Albistea entzun

Osasun onean da berriz

Jokatzeko era aldatu, eta azken partidetan suspertu egin da Osasuna. Alor guztietan izan du aurrerabidea: eraginkor dabil aurrean, eta sendo atzean. Hala jarraitu nahi du bihar, Sevillaren kontra, 21:00etan (La Liga).
Osasunako jokalariak, Budimirrek Levanteri sartutako gola ospatzen.
Osasunako jokalariak, Budimirrek Levanteri sartutako gola ospatzen. M. B. / EFE Tamaina handiagoan ikusi

Eñaut Agirrebengoa -

2021eko otsailak 21

Indar betean hasi du Osasunak bigarren itzulia. Irabazi egin ditu azken lau partidetatik hiru, eta, horri esker, zazpi postu igo ditu sailkapenean: hemeretzigarren iritsi zen lan erdietara, eta hamabigarren dago orain. Atzean utzi du garaipenik gabeko hamahiru partidako bolada, azken bi denboraldietan arrakastarantz eraman duen lehiakortasuna berreskuratuta. Jagoba Arrasatek aldaketak egin ditu arbelean, galdutako argitasunaren eta orekaren bila, eta bete-betean asmatu du. Atzelariak sendo dabiltza; erdilariak, eroso; eta aurrelariak, eraginkor. Horiek horrela, gorritxoak edonori irabazteko gai sentitzen dira orain. Gainera, zortea ere irribarre egiten hasi zaie. Hots, goitik behera aldatu dira Nafarroako taldearen joera eta egoera.

AURRELARI BAT GUTXIAGO...

Osasuna gozakaitz zebilen bi aurrelariko sistemarekin. Gorritxoen jokoa oso erraza zen aurreikusten, baloiak behin eta berriro jokatzen baitzituzten luze, aurrelarien garaiera baliatu nahian. Hori horrela, Arrasatek lema biratu zuen Elxen zelaian, puntan jokalari bat kenduz eta zelai-erdian bat gehiago ipiniz. Hobekuntza agerikoa izan da geroztik: azken hamar partidetatik bi baino ez dituzte galdu nafarrek. Jokoak zentzua berreskuratu du, irmotasuna eta kontraerasoak erdigunean jarrita. Torroren itzulera funtsezkoa izan da plan berria gauzatzeko, aingura gisa egonkortasun handia ematen baitio taldeari. Euskarrian hura izanda, beste erdilariek askatasun handiagoa dute presioa aurreratzeko eta erasora batzeko. Gorritxoak gehiago ari dira jokatzen motzean, eta hobe jarduten dute horrela, baloikaden bidez baino.

...BAINA GOL GEHIAGO

Zelaian den aurrelari kopuruak ez du zertan baldintzatu talde batek golak sartzeko duen gaitasuna. Kontrara, Osasuna jo handiagoa ari da izaten puntan jokalari bakarra duela, eta aurrelariak gehiago ari dira gozatzen bakarka. Callerik erruz egiten du lan, baloi bakoitza azkena balitz bezala borrokatuz, eta golak nahiko sarri ari da sartzen: hiru sartu ditu jokatu dituen azken zortzi partidetan. Ez dira zifra makalak, baina are hobeak dira Budimirrenak. Kroaziarrak baloi bat sareratzen du 126 minutuan behin, eta azken lau partidetan sartu dituen lau golek bederatzi puntu eman dizkiote taldeari. Konexio berezia ezarri du Kike Barjarekin: lau gol horietatik bitan noaindarrak eman dio azken pasea.

IRMOAGO ATZEAN

Osasunari puntu askok egin diote ihes defentsan eginiko akatsen eraginez. Gorritxoen atzeko lerroa hauskorregia izan da neurketa askotan, eta gutxirekin min handia egin diote aurkariek. Alabaina, arazo hori konpontzen ari da pixkanaka. Lerroak asko aurreratuta jokatu izan du Arrasaterekin, baina orain atzerago ari da defendatzen, goian noizbehinka presio egiten duen arren. Defentsek geroz eta segurtasun handiagoa igortzen dute, eta Aridaneren berragerpenak are gehiago irmotu du nafarren atzeko lerroa. Kanariarrak goitik ia gaindiezina den bikotea osatzen du David Garciarekin. Bestalde, Nacho Vidal bere onera ari da itzultzen, eta Juan Cruz neurria ari zaie hartzen taldeari eta mailari. Atepean, berriz, geldiketa erabakigarriak ari da egiten Sergio Herrera.

HAIZEA ALDE DU ORAIN

Gurpil zoroan sartuta egon dira gorritxoak. Konfiantzarik ez zuten apenas, eta zoritxarra erakartzen zuten behin eta berriz: golak unerik mingarrienetan sartzen zizkieten, epaileen erabakiek usuki kaltetzen zituzten… Bazirudien mirari bat behar zutela partida bat irabazteko. Bada, Granadaren kontra apurtu zuten dinamika hori, eta Eibarren eta Levanteren aurkako garaipenek joera aldaketa berretsi dute: Gipuzkoarren kontra, azken hatsean sartu zuten garaitzeko gola, eta ezerezetik hiru puntu atera zituzten Levanteren zelaian. Sareetara bidali zuten erasoan sorturiko aukera bakanetako bat, eta, gero, Sergio Herrerak gelditu egin zuen Juan Cruzek eragindako penalti inozoa. Lehen, neurketa hori ez zuketen inolaz ere irabaziko, baina haizea alde dute orain.

ERIZAINDEGIA HUSTEN

Gainera, lesioen izurria ere ari dira gainditzen, luzerako min hartutako jokalariak osatzen ari baitira apurka. Brasanac, adibidez, prest egongo da biharko norgehiagokarako, bi hilabetez zelaietatik kanpo egon ondoren, eta Jony ere berandu gabe itzuliko da lehiara. Bestalde, Chimy Avila hasia da gainontzeko taldekideekin batera lan egiten; Roncagliak eta Ruben Martinezek itxaron egin beharko dute oraindik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Zabaleta eta Elezkano, dronetik txapelak hartzen. ©Aritz Loiola / Foku

Elezkano II.a-Zabaleta jaun eta jabe izan dira finalean

Berria

Zabaletak partida ikusgarria jokatu du, eta txapelketako pilotaririk onenaren saria eman diote. Hirugarren txapela lortu du Binakakoaren finala irabazita. Elezkanok, berriz, bigarrena.

Recio, golaren penaltia jaurtitzen, Getafen. ©Mariscal / Efe

Eibarrek itxaropena lortu du, azken unean egindako gol bati esker

Berria

Reciok egin du gola, penaltiz, 89. minutuan. Partidan ez da aukera askorik izan, bi taldeak oso zuhur aritu baitira.

Athleticen eta Realaren arteko derbia, Lezaman. ©Aritz Loiola / Foku

Athleticek luzapenean irauli du markagailua, Oihanek partida piztu eta gero

Berria

Bi taldeek ez dute aise asmatu gola egiten. Reala 82. minutuan aurreratu da, eta atzetik beste bi egin ditu Athleticek, minutu gutxian emaitzari buelta emanez.

Super Amara Bera Berako kideak, liga irabazi izana ospatzen, atzo, Donostiako Gaska kiroldegian. ©JON URBE / FOKU

Bera Berak zazpigarrenez irabazi du Espainiako Liga

Julen Etxeberria

Bera Berak 30-20 hartu du mendean Elx Donostian, eta zazpigarrenez irabazi du Espainiako Liga. Hogeigarren titulua du, hamabosgarrena azkeneko hamar urteetan

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.