Itzultzeko lanik ez
Euskal Herrira itzultzen lanik ez du izango Bartzelonako Nafarren Etxea pilota elkarteak. Ez, behintzat, XVIII. Berria Txapelketan beste kanporaketarik jokatzeko. Izan ere, joan den larunbatean izandako jaialdian hirutik hiru partidak galdu zituzten kataluniarrek Zornotzako (Bizkaia) Lagun Onaken aurka, eta hirugarren urtez jarraian, kanporaketa bat gainditu ezinda dabiltza oraindik ere.
Hasi eta buka, askoz gehiago izan ziren pilotari bizkaitarrak, baina nabarmentzekoa da beste behin Nafarren Etxearen parte hartzea. Euskal Herrian klub askok ezin dutena lortzen baitu; taldea osatzea, alegia.
Aldez aurretik, oso faborito zen Lagun Onak, eta kadeteen partidatik hasita erakutsi zuen zergatik. Lehen partidan oso nagusi izan ziren zornotzarrak: Torralbak eta Otxandiok 22-5 irabazi zieten Botari eta Camarari. Sendo eta serio jokatzea aski izan zuten garaileek. Atzeko koadroetan agindu egin zuen Otxandiok, eta aurrean, Torralbak horixe baliatu zuen tanto politak egiteko. Kataluniarrak saiatu ziren egoera aldatzen, eta postuz ere aldatu ziren bi pilotariak, baina alferrik. Eta gazteen arteko lehian ere antzerako gidoia izan zuen norgehiagokak. Kolorerik ez zen izan, eta Lagun Onak-eko Oregi eta Bullon 22-5 nagusitu zitzaizkien Martinezi eta Navarrori. Bullonen joak piztu zuen zeresana, errebote bat ere jo baitzuen.
Orekatuagoa espero zen nagusien artekoa, baina jaialdiko azken partidan ere oso aise irabazi zuen Bizkaiko taldeak. Zehazki, Prietok eta Arrienek 22-8 irabazi zieten Arribasi eta Arrasateri. Partida erditik aurrera hautsi zen lehia. Hurrengo fasean Bergararen aurka jokatuko du Lagun Onak-ek.
Asteburu honetan abiatuko dira final-hamaseirenak, bi kanporaketarekin: Irurtzun Lezamaren aurka, eta Aurrera Leitza Danok Lagunak-en kontra.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
