Ziurgabetasun beteko derbia

Alavesek eta Realak nork bere kezkak eta zalantzak uxatzeko asmoz abiatuko dute gaur urteko lehendabiziko partida (18:30, Movistar La Liga). Bi taldeek bolada eskas bati amaiera ematea dute xede Mendizorrotzan jokatuko duten derbian. Etxeko taldeak du presarik handiena; jaitsiera postuetan dago, eta haietatik aldendu nahi du ahalik eta lasterren. Jose Luis Mendilibar fitxatu dute horretarako, eta Zaldibarko prestatzaileak gaur egingo du lehen saialdia. Mendilibar gaur eseriko da lehen aldiz Mendizorrotzako aulkian, eta hiru puntuak eskuratzea du xede: «Argi izan behar dugu. Jaitsierako postuetatik ateratzea gure egin beharra da, eta inork ez digu ezer oparituko».

Teknikari aldaketa baten osteko ziurgabetasuna da Alavesena; Realarena, aldiz, oso bestelakoa da. Txuri-urdinek koronabirus positibo ugari izan dituzte azken egunetan, eta horrek erabat baldintzatu du oporren osteko entrenamenduetako jarduna. Lehen taldeko jokalari kopuru murritzarekin aritu da Imanol Alguacil, baina entrenatzaile oriotarra ohi duen eran mintzatu da, eta hori ez dela aitzakia izango ohartarazi du derbiaren aurreko prentsaurrekoan: «Hiru lagun faltako ditut, koronabirusarengatik».

Realak ere garaipen gosez ekingo dio neurketari. Ez alferrik, iragan hilabetean ligako partidarik ez du irabazi, eta hori lasta izan du sailkapenean. Aurrez eskuratutako tarte zabala murriztu egin zaio, eta berriz ere puntuak pilatzea du asmo, Europako lehia betean abantailarekin segitzeko.

Realak Europarako sailkatzeko lehian segitu nahi du, baina Imanolek ohartarazi du Alaves «suspertuta» ariko dela: «Indartuta ariko dira. Orain gutxi hasi da, baina Mendilibarren taldea izango da. Ez dio axola zer sistema duten; badakigu noiz eta nola presionatzen duten».

Imanolek, beraz, goratu egin du Mendilibarren eta haren taldearen jokoa, nahiz eta orain artean behea jota egon den. Zaldibarko teknikariaren esanetan: «Presarik gabe baina pausarik gabe aritu beharko dugu».

Mendilibarrek, kontrara, Reala arerio zaila izango dela aurreikusi zuen. Teknikari bizkaitarrak azaldu zuenez, Realari kontra egitea zaila izango da Alavesentzat, baina horretan asmatzea gako izango da partidari zukua atera ahal izateko. Prestatzailea ez da Realaz fio: «Sasoian zehar, eduki ditu sei edo zazpi lesionaturen tarteak, eta hala ere, irabazi egin du. Bat eginda jokatzeko estiloa du, multzoan, eta halakoetan ez dira antzematen min hartutakoak». Txuri-urdinen entrenatzailearen iritziz, bestelakoak «aitzakiak» dira.

Aitzakiak ala ez, bi taldeek irabaztea beste xederik ez dute izango. «Presarik ez, eta pazientzia behar dugu», azaldu du Mendilibarrek.

Imanolen esanetan, berriz, garaipen batek «ikaragarri» suspertuko luke donostiarren saialdia. Taldearen suhartasuna jarri zuen horren adibide: «Badakizue gazte horiek nolakoak diren. Batzuetan, ezer gabe igarotzen dituzte halakoak. Geureak gozarazten ari dira, maila ikaragarri ona ematen, eta izugarri harro nago haien entrenatzaile izateaz».

Oriotarra asmatzen ari da Reala zuzentzeko garaian. Gauza bera egin nahi du Mendilibarrek ere: «Sentipena da taldea geroz eta hobeto ari dela. Lehen egunean igarri nuen erritmo falta, baina prestatuta egon gara hurrengo egunetan».

Era batera edo bestera, derbi batek izan ohi duen gatza izango du gaurko norgehiagokak. Alavesek eta Realak, biek dute puntuen premia. Arabako taldearen kasuan, jaitsierako postuetatik ateratzeko; Gipuzkoakoaren kasuan, berriz, Europarako lehian indartuta segitzeko.