Albistea entzun

Errusiako hauteskundeak

Putinek gehiengo osoa berritu du parlamentuan, iruzur salaketa artean

Errusia Batua alderdiak botoen erdiak eskuratu ditu, eta ordezkarien bi heren izango ditu behe ganberan. Errusiako Alderdi Komunista izan da bigarrena
<b>Zenbaketa.</b> Tokiko hauteskunde batzordeko kideak botoak zenbatzen, igandean, Moskun.
Zenbaketa. Tokiko hauteskunde batzordeko kideak botoak zenbatzen, igandean, Moskun. MAXIM SHIPENKOV / EFE Tamaina handiagoan ikusi

Arantxa Elizegi Egilegor - Gorka Berasategi Otamendi -

2021eko irailak 21

Vladimir Putin Errusiako presidenteak kontrolpean izango du, beste bost urtez, parlamentuko behe ganbera. Estatuburuaren Errusia Batua alderdiak gehiengo osoa berritu du ostiraletik igandera bitartean egin ziren bozetan. Botoen ia %99,7 zenbatuta, horien erdiak eskuratu ditu (%49,8), eta ordezkarien bi heren baino gehiago izango ditu —300 parlamentaritik gora, 450 kideko ganbera batean—. Ordezkaritza horrekin, ez du arazorik izango ekinaldi legegileak ganberan onartzeko, gainerako indarren beharrik gabe. Boto zenbaketak aurrera egin ahala, hainbat irregulartasun salatu dituzte oposizioak eta zenbait elkarte ikuskatzailek.

Putinen garaipena ez da sorpresa izan, baina ikusteko zegoen ea, iragarria zegoen bezala, haren babesak behera egingo zuen ala ez, eta hala egitekotan, zenbateraino. Parlamentuan duen kontrola argia bada ere, emaitzek aurrekoan baino sostengu apalagoa aitortu diote Errusia Batuari. Alderdiak botoen %54 eskuratu zituen 2016an, azken bozetan baino ia bost puntu gehiago.

Bigarren indarra izan da PKRF Errusiako Federazioko Alderdi Komunista, botoen %19 lortuta. Komunistek XXI. mendean herrialdean lortu duten emaitzarik onena izan da.Kontrako joeran, sostengua nabarmen galdu du LDPR Errusiako Alderdi Liberal Demokratak. Botoen %13 eskuratu zituen aurrekoan, eta %7,5 lortu ditu orain. Bidezko Errusia alderdi sozialdemokratak botoen %7,4 bildu ditu, eta Jende Berria alderdi sortu berriak ozta-ozta gainditu du parlamentuan sartzeko botoen %5eko langa (%5,4). Aldiz, behe ganberatik kanpo geratu dira Jabloko alderdia eta ekologistak. Parte hartzea %52 izan da, 2016an baino bost puntu handiagoa.

Oposizioak, dena den, auzitan jarri ditu emaitzak, eta hainbat irregulartasun salatu ditu. Hala egin dute bozen jarraipenean aritu diren zenbait elkartek ere. Besteak beste, salatu dute legez kanpoko botoekin bete dituztela hainbat hautetsontzi eta boto elektronikoen zenbaketa desitxuratu dutela Errusia Batuaren alde. Alderdi Komunistako zenbait goi agintarik, esaterako, ez dituzte onartu Moskuko boto elektronikoen emaitzak, eta protestara deitu zuten atzo, hiriburuaren erdigunean. Dmitri Novikov alderdiko Batzorde Zentraleko presidenteordeak protesta gehiago iragarri zituen astebururako Moskun eta herrialdeko beste eskualde batzuetan, «herritarren ahotsa entzun dadin».

Aleksei Navalni oposizioko politikari espetxeratuaren gertukoak ere kexatu dira. Gaitzetsi dute euren Telegrameko kanala eta sakelako telefonorako aplikazioak itxi zituztela joan den ostiralean, Moskuren presioen ondorioz. Navalniren kideek «boto taktikoa» emateko erreminta gisa sortu zituzten aplikazio eta kanal horiek. Haien bidez, boto emaileei jakinarazi nahi zieten zeintzuk ziren barruti bakoitzean Errusia Batuari irabazteko aukera handiena zuten hautagaiak, horien alde bozkatu zezaten.

Errusiako Gobernuak ukatu egin ditu iruzur akusazioak, eta hauteskunde «lehiakor, ireki eta garbiak» izan direla ziurtatu du. «Presioa» salatu du Kremlinek ere, baina AEBen eta Erresuma Batuaren aldetik. Bozen emaitzak zalantzan jartzeko ahaleginean aritu dira, haren esanetan.

Brusela ez dator bat Moskurekin. EB Europako Batasunaren iritziz, «ahots kritiko eta independenteen kontrako larderia giroan» egin dira Errusiako azken hauteskundeak. Peter Stano Europako Batzordearen Atzerriko bozeramaileak oposizioaren gaineko «errepresioa» salatu du.

Zeharka, Stanok erreferentzia egin dio Navalniren kasuari. Oposizioko buruzagia espetxean da urtarriletik, eta haren elkarte politikoak legez kanporatu zituen justiziak joan den ekainean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©LARA VILLALON

«Erdogan kritikatzen duten guztiak atxilotzen dituzte»

Lara Villalon

Abokatuaren esanetan, Turkiako Gobernuak legea baliatzen du bere eta estatuburuaren aurkako kritikak isilarazi eta beldurra zabaltzeko: «Ez dute nahi borroka egiterik eta jendea babesterik».

Italiako Barne ministro izandako Matteo Salvini eta haren abokatu Giulia Bongiorno, atzo, Palermon. ©IGOR PETYX / EFE
Turkmenistango presidente Gurbanguly Berdinmuhademov eta Italiako lehen ministro Giuseppe Conte. ©R. A. / EFE

Turkmenistan, COVIDik gabeko herrialdea

Alex Bustos

Berdinmuhademov presidenteak dio ez dutela koronabirus kasurik izan Turkmenistanen; hala ere, pandemiari aurre egiteko neurriak hartu dituzte, besteak beste herrialderako sarrera-irteerak mugatzea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.