Durangoko Azoka «egokitua»

Koronabirusaren eraginez, zuzeneko emanaldi gutxiago eta bisitari kopurua kontrolatuagoa izango duen Durangoko Azoka bat antolatuko du Gerediaga elkarteak
Abenduaren 5etik 8ra egingo dute aurten Durangoko Azoka, eta Landako guneaz gain, webgunea izango da beste salmenta gunea.
Abenduaren 5etik 8ra egingo dute aurten Durangoko Azoka, eta Landako guneaz gain, webgunea izango da beste salmenta gunea. ARITZ LOIOLA / FOKU Tamaina handiagoan ikusi

Iñigo Astiz -

2020ko ekainak 30

«Durangoko 55. Azoka egin egingo da». Koronabirusaren ondorioz hedatu den ziurgabetasun egoerak bultzatuta, oinarrizko mezu argi hori ematera behartuta ikusi du bere burua Gerediaga elkarteak aurten. Hemendik abendura arte egoera asko alda daitekeela jakinik, protokolo eta neurri zehatzik ez dute jakinarazi oraindik, baina azoka «egokitua» izango dela iragarri dute: bisitari kopuru kontrolatua, zuzeneko emanaldi eta aurkezpen gutxiago, eta aurtengo nobedadeei eskainitako denda digital bat. Moldatuta, beraz, baina egin, egingo dela. Abenduaren 5etik 8ra, zehazki, eta TaupaDA! leloarekin. «Seguru gaude jendeak erantzungo duela. Guztiok egokitu beharko dugu».

Egoera «zaila» dela onartu du Nerea Mujika elkarteko lehendakariak. «Ezjakintasuna da nagusi. Inork ez digu ziurtatzen abenduan oraingo egoerari eutsiko diogun, hobeto egongo garen, edo beste itxialdi batean egongo garen». Baina, ezinbestean, egoera horretan egin beharko da azoka aurten, eta, horregatik, «etengabeko» harremanetan dabiltza azokaren parte diren gune, argitaletxe eta erakundeekin. Arantza Atutxa elkarteko kudeatzaileak esan duenez, haiekin «kontrastatuta» egin dituzte orain arteko urrats guztiak, eta hala egin nahi dituzte hemendik aurrerakoak ere.

Hasteko, laburragoa izango da aurtengo azoka. Berez, bost eguneko programa zuten buruan aurtengorako, baina lau egunera murriztu dute egitaraua. Lehen eguna kendu dute. Baina hori ere ez erabat. Abenduaren 4an azoka fisikoki itxita egongo den arren, Gerediagak formatu digitalera egokituko du ikastetxeentzako izan ohi den lehen eguneko programa. «Pilaketak ekiditeko».

Zuzeneko gutxiago

Hori da kezka nagusia, eta zuzeneko emanaldiei buruzkoa da galdera nagusia horregatik. «Denok gabiltza kezka horrekin», esan du Atutxak. Zalantzak dira nagusi oraingoz. «Zuzenekoak egitekotan, nola egin, zer edukierarekin, ohiko formatuan egitea komeni den edo bestelako formatu bat bilatu beharko den...». Edonola ere, aurten, azoka bisitatu, lagunekin elkartu eta sortzaileen sinadurak jasotzeko aukera eskainiko duen azoka bat da antolatzaileek buruan dutena.

Azokaren antolaketari ere eragingo diote egokitzapenek. Berez, zazpi gunek osatzen dute azoka, baina haien eskaintza ere moldatu egin beharko dela aurreikusten du Gerediagak. Atutxak eman du azalpena: «Guneak azokaren parte dira, eta egongo dira azokan; beste modu batera egongo dira, eta birtualera joango da programaren ehuneko handi bat. Ikusi beharko dugu zelan antolatu azokan bertan egongo diren emanaldiak. Baina protokoloak eta bestelakoak argitu arte, haiekin gabiltza elkarlanean».

Denda digitala

Zenbait argitaletxek jadanik baieztatua dute azokan izango direla, baina aurreko urteetan baino salmahai gutxiago egongo direla uste dute antolatzaileek. Irailean zabalduko dute aurten ere eskariak aurkezteko epea, eta, esan dutenez, oso litekeena da izen emateak ere sasoi horretan dagoen egoeraren araberakoak izatea. «Orain hitz bi ditugu denok ahotan», esan du Mujikak, «moldatu eta egokitu, egokitu eta moldatu. Eta azokara datozenak eta antolatzen dugunok hitz berberak erabiltzen baditugu, seinale ona dela dirudi».

Azoka martxan izango den egunetan denda digital bat ere jarriko dute azokaren webgune ofizialean. 2020ko nobedadeak bakarrik salduko dira denda horretan, eta azokak irauten duen egunetan soilik egongo da erabilgarri.

Ziurgabetasun orokortuaren erdian ere mezu «baikorra» eman nahi dute antolatzaileek aurtengo leloarekin. Horregatik hautatu dute TaupaDA! lelotzat. Esan dutenez, euskal kulturgintzak bizirik jarraitzen duela adierazi nahi dutelako.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Bi erizain, Galdakaoko ospitalean (Bizkaia) maiatzaren 6an, 55 egun gaixorik zeramatzan gizon bat sendatu zela ospatzen. ©ANDONI LUBAKI / FOKU

Koronabirusaren lehen kolpea Euskal Herrian: 2.152 hildako lau hilabetean

Mikel P. Ansa

Martxoaren 1etik ekainaren 30era, lau hilabete. Neguaren azken hondarra, eta udaberri guztia. Koronabirusaren pandemiak hankaz gora jarri du Euskal Herria, eta bizimoduak astindu ditu. Pandemiaren lehen olatuaren balantzea egin du BERRIAk, hamazazpi grafiko eta hamazazpi galdera hauekin.

Osasun langile bat pertsona bati PCR proba egiten, herenegun, Ordizian. ©Jon Urbe / Foku

58 dira Ordiziako agerraldiarekin lotutako kasuak

Iosu Alberdi - Irati Urdalleta Lete

Positibo emandakoek ezingo dute bozkatu Ordizian. Bai, ordea, haien kontaktu zuzenek. Araban beste foku bat izan den ikertzen ari da Osasun Saila, azken orduetan bederatzi kasu atzeman ostean.

Nafarroako Gobernuko Osasun kontseilari Santos Indurain. ©Jesus Diges / Efe

23 positibo detektatu dituzte Tuterako agerraldian

Igor Susaeta

Beste agerraldi bat gertatu da Iruñean, eta bost pertsona kutsatuta daudela baieztatu dute

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna