UAGA ere aurka azaldu da aurrenekoz

UAGA Arabako nekazarien elkarteak ere ez du ongi ikusten Tuestan laborantza eredu hidroponikoa erabilita tomateak ekoiztea, eta proiektuaren aurka azaldu da lehen aldiz.

Nekazarien sindikatuak iritzi dio ez diola erantzuten landa eremuaren eta, bereziki, lehen sektorearen beharrari: «Banaketa enpresa handi baten hornidura premiei erantzuten die, eta Arabako nekazaritza eta abeltzaintza eredu tradizionala ordezten du». Eta uste du «justifikaezina» eta «inkoherentea» dela administrazioek proiektuari eman dioten babesa.

UAGAk orain arte albo batera egin du negutegiaren inguruko eztabaidan; are gehiago, alde ere azaldu zen presidente ohia. Baina iritzia aldatu du orain.