Iciar Mikelperizena. Margolaria

«Gidoi txiki bat dugu beti, baina inprobisaziotik asko du saioak»

Nafarroako Xaloa telebistan 'Esku begi sormen bizi' saioa aurkezten du astero Mikelperizenak. Artelan bat edo eskulan bat egin bitartean, «solasaldi goxo» bat izaten du gonbidatuekin.
MIKELPERIZENA SENDIA Tamaina handiagoan ikusi

Urtzi Urkizu -

2020ko azaroak 21

Navarra Television eta TVPI kateetan egin zituen Iciar Mikelperizenak (Bera, Nafarroa, 1975) telebistako lehen kolaborazioak, baina Xaloa telebistakoa du aurreneko saioa aurkezle gisa. Sunbillan (Nafarroa) bizi da, eta pintura eskolak ematen ditu. Nekazaritza arloko REDR sareak, beste alde batetik, kanpaina baterako aukeratu dituen 32 emakume esanguratsuen artean dago.

Nola sortu duzue Esku begi sormen bizi saioa?

Duela urte eta erdi inguru, Xaloari proiektu bat bidali nion. Duela bi hilabete erantzun zidaten esanez has gintezkeela zerbait egiten. COVID-19aren eraginez, buruan nuena apur bat aldatu egin da. Azken finean, oinarria da artelan bat edo eskulan bat egitea, eta bitartean elkarrizketa bat egitea. Horretan gaude. Lehen hiru atalak eman dituzte, eta Youtuben ere ikusgai daude.

Saioaren izena berezia da. Nola bururatu zaizu?

Duela urte batzuk istripu larri bat izan nuen, eta eskuineko hatzak galdu nituen. Ezkerreko eskuarekin ikasi behar izan nuen idazten, margotzen... Eskuek badute niretzat garrantzia. Nola ez, zerbait begiekin ikusten duzunean, bururatzen zaizu zerbait egitea. Hortaz, Esku begi sormen bizi otu zitzaidan, eta horrela gelditu da.

Telebistan sormen bizia egin al daiteke?

Bai, hori da. Adibidez, Javier Igoa margolariaren etxera joan ginen, eta ez genuen ezer berezia aurretik prestatua. Elkartu ginen estilo desberdinetako bi margolari, eta Sunbillako zubia margotu genuen. Gozatu genuen zerbait egiten, eta, bitartean, elkarrizketa izan genuen. Elkarrizketatuen sentimenduetan sartzen saiatzen naiz. Probatzen joango gara, jendeak ikus dezan sortzaileek zer gauza desberdin egiten dituzten.

Javier Igoaren elkarrizketan margotzen azaltzen zara. Ez da ohikoena telebistan aurkezle bat margotzen ikustea.

Kasu horretan, saioaren bukaeran eskatu nion tronpeta jotzeko. Gidoi txiki bat idazten dugu beti, baina inprobisaziotik asko du saioak. Bestetik, artea niretzat ogibidea da, eta emozioz bizitzen dut. Horretan ari naizen bitartean hitz egiten aritzea ez zait zaila egiten, biak batera egiten ondo pasatzen dut.

Saioan esan duzu arteak bizipoza ematen dizula.

Bai, niri bai, ikaragarria.

Iruditzen zaizu Xaloako ikus-entzuleei bizipoz hori transmititzen diezuela saioarekin?

Hori da gure asmoa. Jendeak sentitzea edonork egin ditzakeela eskulanak eta artelanak. Kozinatzen ere arituko gara beste atal batzuetan. Dena solasaldi goxo bat partekatzen dugu bitartean.

Formula Nafarroatik Euskal Herri osora zabalduko al zenuke?

Nafarroatik atera gara atal batean, Gipuzkoako herri batera. Eta jendeari gustatzen bazaio, nola ez, zabalduko dugu formatua herrialde guztietara.

Atzerriko beste saioren batetik edan al duzu Esku begi sormen bizi sortzeko?

Ez, formatu propioa da. Dena den, nire kasuan berdin zait gonbidatuak margotzen badu, eskulanak egiten baditu edo kozinatzen aritzen bada. Bi haurrekin ere aritu naiz eskulan bat egiten: eguzki lore bat. Hainbeste hitz egin daitezke herritarrek egiten dituzten gauzen inguruan... Opari bat bezala hartzen ari naiz saioa. Protagonistek haien bizitzak kontatzen dizkidate, eta asko hunkitzen naute. Askotan, kameratik kanpo kontatzen dizkidatenak sekulakoak izaten dira, oso hunkigarriak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©JAIZKI FONTANEDA / FOKU

«Emakume askea da Ferrer»

Jakes Goikoetxea

Tren bidaia bat, eta Esther Ferrer artista eta laguna bidaide. Performance bat, iragana eta oraina lotzeko hari. Emaitza: dokumental bat, oraindik askorentzat ezezaguna den artista bati buruz.
 ©BOB EDME / BERRIA

Euskal tearen tenorea

Ainize Madariaga

Euskal Herriko lehen te landa ezarri du martxan Mikel Esclamadonek Uztaritzen. Oraino gazteak badira ere, hostoak bildu ahala emendatuko zaie emankortasuna eta ahalbidetuko diote bere ametsa: ofizio bilakatzea. Jatorrizko kultura Asiakoa bada ere, euskal tea sortzeko xedea du.
 ©JULIO VERGNE

«Aurrekaririk gabeko ikerketa bat egin ahal izan dugu»

Urtzi Urkizu

HBOk Pablo Ibarren auziaren inguruko dokumental saio bat estreinatuko du bihar. 2.000 orduko grabaketak sei ordutan laburbildu dituzte Figueredok eta haren taldeak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna