jendez lepo beteko da, eta suziriak eztanda egiten duen momentuan hasiko dira jaiak. Hortik aurrera, gasteiztarrek bost gau eta sei eguneko tartea izango dute hiriko jaiak ospatzeko.

Txupinazorako jende andana espero da. Zerura begira eta Zeledonen abestia kantatuz, ongietorria egingo diete jaiei. Aurten, Zeledonek euritako morea eramango du beste urteetako urdinaren ordez. Eguraldi beroa dela eta, zenbaitek blai eginda bukatuko du; izan ere, 34 gradutaraino egingo du gora tenperaturak. Hori dela eta, suhiltzaileak bertan egongo dira jendea freskatzen beren tutuekin. Hala ere, ez da oztoporik izango umore onerako.

Aurtengo txupinazoan suziria botatzeaz nagusien zentro soziokulturaleko lau kide izango dira: Andrea Corres, Aurelia Encarnacion Izquierdo, Daniel Uriondo, eta Juan Luis Soriguren. Bi emakume eta bi gizon izango dira beraz, Gasteizko jaiei hasiera emateko ohorea izango dutenak.

Aurten, bigarren urtez, ezin izango da txupinazora kristalezko botilekin sartu. Iaz Gasteizko Udalak hartutako erabakiaren ondoren, xanpain botilak plazan sartzea debekaturik dago. Eta aurtengo araudiak hedapen bat ere izango du: latak ere ezingo dira sartu Andre Maria Zuriaren plazara: kristalezko edukiontziak plazara sartzea saihesteko, udaltzaingoa eta Ertzaintza egongo dira sarbideetan. Arazoa konpontzeko, 17.000 plastikozko edalontzi berrerabilgarri banatuko ditu udalak: more kolorekoak izango dira eta Jailarai berdintasunaz blai! leloa eramango dute.

Txosnak, aurrez zabalik

Azken hilabeteetako lan gogorraren ondoren, txosnaguneak jadanik prest daude. Izan ere, atzo ireki zuten txosnagunea, eta herenegun ireki zuten Geu elkartearen txosna, Aihotz plazan. Gasteiztarrei eskertzeko ireki dituzte egun batzuk lehenago, jaiak lehenago ospatzen hasteko aitzakia gisa. Atzo hasi ziren kontzertuak txosnen guneko oholtzetan, eta gaur ere izango dira, 23:00etan hasita: Boot Boys taldea, Akerbeltz erromeria eta DJ Elepunto arituko dira. Horrez gainera, bazkaria ere izango da Errekaleorren txosnan, 13:00etan. Arratsaldean, 17:00etan, Txupiguay kalejira egingo dute txosnetatik hasita.

Geu elkarteak Aihotz plazan jarritako txosnan ere aukera paregabea egongo da ostegunetik aurrera. Ostegunean izan zen irekiera, eta 200 boluntario ingururekin batera jardungo dute. Zazpigarren urtea du Geu elkarteak Aihotz plazan txosna jartzen duena: sagardoa, txorizoa eta patata tortillazko pintxoez gain, ogitartekoak ematen dituzte gauerdira arte. Pistozko ogitartekoak ere badira aukeran. Geu elkarteak antolatutako egitarau propioaren ondoren, gaurtik aurrera, udalak antolaturiko bertso saioak eta Dantza plazan saioak izango dira Aihotz plazan.

Saioa Fernandez de Arangiz Geu elkarteko kideak azaldu duenez, txosnarekin «giro euskalduna nolabait bermatu» nahi dute. Gainera, Aihotz plazan giro «polita» sortzen dela adierazi du: «Gurera etortzean, jendeak badaki zer topatuko duen: beste gune batzuetan topatzen ez duena».

Animalien erabilera, behera

Aurten, bigarren urtea izango da Gasteizko jaietan zezenketarik egongo ez dena. Izango dira, ordea, bigantxak. Bestalde, urtero Mendizabalako feria barrutian kokatzen den zirkuan, ez da izango animaliarik: abuztuaren 5etik 9ra egongo da ikusgai. Aurten etorri dena berria da: Italiako Il Circo Italiano, hain zuzen, Sueños ikuskizunarekin. Horrez gainera, barrakak egongo dira leku berean. Horiek urteroko berberak izango dira, eta abuztuaren 14a arte egongo dira irekita.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria