Albistea entzun

Kroketazko mokaduak

Urtzi Urkizu BERRIAko kazetariak podcast bat ondu du: 'Kroketak'. Eta osagai ezberdinak nahastuz egin du: elkarrizketak, kolaborazioak, bertsoak eta poesia errezitalak, besteak beste.
Urtzi Urkizu kazetaria, kroketa pare bat hartuta. Halaxe izena du bere podcastak: <em>Kroketak</em>.
Urtzi Urkizu kazetaria, kroketa pare bat hartuta. Halaxe izena du bere podcastak: Kroketak. E. TELLERIA SARRIEGI Tamaina handiagoan ikusi

Enekoitz Telleria Sarriegi -

2022ko ekainak 5 - Hernani

«Ezin zara mundu guztiaren gustukoa izan. Ez zara kroketa bat. Urtzi Urkizu naiz, eta hemen topatuko nauzue». Horixe dio egileak bere podcasta aurkezteko egindako lehen hitzartzean, eta horrek biltzen du egiten duenaren funtsa. Kroketazko mokaduak balira bezala osatu ditu Urtzi Urkizu BERRIAko kazetariak (Lezo, Gipuzkoa, 1975) bere kroketak: bexamel saltsa berbera dute oinarrian, baina ezberdinak dituzte osagaiak eta lanketa.

Ez da gastronomiari buruzko podcast bat, baina izan zitekeen. Are gehiago, kroketei buruzko pare bat atal ere badaude. Gehiago da podcast pertsonala, maiztasun jakinik gabea, nahasten dituena egilearen hausnarketak eta elkarrizketak, kolaboratzaileen jarduna, eta poesia errezital musikatuak, besteak beste. «Kasualitatez» sortutakoa dela dio egileak. «Oarso Bidasoko Hitza-n kolaboratzen ari nintzen garaian, idatzi nuen azken testua eta ohartu nintzen banuela gogoa ahoz gora botatzeko Lezoko eta Euskal Herriko gazteen alde idatzitako testu aldarrikatzaile hura. Pentsatu nuen grabatzea. Banekien audio hura Interneten jarriko nuela, baina, behin hura jarrita, podcastaren ideia sortu zitzaidan. Jakin gabe kroketen bexamelean zer joango zen», azaldu du, nola ez, kroketa egin berriak aurrean dituela.

Hamar minutuko kroketak

Hamar bat minutuko aleak dira, eta Spotify eta Ivoox plataformetan daude entzungai. Iazko abendukoa da egileak aipatutako lehenengo hura, eta maiatzaren 31koa azkena —Miguel Arrozpide bolariari egindako elkarrizketa—. «Audioak eta formatu honek aukera ematen du norberak gogoko dituen gauzak sartzeko. Beti gustatu izan zait poesia errezitatzea, lanetik kanpo ere elkarrizketa luzeak egitea... formatu honek ez dit kezkarik sortzen, ez dit dirurik inoiz emango, eta neronek erabakitzen dut noiz eta norekin edo zerekin egin. Askatasun erabatekoa daukat, eta sortzeko prozesua ere erraza da».

Urte askotako eskarmentua dauka kazetaritzan, eta horrek ere asko lagundu diola dio: «Kultur arloko jendea ezagutzeak aukera ematen dizu kolaborazioak eskatzean baiezkoak jasotzeko —ez dut oraindik ezezko bakar bat ere jaso—, eta eskertu behar diet hori parte hartu nahi izan duten guztiei».

Ez ditu gaiak gaitegi jakin baten arabera aukeratzen, edo elkarrizketak gidoi jakin baten inguruan osatzen: «Jakiten dut nondik nora joango naizen, baina elkarrizketari bere bidea egiten uzten diot». Eta badago pieza horietan «edizio lan» bat ere: «Baina ez da berdina Joxan Goikoetxearekin bere estudio profesionalean grabatzea —halaxe egin nuen Lizardiren olerkiei buruzko pieza, Goikoetxeak propio sortutako musikarekin—, edo elkarrizketa bat telefonoz grabatu eta grabatu den moduan jartzea». Eta hor agertu dira berriz ere kroketak: «Egun batzuetan denbora gehiago pasatzen duzu haiek egiten, eta, beste batzuetan, azkarrago biltzen dituzu».

Urkizu «oso pozik» dago podcastak orain arte izan duen harrerarekin. Jakitun dago Whatsapp talde batzuetan zabaldu direla «kroketa batzuk», Euskal Idazleen Elkarteak ere jarri dituela batzuk bere webgunean, Booktegia-k ere bai berean, eta Euskalerria Irratian ere baliatu dutela besteren bat. «Hori oso polita da. Ez da nire asmoa kroketak irratiko uhinetan zabaltzea, baina libre daude. Nahi duenak har ditzala zabaltzeko. Ez diet salaketarik jarriko [barrez]».

Ongi ezagutzen duenez, irrati, audio eta podcast mundu hori «oso garai onean» dagoela dio Urkizuk. Gogoan du Gorka Juliok bere etxean egiten zuena izan zela berak ezagutu zuen euskarazko lehen podcasta: «2005ean zen hori. Orduan inork ez zekien zer zen ere. AEBetako kontu bat zen, eta garai hartan ez zen batere zabaldu hemen. Orain bai, eta asko. Oso formatu egokia da».

Eta kroketak ere onartzen ditu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jon Goenaga eta Libe Goenaga aita-alabek zaintzen dituzte Getariako (Gipuzkoa) Lahardi baserriko ahuakate ondoak. Euskal Herriko lehenak izan dira. ©Jon Urbe / FOKU

Ahuakate ondoak kateatu dira Euskal Herrian ere

Ainize Madariaga

Ahuakate ondoen ekoizpena zalu hedatzen ari da Euskal Herrian. Getariako Lahardi etxaldean duela hiru hamarkada hasi ziren; berrikiago bertze guziak. Bertako klimari eta lurrari ongi egokitzen zaie zuhaitza, baina arta bereziak behar ditu, sustut neguko malda igaiteko.

 ©JON URBE / FOKU

«Begien osasuna eta pobrezia lotuta daude»

Jakes Goikoetxea

Ikusmen arazoek bizimodua baldintzatzen dute, are gehiago herrialde pobreetan. Arazo handia eta larria da herrialde askotan. Errealitate gordin hori ikusarazten eta laguntza lortzen aritzen da Otaegi.
 ©BERRIA

Ohiko albisteetatik ihesi

Iker Tubia

Reuters institutuaren arabera, geroz eta jende gehiagok erabakitzen du gaurkotasuna albo batera uztea. Eragin psikologikoa, nekea, konfiantza falta eta ezintasun sentsazioa aipatu dituzte albisteetatik deskonektatu direnek.

 ©JAGOBA MANTEROLA / FOKU

«Aro berria hasi dugu, salto digitala emanez»

Olatz Silva Rodrigo

Euskalerria Irratiak denboraldi berriari ekin dio. Iruñerriko euskal komunitateari zerbitzurik onena eskaini nahian, salto digitala eman dute. Besteak beste, kamera adimendunak jarri dituzte estudioan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...