Albistea entzun

Ez dago loriarik lo gelditzen denarentzat

Champoussin nagusitu da Vueltako 20. etapan. Haig hirugarren jarri da, Lopez erretiratu ondoren. Roglic txapeldun izango da gaur
Clement Champoussinek irabazi zuen atzo Vueltako 20. etapa.
Clement Champoussinek irabazi zuen atzo Vueltako 20. etapa. MANUEL BRUQUE / EFE Tamaina handiagoan ikusi

Eñaut Agirrebengoa -

2021eko irailak 5

«Egon hadi lo, eta jango duk mehe». Esaera horren berri eduki izan balu, menturaz Vuelta podiumean bukatuko zukeen Miguel Angel Lopezek (Movistar). Ordea, arreta galdu zuen atzo, proba espainiarreko azken-aurreko etapan; noiz eta Adam Yatesek (Ineos) lasterketa apurtu zuenean. Atzean gelditu zen, eta, amorrazioaren poderioz, bizikletatik jaitsi eta lasterketa uztea erabaki zuen. Jack Haig (Bahrain) dago orain hirugarren. Australiarrak indartsuenekin batera egin zuen aurrera. Etapa, berriz, ez zuten haiek irabazi: elkarri begira geratu ziren azken igoeran, eta diru zorroa lapurtu zien Clement Champoussinek (Ag2r).

Zerra itxura zuen etaparen azken txanpak, bata bestearen atzetik igo behar zituzten bost mendaterekin. Hirugarren mailako Vilachan zen aurrenekoa, eta bertara 16 txirrindulari iritsi ziren buruan, ia hamabi minuturen aldearekin. Mikel Bizkarra (Euskaltel) izan zen ihes egin zuen euskal herritar bakarra. Maila handiko ziklistak zituen ondoan: Champoussin eta Lilian Calmejane (Ag2r), Romain Bardet eta Michael Storer (DSM), Ryan Gibbons eta Matteo Trentin (UAE), eta Mark Padun (Bahrain), besteak beste.

Gauzak bare ziren tropelean, harik eta Ineosek ekimena hartu zuen arte. Lasterketa nabarmen gogortu zen bigarren mailako Mabian. Belarriak tentetu egin zitzaizkien ihesaldikoei, aldearen erdia begi kliska batean galdu baitzuten. Berandu gabe hasi ziren elkarri oldartzen: Trentin jaitsieran saiatu zen, eta multzoa aletu egin zen Mougasen, mendaterik gogorrenean 9,8 kilometro eta %6,4ko pendiza.

Han piztu zen onenen arteko lehia ere. Ineos taldearen estutuari jarraipena eman zion Adam Yatesek, erasoari ekinez. Helmugarako 60 kilometro gelditzen ziren oraindik. Egan Bernal (Ineos) abiatu zen geroago, eta segidan, beste ahalegin bat egin zuen Yatesek. Saiatuaren saiatuaz, aurrera egin zuen britainiarrak, gurpilean Roglic, Enric Mas (Movistar) eta Gino Maeder eta Jack Haig (Bahrain) zituela. Komeriak, horrenbestez, Miguel Angel Lopezentzat (Movistar); estutu arren, ez zen kapaza izan aurkariekin berriro bat egiteko. Bernal ere atzean gelditu zen, baina, Yates aurrean zegoenez, Lopezen esku utzi zuen patata beroa. Etsiak erabat jo zion Movistarrekoari, eta Patxi Vila zuzendariak ezin izan zuen bere onera ekarri.

Roglicen multzoak harrapatu egin zituen pixkanaka iheslari guztiak, Gibbons izan ezik. Hegoafrikarrak Mougasen behera egin zuen eraso, eta Pradoko gaina gainditu ondotik, 1.30en aldearekin iritsi zen Castro de Hervillera, azken igoerara. Berehala gaineratu zitzaizkion oilarrak, baina haien arteko markaketak zabaldu egin zuen etaparen lehia. Erasoa jo, eta gelditu egiten ziren berehala. Bizkarra atzera eta aurrera eginez ibili zen, baina ezin izan zituen indartsuenak itsumustuan harrapatu; bai, ordea, Champoussinek. Sei segundo geroago helmugaratu zen Roglic, eta zortzira Yates eta Mas. Bizkarra zazpigarren izan zen, 23ra.

Roglicek bere hirugarren Vuelta irabaziko du gaur, Padron eta Santiago de Compostela artean jokatuko den 34 kilometroko erlojupekoan. Esloveniarra bera da saioa irabazteko faboritoa.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Alaveseko jokalariak, partidako gol bakarra ospatzen, Mamadou Loumek sartutakoa. ©DAVID AGUILAR / EFE

Arnasaldisakona

Eñaut Agirrebengoa

Alavesek bigarren garaipena kateatu du, Elxen aurka, Loumen gol bati esker. Jaitsieratik irten da behin-behinean
Rodrigo Salinas Bidasoako jokalaria, jaurtitzen, atzo. ©GORKA RUBIO / FOKU

Bidasoak lehen garaipena lortu du Europako Ligan

Berria

Irundarrek lehen zatian eginiko lanari esker irabazi diote Pfadi, Artalekun, ligaxkako bigarren jardunaldian: 32-28
Pilotari ematear. ©JON URBE / FOKU

Balantzaren desoreka, agerikoa

Mikel O. Iribar

Aspe azken urteetan daraman bolada ona berresten ari da lau eta erdikoan ere; hiru pilotari sartu ditu finalerdietan; Baikok, berriz, bakarra. Asteburuan jokatuko dira.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Eñaut Agirrebengoa

Informazio osagarria