Naiz irratiak espetxeen egoera landuko du saio berri batean

Kartzeletako errealitatea ardatz hartuta, Naiz irratiak Etxerako Kunda programa estreinatuko du gaur, 22:00etan. Patxi Urangak gidatuko du saioa, eta zera adierazi du: «Nire motibaziorik handiena da Martutene [Donostia], Zaballa [Araba], Basauri [Bizkaia] eta Iruñeko kartzeletara Etxerako Kunda iristea. Euskal Herriko kartzelak entzule potentzialez betetzen ari zaizkigu. Espero dut irri pixka bat eginaraztea eta ordubetez behintzat entretenitzea; konpainia egin nahi diet presoei». Espetxe barruko bizipenak ezagutaraziko dituzte. Iruñerrian, Antxeta irratiaren bidez emango dute saioa, ostegunetan, 15:00etan. Podcast plataformetan ere zabalduko dute.

'Kafe expreso', 30ean hasita

Gasteizko Hala Bedi irratiak, halaber, presoen eta kalean dauden senide eta lagunen mezuak jasoko ditu irratsaio berri batean: Kafe expreso. Hilaren 30ean estreinatuko dute, 15:00etan, eta ostegunero Hala Bedi tabernan egingo dute. Emankizun hori Euskal Herriko beste espetxe batzuetako presoek entzun ahal izatea nahi dute: Basaurin 97 irratiak emango du; Iruñerrian, Antxeta irratiak; eta Martutenen Naiz irratian entzun ahalko da. «Espetxeetako harresiak zulatuko dituen zubia» izateko sortu dute.