Mende erdi atzera iltzatuta

Hirurogei urte atzera egin dezake The Neatbeats talde japoniarraren doinuen sareetan korapilatuta gelditzen denak. Osakako laukote horrek ez du ezkutatzen bere (musika) jatorria, lantzen dituen kantuetan beat, twist, rock-and-roll eta rhythm & blues doinuak barreiatzen baitira etengabe. The Beatles, hasierako The Rolling Stones, Little Richard, Chuck Berry eta, batik bat, Eric Burdon eta The Animalsen arrastoak nabariak dira The Neatbeatsen musikan, baina haien kalko hutsa izan gabe, laukoteak badaki kantu eraginkorrak egiten, hala rock-and-rollera eta twistera jotzen duenean nola beat doinuak nagusitzen direnean. Gainera, ez diote uko egiten 60ko hamarkadako klasikoen bertsioak grabatzeari: I'm The Lonely One (Cliff Richard), Wishin' and Hopin (Burt Bacharach-Hal David).

Proposamena borobiltzeko, lau kideak The Beatles lehenengo urteetan bezain dotore ateratzen dira oholtzara.