Albistea entzun

Europarren erroetara begirada

Izotz Aroko argazkiak batu dituzte San Telmo museoan, «Europako kultur ondarea zabaltzeko»
Gaurko eta orduko gizarteak kontrajarri nahi izan dituzte, batzuen eta besteen arteko aldeak ez direla hain handiak erakusteko.
Gaurko eta orduko gizarteak kontrajarri nahi izan dituzte, batzuen eta besteen arteko aldeak ez direla hain handiak erakusteko. JUAN CARLOS RUIZ / FOKU Tamaina handiagoan ikusi

Maialen Unanue Irureta -

2018ko apirilak 28

Europako hainbat hiritan izan ostean, Donostiara eraman dute Ice Age Europe Now erakusketa: Europako Izotz Aroko aurkikuntzen «kalitate eta formatu handiko» argazkiak batu dituzte San Telmo museoaren atarian. Ekainaren 10era arte egongo da ikusgai, une oro: dena den, bisita gidatuak egingo dituzte asteartetan, larunbatetan eta igandeetan, euskaraz zein gaztelaniaz. Erakusketaren bidez, 2018ko ondarearen urte europarrari ekarpena egin diote, horrela.

Euskal Herrian topatu diren historiaurreko aztarnak eta Europako beste zenbait txokotan egin diren aurkikuntzak batu dituzte erakusketan, Juanjo Aranburu Ekainberriko arduradunak azaldu duenez. Zuloaga plazako hamabost paneletan elkartu dituzte, besteak beste, Ekainberriko zaldiak eta Altamirako bisonteak (Kantabria, Espainia).

Ice Age Europe sareak antolatutako erakusketa da, eta Euskal Herriko hiru ordezkarik parte hartzen dute: Ekainberriko, Izturitze eta Otsozelaiko eta Santimamiñeko kobazuloak. Horren parte dira, halaber, Alemaniako, Belgikako, Kroaziako, Espainiako, Frantziako, Italiako eta Erresuma Batuko zentro gehiago. Hain zuzen, hausnarketarako esaldi bana dute panelek, euskarazkoak barne: erakusketarekin batera bidaiatuko du Europan barrena, hortaz, euskarak.

«Gaurko eta orduko gizarteak kontrajarri nahi genituen: gure galderetako bat da ea zertarako balio duen ondareak, eta gure nahia da gaur egunerako baliagarria izatea», nabarmendu du Aranburuk. Oso urrutiko iruditu arren, lehengo eta gaurko arazoak ez direla oso diferenteak erakutsi nahi izan dute: «Beste mundu batekotzat ditugu, eta gu aurreratuagoak garela uste dugu: erakusketa ikusita, beharbada, zalantzan jarriko dugu ideia hori».

Homo sapiens-ak eta neandertalak batera erakusten ditu lehenengo panelak: «Neandertal bat, bere itxura naturalean, gaur egungo janzkera edo moduetara eramango bagenu, ez luke atentzio berezik deituko», dio Aranburuk, barre txikiarekin. Bi espezieen arteko bizikidetza nolakoa izan zen aztertzen ari dira zientzialariak, Aranburuk azaldu duenez: «Zalantzan ari gara jartzen orain arte egitatetzat genituen gauzak: ikertzen goazen heinean, kontakizun bakar hori ez da hain bakarra, eta konplexuagoa bihurtzen da».

Plastikoak aztarna gisa

Izotz Aroko gizakien bizimodua islatzeaz gain, hausnarketa bultzatu nahi dute, batez ere, erakusketaren bidez. «Gaur egun, erronka handiak ditugu migrazioei eta klima aldaketari lotuta, eta erakusketa honek balio dezake horiei nola aurre egin pentsarazteko», azaldu du Aranburuk.

L forman jarri dute erakusketa, San Telmo museoaren ataritik hasita ikusteko pentsatuta. Azken panelak ematen du zer pentsatua: «Irudikatu nahi izan dugu guk utziko dugun balizko aztarnategi bat: guk tresnak edo hezurrak topatzen ditugu, baina zer topatuko dute etorkizunean? Bada, batik bat, plastikoak».

Gipuzkoako Turismo diputatu Denis Itxasok «elkarlanaren espiritua» nabarmendu du, kasu honetan, Gordailuaren, Ekainberriren eta San Telmo museoaren artekoa. Halaber, nabarmendu du Ekainberri Ice Age Europe sarean egotea bere garaian egin ziren aurkikuntzei eta aldundiak Ekainberriren erreplika antolatzeko apustuari esker izan dela: «Ordutik hona aurrehistoriako ondare horri guztiari garrantzia ematen saiatzen gara».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©MAIALEN ANDRES / @FOKU

«Tximeleta efektua gertatzen da; egia da»

Enekoitz Telleria Sarriegi

Sarriegiren Astrolabium konpainiak 'Butterfly effect' antzezlana estreinatu zuen igandean: tximeleta baten hegaldiak munduaren beste puntan sor ditzakeen olatuez, historian egindako keinuez, eta egin gabekoez.
Pierre-Andre Foix Exofair enpresako burua, Miarritzen ekoizten duten Every exoeskeletoa soinean. ©GUILLAUME FAUVEAU

Kanpoko hezurdura indar jokoan

Ainize Madariaga

Lan eta bizi baldintzak hobetzeko, Exofair enpresa Every exoeskeletoa ekoizten hasi da Miarritzen. Ekologikoa, erabilerraza eta denek eskuratzeko modukoa izatea du xede, partikularrak eta enpresa ttipietako langileak baititu jomugan: 30 kiloz arindu ditzake kargak.

Bingen Zupiria Eusko Jaurlaritzako bozeramailea, artxiboko irudi batean. ©DAVID AGUILAR / EFE

Jaurlaritzak baztertu egin du ikus-entzunezkoen kontseilua sortzea

Urtzi Urkizu

Eusko Jaurlaritzako bozeramaile Bingen Zupiriak esan du «nahikoa» direla gaur egun dauden egiturak eta zerbitzuak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Maialen Unanue Irureta

Informazio osagarria