Antxeta irratia Hegoaldeko lau hiriburuetan entzungo da gaurtik

Euskal Irratietako zuzeneko saio nagusiak emitituko dituzte lau hirietan, legezko frekuentzietan

Antxeta irratiaren estudioaren irudi bat, Hendaian.
Antxeta irratiaren estudioaren irudi bat, Hendaian. AURORE LUCAS

Urtzi Urkizu -

2019ko abenduak 1

Lapurdiko, Nafarroa Behereko eta Zuberoako gaien inguruko informazioa Bilboko, Gasteizko, Iruñerriko eta Donostialdeko uhinetan zabalduko da gaurtik aurrera. Antxeta irratiak legezko frekuentziak lortu ditu hiri horietan emititzeko, eta Antxeta2k ofizialki gaur du estreinaldi eguna.

 

Antxeta euskara hutsezko irrati komunitarioa da, 2002an sortu zuten, eta Bidasoa Beherea eskualdeko (Gipuzkoa-Lapurdi) emisora da (Hondarribia, Irun, Hendaia, Biriatu eta Pausu). Beran ere (Nafarroa) entzuten da. Euskal Irratien federazioko parte da.

Antxetak irrati lizentzia bat lortu zuen Eusko Jaurlaritzak deitutako lehiaketan, 2012an. Orain, Antxeta2 sortu dute, Euskal Herriko zazpi lurraldeak hurbiltzeko eta batzeko. Euskal Irratietako irratsaio nagusiez osatuko da programazioa, eta horren emisioa entzun ahalko da Hego Euskal Herriko lau hiriburuetan. Aitziber Zapirain Antxetako koordinatzaileak nabarmendu du Ipar Euskal Herriko informazioa jasoko dela modu zuzenean. «Donostialdeko frekuentzia onespenaren ostean, garapen prozesu batean sartu ginen, eta jauzi bat egitea erabaki genuen».

Zapirainek aitortu du Bilboko, Gasteizko eta Iruñeko frekuentziak lortzeko prozesua luzea izan dela. «Baina frekuentziak legez eskuratuak ditugu, eta dena prest dugu emititu ahal izateko».

Radiokultura eta Arrosa

Bilbon, Gasteizen, Iruñerrian eta Donostialdean Antxeta irratia sintonizatzen duten entzuleek askotariko emankizunak jasoko dituzte: batetik, Euskal Irratietako —Antxetarekin batera, Gure Irratia, Irulegiko Irratia eta Xiberoko Botza— saio garrantzitsuenak entzun ahalko dira; bestetik, Internet bidezko Radiokultura irratiarekin akordio bat egin dute, eta haren emankizun batzuk ere emitituko dituzte; eta Arrosa sareko Zebrabidea magazina ere —astegunetan, 16:00etatik 18:00etara— emitituko dute Antxeta2n.

«Iruditzen zitzaigun behar bat zegoela Ipar Euskal Herriko informazioa Hegoaldera modu zuzenean iritsarazteko», azaldu du Zapirainek. «Lapurdiko, Nafarroa Behereko eta Zuberoako informazioa modu ahalik eta naturalenean iritsiko da. Programazioaren ehuneko handi bat zuzenekoa izango da, gainera».

Antxeta2ren sorrera eta Euskal Irratien saioak Hego Euskal Herrira zabaltzeak premia bati eta dialaren inguruko azterketa bati erantzuten dio. Eusko Jaurlaritzak irrati lizentzien lehiaketa 2011n martxan jarri zuenean, Antxeta irratiak hausnarketa bati heldu zion. «Gogoeta bat egin, eta ikusi genuen saiatu behar genuela frekuentzia mundua edo diala ahalik eta gehien euskalduntzen, nahiz eta irrati konbentzionalen eta publikoen baldintza beretan ez aritu». Lehiaketak ez zion hirugarren sektoreari, irrati komunitarioei, modu esklusiboan esleipenak lortzeko aukerarik eman. «Baina gu gisa berean lehiatu ginen, diala ahalik eta gehien euskalduntzeko. Dena den, gu ez goaz inorekin lehiatzera, ez inori lana kentzera. Elkarlanean aritu nahi dugu guztiekin».

Antxeta irratiak agintariei eskatu die egun Hego Euskal Herrian dauden 30 irrati komunitarioen egoera konpontzeko urratsak egiteko, «legez kanpo lan egitera beharturik daude-eta».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Urtzi Urkizu

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna