Albistea entzun

Pentsio duinen alde, etenik ez

Ehunka lagun bildu dira Baionan erretreten erreformaren kontra. 25 egun daramatzate greban
Erretreten erreformaren aurka egin zuten martxa, atzo, Baionako karriketan.
Erretreten erreformaren aurka egin zuten martxa, atzo, Baionako karriketan. BOB EDME Tamaina handiagoan ikusi

Oihana Teyseyre Koskarat -

2019ko abenduak 29 - Baiona

Hogeita bost. Horiek dira greba hasi denetik pasatu diren egunak. Opor eta besta giroak ez du baretu Frantziako erretreten erreformaren aurkako haserrea. Sei protesta jendetsu egin dituzte hilabete hasieratik. Ez dute horretan gelditzeko asmorik, protestekin hasiko baitute urte berria. Manifestazioa intersindikala izan zen, eta eragileen babes zabala lortu zuen Ipar Euskal Herrian. LAB sindikatuaz gain, ELB eta Bizi ere batu ziren deialdira. Antolatzaileen arabera, 2.000 pertsona inguru bildu ziren. Baionako geltokitik hasi zen protesta eta Departamendu Kontseiluan bururatu zen, bertan lan egiten duten langileak hunkitzeko asmoz.

Eguberri garaia dela-eta, mobilizatzen segitzea «ezinbestekoa da», Peio Dufau trenbideetako langilearen ustez. «Egunero elkartzen gara, greba bozkatzeko, mugimenduaren segida antolatzeko, ekintzak prestatzeko... Grebak ez du etenik». Protesta ahalik eta jendetsuena izateko, larunbatez egitea deliberatu zuten sindikatuek —orain arte astearte eta ostegunetan atera dira kalera—.«Ezin dute denek greba egin astean zehar; larunbatez mobilizatzea parada da jende horrentzat etortzeko», zehaztu du trenbideetako langileak. Atzoko manifestazioaren giroa goraipatu du: «Familiak ere etorri dira, eta hori oso garrantzitsua da. Erreforma horrek gaur egungo haurrak hunkiko ditu. Denek elkarrekin segitu behar dugu borrokan».

Manifestazioaren aurretik, geltokiaren atarian, trenbideetako langileek batzarra egin zuten, eta aho batez erabaki zuten greban segitzea. 25. greba eguna beteko dute gaur, abenduaren 5az geroztik mobilizatuak direlako. 1995. urteko «greba mugimendu historikoarekin» alderatu dute aurtengo mobilizazioa. Urte hartan ere erretreten erreformaren harira mobilizatu ziren langileak. «Oraingo greba gehiago irauten ari da eta segitzeko prest gaude», esan du FO sindikatuak manifestazioaren ondotik.

Jadanik iragarri dute ondoko egun eta asteetan mugimenduak segituko duela. Bihar, blokeatze ekintza bat eginen dute Baionan, goizean goizetik. Argitxu Dufau LABeko bozeramaileak esan du «ekonomia blokeatzea» eraginkorra dela, «zuzenean patronala hunkitzen» duelako. Joan den astean Miarritzeko autobideko ordainlekua ireki nahi izan zuten, baina Dufauk salatu du «Poliziak interes ekonomikoak babestu» zituela, ordainlekuak blokeatuz, ekintzaileen helburua ordainlekua «eskaintzea» zelarik.

Komunikazioaren gerra

Gobernuak Eguberri garaian «eten bat» eskatu zien grebalariei, bestak ez «funditzeko». Peio Dufauk Frantziako Gobernuaren komunikazio operazioa gaitzetsi du: «Gobernua saiatzen da gure mugimendua gutxitzen, eta iritzi publikoa aldarazten». Argitxu Dufauk harekin bat egin du: «Macronek sinetsarazi nahi du grebaren falta dela Eguberriz garraiorik ez izatea. Baina ez da tronpatu behar. Haiek dute egutegi hori aukeratu, nahiz eta jakin mugimendu handi bat sortuko zela».

Trenbideetako langileak, bestalde, Emmanuel Macronen «probokazioa» salatu du. Izan ere, Frantziako presidenteak bere pentsioari uko eginen ziola iragarri zuen. Dufauren ustez, «zinez ageri da ez garela mundu berean bizi. Guk ezin diogu uko egin gure 1.000 euroko erretretari».

Frantziako Gobernuak datorren asteartean, urtarrilaren 7an, egingo du hurrengo negoziazio bilera sindikatuekin. Intersindikalak iragarri du heldu den manifestazioa urtarrilaren 9an izango dela, Baionan. Anartean, trenbideetako langileek greban segitzea aurreikusten dute.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Langile publikoen protesta bat, aurreko urtean. ©RAUL BOGA / FOKU

LABek ere mobilizatzera deitu du arlo publikoan, hiriburuetan martxak antolatuz

Xabier Martin

Ez du onartzen Madrilen erabakitako soldata igoera, «ezta negoziazio markoa ere».  ELAk salatu du CCOOk eta UGTk beste urrats bat egin dutela «pobretze prozesuan».

Zamudioko egoitzaren kanpoaldea. ©Luis Tejido / Efe

Siemens Gamesak bulegoetan 352 langile kaleratuko ditu

Joxerra Senar

Lehen bilera egin du sindikatuekin, baina oraindik ez du argitu non izango diren kaleratzeak.

Iñigo Urkullu lehendakaria, plantaren lehen harria jartzeko ekitaldian. ©M. T.  / EFE

Petronorrek baieztatu du erregai sintetiko plantaren lanak amaituko dituela

Imanol Magro Eizmendi

Repsolek azpiegitura egin ala ez aztertzen ari zela zabaldu zen petrolio enpresen irabaziei ezarritako zergengatik b Bilboko portuan egongo da

Sindikatuek FVEMren egoitzaren aurrean egin zuten agerraldia, uztailaren 22an. ©Oskar Matxin Edesa / Foku

CCOOk, LABek eta UGTk hiru greba egun proposatu dituzte Bizkaiko metalgintzan

Paulo Ostolaza

Urriaren 27an, 28an eta azaroaren 2an izango dira. Bizkaiko metalgintzako lan itunak 52.000 langileri eragiten die.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...