Albistea entzun

Sormena, laborategitik plazara

Tabakalerako ikus-entzunezko berritzaileentzako programako hiru prototipoak aurkeztu dituzte
Ezkerretik eskuinera, Sergio Arca, Pello Reparaz, Ander Iruretagoiena eta Jone Arriola, Tabakaleran.
Ezkerretik eskuinera, Sergio Arca, Pello Reparaz, Ander Iruretagoiena eta Jone Arriola, Tabakaleran. GORKA RUBIO / FOKU Tamaina handiagoan ikusi

Jakes Goikoetxea -

2021eko ekainak 6 - Donostia

Sormena badago. Ilusioa, zer esanik ez. Eta lanerako gogoa ere bai. Horren erakusgarri, Tabakalerako 2deo ikus-entzunezko laborategiak bultzatzen duen Prototipoak programako emaitzak. Gazteek gazteentzako euskaraz eduki berritzaileak sortzea da helburua. Iragan ostegunean aurkeztu zituzten prototipo izatera iritsi diren 2020ko deialdiko hiru proiektuak. Bi telesail eta norberari egokitutako bideoklipak sortzen dituen plataforma bat.

Abian da 2021eko deialdia. Ekainaren 15era arte aurkez daitezke proiektuak. Aukeratutako bost egitasmoek 2deoren laguntza jasoko dute, bai dirutan, bai baliabidetan, baita parte hartzaileek asko estimatzen duten aholkularien babesean ere.

JONE ARRIOLA
Emakume indartsuak 'Larrugorritan' telesailean

Jone Arriolak iaz bukatu zituen Ikus-entzunezko Komunikazio ikasketak, EHUren Leioako campusean (Bizkaia). Urtebete geroago, gradu amaierako lana telesail proiektuaren zero kapitulu indartsu bihurtu da, eta jende gehiago batu du egitasmora.

Larrugorritan izena du telesailaren proiektuak. Gazteen kuadrilla baten gorabeherak kontatzen ditu. Lau emakume eta gizon bat. Batek lan egiten du, eta gainerakoak ikasten ari dira, unibertsitatean eta lanbide heziketan.

Emakumeak dira protagonista. «Emakume indartsuak, ausartak eta ahaldunduak», zehaztu du Arriolak. Pentsatzen dutena esateko eta egin nahi dutena egiteko konplexurik gabeak: «Normalean emakumeetan ez dugu ikusten jarrera lotsagabea eta gainerakoek esaten dutena axola ez zaiena. Normalean halakoak ez daude ondo ikusiak, zatarrak direla esaten da... baina ez da hala». Horrelakoak dira Larrugorritan telesaileko protagonistak. Haien ahuldadeak ere islatu ditu Arriolak.

Arriola konturatu zen proiektu konplexua zela, eta laguntza behar zuela. Katz Estudioa ekoiztetxea sartu da proiektuan. Kapituluak eta gidoiak idazten ari dira, «diru laguntzetara aurkezteko eta ekoiztetxeen ateak jotzeko».

ZETAK
Norberari egokitutako bideoklipak

Zetak taldeko kideek sistema linbikoaren berri izan zuten duela urte eta erdi: «Geure buruan dagoen mekanismo bat da, subkontzienteki orotariko estimuluak ideia bihurtzen eta gordetzen dituena». Pello Reparaz Zetak proiektuko musikariarena da azalpena. Mekanismo horretan oinarrituta, hasieran bideoklip interaktibo bat sortu nahi zuten.

Baina 2deoko laborategia baliatuta, eta, Sherpa Ai enpresarekin abiatutako lankidetzari esker, emaitza beste bat da: «Sormena eta adimen artifiziala uztartzen dituen abesti eta bideoklip mugagabea», definitu du Reparazek. Zehatzago esanda, erabiltzaile bakoitzarentzat kanta bat eta bideoklip bat sortzen dituen plataforma bat, algoritmoetan oinarrituta.

Erabiltzailea plataformara konektatzean, konektatze hutsarekin, hari buruzko informazioa izango dute: gailua, kokapena, ordua, leku horretako eguraldia... Horrez gain, erabiltzaileak hautatu egin beharko du hainbat aukeraren artean: aldartea, musika mota, une horretan egin nahiko lukeena... «Horrekin guztiarekin», azaldu du Reparazek, «algoritmoak audio eta bideo pieza berezi hori sortuko du». Bakarra. «Parametro asko daude jokoan eta, batzuk oso antzekoak atera badaitezke ere, ia ezinezkoa da pieza bera ateratzea». Osteguneko aurkezpenean Reparazen ahotsarekin sortutako kanta beraren hainbat bertsio entzun ziren, hiru dimentsioko irudiekin osatutako bideoklipetan.

Proiektua aurreratuta dago, emaitzarekin pozik daude, baina Reparazek nabarmendu du «esperimentu hutsa» dela.

SERGIO ARCA ETA ANDER IRURETAGOIENA
'Nahiak', websailetik telesailera

Bazterkeria jasaten dutenei ahotsa emateko ahalegina da Nahiak. Emakume transexual bat da protagonista. «Hala ere, ez dugu ezberdintasuna nabarmentzen, ezaugarri bat gehiago da. Estereotipoak hautsi nahi ditugu, eta istorio unibertsal bat kontatu». Zuzendari eta ekoizle eragileetako bat da Ander Iruretagoiena.

Berez, websail bat izan behar zuen. «Baina gidoiak idazten hasi ginenean konturatu ginen istorio handiagoa behar genuela, beste estetika batekin eta kalitate handiagoarekin», azaldu du Sergio Arca La Traca ekoiztetxeko ekoizle eragileak. Horrek handitu egin du aurrekontua, eta Gehitu elkartea sartu da proiektuan. Hogei minutu inguruko kapitulu bat osatu dute. Telesaila telebistaren batean eskaintzea da haien helburua.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©ARITZ LOIOLA / @FOKU

«Musikan dena dut egiteko»

Gorka Erostarbe Leunda

Pandemiak apenas utzi dion 'Rueda' azken lana behar bezala aurkezten; Bilboko Euskeria abesbatzaz lagunduta kontzertua emango du etzi, Donostiako Viktoria Eugenia antzokian.
Haurrak lurperatzen zituzten eremuaren indusketa, Begoñako hilerrian. ©ARITZ LOIOLA / FOKU

Autopsia hilerri bati

Jakes Goikoetxea

Begoñako hilerria kendu eta parke bat egingo dute Bilbon. Aurretik, ordea, bertako hezurrak ateratzen, aztertzen eta sailkatzen ari da Aranzadi zientzia elkartea. Hilerriko gainerako elementuak ere aztertzen ari da. 'Begoñako Argia' izena du proiektuak.
 ©OSKAR MATXIN EDESA / FOKU

«Kritika egingo dugu, tokikotik globalera»

Urtzi Urkizu

Bilboko Seriesland jaialdian 'Zikings' animaziozko websailaren lehen atala proiektatu dute. Abenduan sarean izango dira ikusgai aurreneko bost atalak. Proiektua «monetizatu» egin nahiko lukete.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.