Bide bizkorretik, hobe

Baskoniak ACB ligako finalerdietarako sailkatu nahi du gaur, Malagan Unicajari irabazita. Pedro Martinezek jokatzeko prest du talde guztia
Xengelia eta Granger, Nedovicen barneraketa bat oztopatzen.
Xengelia eta Granger, Nedovicen barneraketa bat oztopatzen. A. RUIZ HIERRO/ EFE

Ainara Arratibel Gascon -

2018ko maiatzak 29
Kirolbet Baskoniak gaur ebatzi nahi du Unicajaren kontrako ACB ligako final-laurdenetako kanporaketa, Martin Carpenan (19:45, Movistar Deportes 1). Batetik, ez ditu etxeko lanak hirugarren partidarako utzi nahi; eta, bestetik, horrela atseden gehiago izango ditu finalerdietarako. Hori sasoi amaiera honetan erabakigarria izan daiteke. Are gehiago Euroliga jokatuko duten taldeek izan duten egutegi betea kontuan hartuta.

Herenegun, Buesa Arenan, Baskonia 87-70 gailendu zen. Horrenbestez, kanporaketa alde du: 1-0. Arabarrek kontrolpean izan zuten lehia, baina azken laurdenean hortzak estutu behar izan zituzten, bisitariak lau puntura jarri baitziren. Orduan, Beauboisen eta Timmaren hirukoek lehia hautsi zuten. Hain zuzen ere, kanpoko jaurtiketak eta errebotea izan ziren partidako gakoak, eta gaur ere hala izan daitezke. Baita Vildozak eta Granger joko antolatzaileek norgehiagokaren erritmoa ezartzea ere. Hala egin zuten aurreneko lehian. Pedro Martinezen aburuz, lehen garaipenarekin«zama handia» kendu dute gainetik. «Jokalariek erakutsi duten izaera lehiakorra nabarmenduko nuke, eta oso ausart jokatu dutela. Sasoiko garai erabakigarrian gaude, eta, presioarekin eta beldurrarekin jokatuz gero, aukera asko dituzu galtzeko».

Gaurko lehiari begira, joko horri eustea espero du: «Defentsan hain zorrotz jokatuz gero, eta errebotea zaintzen badugu, aukera asko izango ditugu berriz irabazteko. Kanporaketa erabakita utzi nahi dugu».

Denboraldi honetan bost aldiz jokatuko dute elkarren aurka bi taldeek, eta guztietan Baskonia gailendu da. Gaurko partidari begira, talde guztia jokatzeko prest du Pedro Martinezek. Unicajan, berriz, ikusteko dago Waczynski hegalekoa nola dagoen. Izan ere, herenegungo partidan bihurritu egin zuen orkatila, Diopekin izandako lehia batean.

Baskoniak irabaziko balu, asteburuan jokatu luke finalerdietako lehen partida, Bartzelona- Andorra kanporaketako irabazlearen kontra. Herenegun, Andorrak ezustea eman zuen Bartzelonan irabazita (76-94), eta 0-1 dago kanporaketa. Galduz gero, berriz, arabarrek etzi jokatuko dute Buesa Arenan partida erabakigarria.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna