Albistea entzun

Sanferminak

Egurrezko hesia kentzeko ordua

Sevillako Miura ganadutegiko zezenek egin dute azken entzierroa, ohi bezala. Lagun bat adarkatua izan da, eta bertze bortz erietxera eraman dituzte. Bi minutu eta 14 segundo iraun du sanferminetako azken zezen lasterketak
<b>Aise. </b>Aurtengo azken entzierroan, Miurako zezenek erraz hartu zuten Mercaderesko bihurgunea.
Aise. Aurtengo azken entzierroan, Miurako zezenek erraz hartu zuten Mercaderesko bihurgunea. JAGOBA MANTEROLA / @FOKU Tamaina handiagoan ikusi

Yasmine Khris -

2022ko uztailak 15 - Iruñea

Batzuk, gaupasaz etorriak. Bertzeak, goiz ernatuak, azkenari ez baitzaio huts egiten. Egun argitsupean luzaketak egiten ikusi ahal izan ziren korrikalariak. Jakina da sanferminetako azken entzierroa ez dela bertzeak bezalakoa, eta bero boladaren erdian, are gutxiago. Atzo, Sevillako (Espainia) Miura ganadutegiko zezenak aritu ziren, zortzigarren egunean, Iruñeko karriketan. Lagun bat adarkatua izan zen, eta bertze sei ere erietxera eraman zituzten.

Eguzkitako betaurrekoak, abanikoak eta txanoak; eta Udaletxe plazako erlojuak 08:00ak jo gabe oraindik. Halere, askotariko ikusleak azaldu ziren egurrezko hesiaren bazter guzietatik. Udaletxe plazan, garestiak ziren jarlekuak: Miura ganadutegiko animaliak ezagunak dira entzierroaren munduan, ia mitikoak. 54. parte hartzea dela eta, ikusmina zegoen. Estafeta karrikan, berriz, pribilegiatuenak balkoietan zeuden, zoruari so. «Pentsa zer azkar joan den!», aditu zen eraikin bateko bigarren solairutik. Bestez ari da Alde Zaharreko bizilaguna, erdi penatua. Entzierroa ere azkarra izan zen: 2 minutu eta 14 segundoan zeharkatu zuten ohiko ibilbidea animaliek.

San Domingoko ukuilutik suziria bota orduko abiatu ziren zezenak, maldan goiti. Joareak astinduz, hasi ziren abiadura hartzen. Azkar ekin zioten maldari; izan ere, jende anitz bildu zen aldapan atzo, eta zuriz jantzitako karriken artetik iragan ziren animaliak. Gaztain koloreko sei zezenek aise egin zuten lasterka, eta arin. Korrikalarien artean, pilaketak izan ziren ezker-eskuin, eta susto batzuk ere bai.

Garbi ailegatu ziren Udaletxe plazara, bi joaldun buruan. Aitzinerantz segitu zuten, eta Mercadereseko bihurgunea hartu zuten, korrikalariei kasu handirik egin gabe. Eta bazen kasu egitekorik: izan ere, korrika egiteko azken aukera izanda, publiko ugari zen presente karrikan. Ondorioz, zenbait lagun erori ziren.

Estafetara sartzean, sakabanatzen hasi ziren zezenak, bi taldetan. Efektu zuzena izan zuen horrek: bi samaldaren arteko espazioan erortzen ziren korrikalariak, zapalduak izateko arriskuan. Gutxika, zezen taldea gehiago barreiatuz joan zen. Bitartean, kolpeak eta adarren aurrean egoteko borrokak ikusi ziren. Azkar egin zuten korrikaldia Estafeta karrikan. Bigarren erdian, hiru animalia jarri ziren buruan, bertze hirurak pixka bat atzerago geratuta. Orduan bai, lasterketa politak egin ahal izan zituzten korrikalariek.

Telefonicako zatian, banatu egin ziren zezenak, maldan behera jaitsi baino lehen. Korridoreen kontra egin gabe heldu ziren zezen plazara. Erraz gurutzatu zuten hondar zelaia, herenegungo Victoriano del Riokoek baino bi segundo beranduago. Lasterketa osoa ikusita, arrisku gutxi nabaritu zen, eta zezen guziek zintzotasuna erakutsi zuten. Nafarroako Unibertsitate Ospitalearen osasun partearen arabera, sei pertsona artatu behar izan zituzten osasun zentroetan: bat adarkada batengatik.

Heldu den urtera arte

Miurako zezenak ohikoak dira sanferminetako entzierroetan, baina baita beste ganadutegietakoak ere. Orotara, zortzi egunen artean, berrogei animalia baino gehiago izan dira entzierroen protagonistak. Zezen plazan hil dituztenak ere bai.

Azken entzierroa amaitu bezain laster, atzo bertan hasi ziren entzierroko hesiak kentzen Hermanos Aldaz zurgindegiko langileak. Heldu den entzierroa 2023ko uztailaren 7an izanen da, 08:00etan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Iruñeko Alde Zaharreko udalbatza txikiko kideak, atzo, goxokiak botatzen, San Fermin Txiki bestetan. ©IÑIGO URIZ / FOKU

Gozo eta gogo zaparrada

Iker Tubia

Hasi dira Iruñeko San Fermin Txiki bestak, karrikak hartzeko gogo handiz. Jendetza batu da txupinazoan: dantzan zaharrenak, eta goxokien ehizan gazteenak. Denak zeruari so.
1 ©MONIKA DEL VALLE / @FOKU

'Janponia' nonahi

Jakes Goikoetxea

Euskal Herrira ere iritsi zen Japoniako sukaldaritzaren goraldia, eta hango platerak ohikoak bihurtu dira jatetxeetan eta etxeetan. Donostiako Akari, eta Bilboko Kuma eta Oh! Taku hiru jatetxe japoniar dira.

Andoni Luis Adurizek eta haren lantaldeak Nineu jatetxearen kontzeptua berritu dute, eta Muka sortu dute Donostian. ©MAIALEN ANDRES / FOKU

Suaren aukerak platerean

Amaia Jimenez Larrea

Donostiako Muka jatetxeak sua du bere plateren ardatz. Bi hilabete daramatza irekita Kursaalean, Nineu jatetxearen kontzeptuaz gogoeta egin eta hura eraldatu ondoren.
 ©DISNEY PLUS

Etorkizunik ez zuretzat

Mikel Yarza Artola

Disney Plus plataformak Sex Pistols punk talde mitikoaren inguruko 'Pistol' telesaila plazaratu du. Danny Boylek zuzendu ditu sei atalak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...