Albistea entzun

Super Amara Bera Berak ia irabazita dauka liga

Gijonen 23-36 irabazi eta gero, datorren larunbatean puntu bat ateratzen badu Elxen aurka Donostian, txapeldun izango da
Bera Berako jokalariak atzo, Gijonen, garaipena eta liga ia irabazia dutela ospatzen.
Bera Berako jokalariak atzo, Gijonen, garaipena eta liga ia irabazia dutela ospatzen. BERA BERA Tamaina handiagoan ikusi

Aitor Manterola -

2021eko maiatzak 2

Super Amara Bera Berak liga irabaztea ohitura bihurtu izanak ez du esan nahi ahuntzaren gauerdiko eztula denik. Ohiturarena ez da harrokeria, oraindik ez badu ere lortu zazpigarren titulua izango lukeena. Baina esku-eskura dauka: nahikoa izango du datorren larunbatean, etxean, Elxen aurka puntu ale bat ateratzea txapeldun izateko.

Kontuak gardenak dira: aurkari bakarra Rocasa du, eta zortzi puntuko koska dago Donostiako taldearen alde. Sei ditu jokoan Bera Berak, baina kanariarrek zortzi, eta horietako partida bat elkarren artekoa da, gainera —han jokatuko dute maiatzaren 14an—. Deskalabru bat izan behar luke Imanol Alvarezen taldeak liga ez irabazteko: hiru partidak galdu, eta Rocasa lauretan gailentzea eta Bera Berari average-a kentzea —Donostian, etxekoek irabazi zuten, 25-22—. Okerren bat behar luke larunbatean txapeldun ez izateko.

Jokatu egin behar dira partidak, eta irabazteko, ondo jokatu. Oinarrizko hori osatu beharko du Bera Berak Elxen aurka, eta, gauzak bere-berean joaten badira, arazorik ez luke izan behar garaile izateko. Elxek baino 11 puntu gehiago baititu oraintxe. Aldeak alde, atzo Gijonen jokatu zuen partidaren antzekoa izan daiteke datorren larunbatekoa. Aurkaria baino hobea izanda, erakutsi egin beharko du. Atzo hala egin zuen.

Aise bota zuen Gijon Bera Berak (23-36). Hamahiru golen aldeak ez du misteriorik. Talde hobea denak ondo osatu zuen egin beharrekoa, eta aurkariak ez zuen inolako aukerarik izan. Logika gailendu zen. Batez ere, bigarren zatian. Aurrenekoan ere bai, nahiz eta uneren batean etxekoak bi golera ere gerturatu ziren.

Datu honek ederki azaltzen du nolako aldea egon zen bi taldeen artean: partida osoan, beti egon zen aurretik Bera Bera. Esther Arrojeriak eta Eli Cesareok 0-2koa jarri zutenetik, aginte makila Imanol Alvarezen taldearentzat izan zen. Defentsa ona egitea eta erasoan azkar ateratzea Donostiako taldearen nortasunaren adierazgarririk onenak dira, eta atzo biak erabili zituen.

Aurreneko ordu erdian, hiruzpalau golen aldea izan zuen ia beti Bera Berak, eta erabakita utziko zuen partida etxekoen atezain Raquel Alvarezen lanagatik izan ez balitz. Erasoko eraginkortasuna bigarren zatiaren hasieran berreskuratu zuen: atsedenaldira 13-17 joan ziren, eta ondorengo hamar minutuetan, 0-8ko partziala egin zuen. Etxekoen bigarren zatiko lehen gola orduan iritsi zen. Gero, beste bost baino ez zituen sartu Gijonek. Bera Bera defentsan ondo aritu zela esan nahi du horrek. Horrenbestez, erraz irabazi zuen. Golegile onenak Cavo, Laura Hernandez eta Cardoso izan ziren, seina gol sartuta.

Zuazok mailari eutsi dio

Zubileta Evolution Zuazok Lehen Mailan jarraituko du datorren sasoian ere, atzo Kordoban irabazi izanak (23-30) hori bermatu baitio.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©FOKU

Zergatik izan da «ametsa»?

Aitor Manterola Garate

Denboraldi eskasa egitearen ondorioz jaitsi da Eibar Bigarren Mailara. Zelaian ez du ia ezertan asmatu, baina ardurak klub osora zabaldu behar dira.

Iñaki Artola, gaur, garaipena ospatzen Bilboko Bizkaia pilotalekuan. ©Aritz Loiola / Foku

Rezusta eta Artola, final-laurdenetara

Berria

Rezustak 14-22 irabazi dio Bengoetxea VI.ari, eta Artola 22-18 gailendu zaio Agirreri.

Bernal, gaur, Campo Feliceko gainean. ©Luca Zennaro / EFE

Etapa eta lidergoa Bernalentzat

Berria

Azken kilometroan eraso bortitza jo du kolonbiarrak, eta inork ezin izan dio eutsi. Bigarren Ciccone izan da, eta hirugarren Vlasov.

Baionako jokalariak Tolosan (Okzitania), atzo, garaipena ospatzen. ©Aviron

Baionako jokalariek 'Txoria txori' abestuz ospatu dute Tolosan lortutako garaipena

Paulo Ostolaza

Top14an mailari eusteko lehian dabil Aviron, eta ezusteko garaipena eskuratu du liderraren zelaian.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna