Aurpegi saltzaileak

Interneten aroan, salgaia da pertsonei buruzko informazioa. Pertsonen aurpegien irudiak ere bai. Ameriketako Estatu Batuetako Clearview AI enpresak Google, Youtube (Googlerena da), Facebook, Twitter, LinkedIn (Microsoftena da), Venmo (Paypalena da) eta milioika webgunetako pertsonen aurpegien irudiak erabili ditu, datu base erraldoi bat osatu eta poliziei aurpegiaren bidezko identifikazio zerbitzuak saltzeko.

Konpainia horietako gehienek gutunak bidali dizkiote Clearview-ri, eskatuz beren webguneetako irudiak erabiltzeari uzteko eta irudiak erabiltzeko moduari buruzko informazioa igortzeko. Twitterrek datu guztiak ezabatzeko eskatu dio. Oraingoz ez dute esan kasurik egiten ez badu auzitara joko duten edo ez.

Clearviewk 3.000 milioi irudiko datu base bat sortu du. Pertsonak identifika ditzake, haien irudiak datu basekoekin alderatuta. Ez du zuzenean pertsonaren izena ematen, baina haren beste irudi batzuk eta irudien loturak eskaintzen ditu, Interneten lortutakoak. Horrela, pertsona hori non, nola eta norekin zebilen edo dabilen jakin dezakete. Gainera, poliziak bilatzen ari den jendearen irudiak gehitzen dituenez, datu basea hazten ari da.

Emaitzek %99,6ko zehaztasuna dute, Hoan Ton-That enpresako zuzendari nagusiak CBS telebistari azaldu dionez. Ez dago, ordea, baieztapen hori egiaztatu dezakeen azterketa independenterik. Gaizkileak identifikatzeko eta ikerketarako soilik erabiltzen dela gehitu du, «gertakari edo krimen baten ondoren», ez jendearen jarraipena edo zaintza egiteko.

Lehen Zuzenketa

Enpresaren jokabidea zuritu du, esanez AEBetako Konstituzioko Lehen Zuzenketak eskubidea ematen diela datu publikoak eskuratzeko: «Gure sistema eraikitzeko egin dugun gauza bakarra izan da publikoa zen informazioa hartzea eta indexatzea. Googlek webgune ezberdinetako informazioa bildu dezake. Beraz, informazio hori publikoa baldin bada eta Googleren bilaketa bilatzailearen barruan egon badaiteke, gurean ere bai».

Clearviewk berak emandako datuen arabera, 600 polizia agentziak baino gehiagok erabiltzen dute haien softwarea: hirietako poliziek, FBI Ikerketa Bulego Federalak, Segurtasun Nazionaleko Departamenduak... CBSren arabera, Chicagoko Poliziak 50.000 euro ordaintzen ditu bi urteko kontratu batengatik.

Clearviewk bere sistemaren eraginkortasuna azpimarratu du, abantailak erakusteko. Adibide bat eman du: Indianako Poliziak hogei minutuan argitu zuela kasu bat haien teknologia baliatuta.

The New York Times egunkariak argitaratu zuen Clearviewren jardunari buruzko albistea, urtarrilaren 18an. Kashmir Hill The New York Times-eko kazetariak, enpresa ikertzen ari zela, polizia batzuei eskatu zien bere argazkia sartzeko Clearviewren aplikazioan. Handik gutxira, polizia horiek Clearview enpresako ordezkarien deia jaso zuten, galdezka ea kazetariekin hitz egiten ari ziren. Alegia, Clearviewk, poliziei tresna eskaintzeaz gain, noren bila ari diren ere kontrolatzen du.

Ton-That Clearviewren buruak Kashmir Hilli esan zion bere argazkiak alarma jo zuela, aplikazioak seinalatu egiten dituelako «balizko bilaketa okerrak».

Interneteko sare sozial erraldoien eta Clearviewren gatazkari, dena den, zozoaren eta belearen esaera aplika dakioke, batzuek eta besteek ipurdia beltza baitute. Erabiltzaileei buruzko informazioa da sare sozial horien aberastasuna. Iazko urte amaieran jakin zen Facebookek bere erabiltzaileei buruzko informazioa eman ziela bere bazkideei eta Facebooken publizitatea jartzen zutenei, batez ere 2011. eta 2015. urteetan.

Aurtengo urtarrilean bertan, Facebookek Illinoisko erabiltzaileei 550 milioi dolar ordaintzea onartu du (504 milioi euro inguru), erabiltzaileei haien argazkietan ageri diren beste pertsonen izenak proposatzen dizkielako, aurpegiak identifikatzeko softwarea erabiliz. Horrek urratu egiten du pribatutasun biometrikoari buruzko Illinoisko lege bat, eta, Facebookek akordioaren alde egin du bere kontrako auzi eskea aurkeztu dutenean.