Ezkurdia-Martija eta Jaka-Aranguren aukerarik gabe gera daitezke asteburuan

Azken txanpan dago Binakako Txapelketako lehen ligaxka; lau jardunaldi besterik ez dira falta jokatzeko, eta partida guztiek berebiziko garrantzia dute; puntu batek kontu asko alda ditzake.

11. jardunaldia norbaitentzat erabakigarria baldin bada, sailkapeneko azken bi postuetan dauden bikoteentzat da: Joseba Ezkurdia eta Julen Martija azken-aurrenak dira, bi garaipen lortuta; Erik Jaka eta Aitor Aranguren, berriz, azkenak dira, garaipen bakarra lortuta. Biak ala biak daude kinka larrian; horrenbeste, ezen asteburu honetan bertan gera daitezke aukerarik gabe kanporaketa jokatzeko.

Jakak eta Arangurenek derrigor irabazi behar diete bihar Peio Etxeberriari eta Beñat Rezustari Iruñean; irabazi ezean, akabo euren aukera guztiak. Irabazita ere,miraria beharko lukete, lau garaipenera baitute seigarren postua.

Ezkurdiak eta Martijak ere balentria egin beharko lukete kanporaketarako sailkatzeko; hiru garaipenera dute seigarren postua. Itxaropenari eutsi nahi diote, baina, horretarako, kosta ahala kosta irabazi behar diete gaur Mikel Urrutikoetxeari eta Jon Ander Albisuri Zornotzan (Bizkaia). Baikoko bikoteak zehazten du orain kanporaketarako langa. Aspekoek galduz gero, ezinezkoa lukete Baikokoak harrapatzea. Are gehiago, aukerarik gabe geratuko dira gaur galtzen badute eta bihar Peio Etxeberriak eta Rezustak, eta Peña II.ak eta Eskirozek irabazten baldin badute.