Albistea entzun

BI AHOTSETARA

Bizitzaren 'beat'-a

Gorka Erostarbe Leunda -

2021eko maiatzak 16

Rodrigo Cuevasekin izandako solasaldiak kitzikatu dit garunkaxkoa. Irudikatu dut musika gosez, modernitate egarriz, Bartzelonara joandako ikasle gaztearen ilusio dirdaitsua. Eta hiritik herrixkarako itzuleran sentituriko kontrastea. Gogora etorri zaizkit beste molde batean baina ziur aski intentsitate antzekoz neure larrutan bizi izandako gaztaro goiztiarreko pasadizo zenbait, kontrastearen esperientziaren zakuan gordetakoak.

Bat bereziki.

18ak igaro berritan, Araozko (Oñati, Gipuzkoa) Ugaztegi auzoko erromeria festara joan nintzen, uztailaren 25arekin, Santiago egunez. 1997a izango zen. Baserri giroko eremua eta giroa, familiaren sustraiak. Goizean, egun argiz hasi zen festa, hamaiketakoa, bolo-jokoa, ermitako meza (adinekoentzat, batez ere), eta une sozial eta alegerosoena ondotik: trikiti emanaldia eta dantzaldia. Noren esku? Animatzen zen ororen esku. Musikari profesionalik ez, eskusoinua hartu eta jotzen zuen nahi-ahal zuenak, eta berdin dantza egin nahi zuenak. Ordurako rockaren soinu-estetikek harrapatu eta bezatuak gintuzten. Erromeria hark, ordea, bazuen zerbait kateatzen ninduena, ulertzen zaila zitzaidana. Bazkalosteko kantu eta dantzak luzatu egin ziren, baina haiek bukatu aurretik jaitsi nintzen Oñatira herio batean. Handik Zumarragara autobusez, dutxa azkar bat hartu, eta tren geltokira arrapaladan, bulkada ezin saihestuzko batek gidaturik, ilunarekin batera Ordiziako festetara joateko. Txosna-taberna-gaztetxean rigorezko egonaldiak egin eta herriko taberna musikazaleenera irrikaz, beheko solairuan musika elektronikoaren festa zegoela-eta. Housea, drum & bassa, technoa... Berria zitzaigunaren kitzikadura hura, xarma sentsuala. Dantza betean goizaldera arte.

Eta barrenean kontrastearen sentimendu oso indartsu bat; egun berean bi mundu hain urruneko, egunaren eta gauaren ifrentzuz, bizi izatearen desosegu estimulagarri paradoxikoa. Lagunei nola azaldu ez nekien, bi mundu-soinu haiek barrenean neramatzala, eta haien kontrasteak zerbait durduzagarri bezain magnetikoa eragiten zidala.

Califato ? taldeko kide bati entzun diot oraintsu irakurria: «Musika tradizionalak eta elektronikak beat bera dute, bizitza taupada bera». Balio izan dit.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Joaldun bat Ortzaizeko kabalkadan, irailaren 18an. ©PATXI BELTZAIZ

Kultur politikaren eraikuntzan

Joanes Etxebarria

Heldu den otsailaren 4an Euskal Elkargoan kultur politikaren proiektua bozkatuko dute. Proiektuak, eragileen rolak definituz, Euskal Kultur Erakundearena argituko du. Garapen Kontseilua, berriz, ondoko urteetako proiekzioa lantzen hasiko da oraidanik.
Clara Montero Tabakalerako Kultura zuzendaria, eta Ana Teixeira eta Oier Etxeberria erakusketaren komisarioak, atzo, hainbat artistarekin. ©MAIALEN ANDRES / FOKU

Begi bistakoa den armategia

Naroa Torralba Rodriguez

Gaurtik ekainaren 4ra bitarte, Evil Eye erakusketa dago Tabakaleran. Izaro Ieregi eta Azucena Vieites artisten lanak ditu, besteak beste. Jarduera programa bat ere izango du
Claudie Marcel-Dubois eta Maguy Pichonnet-Andral etnomusikologoak. ©Claudie Marcel-Dubois

Bigarren Mundu Gerlaren ondoko grabaketa batzuk, entzungai sarean

Iñaki Etxeleku - Ipar Euskal Herriko Hitza

Frantziako bi ikerlarik 1947an eta 1958an egin euskal kantu, bertso eta soinu grabaketak Interneten entzungai jarri dituzte berriki. Artxibo horiek gehienak aztertzekoak dira oraino.

Bertso Eguna, iaz, Izpuran. / ©Guillaume Fauveau

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...