Albistea entzun

Alaves 1-0 Atletico Madril

Indarrez berpiztu da

Alavesek denboraldiko lehen puntuak lortu ditu, etxean Atletico Madrili irabazita. Hasi eta berehala jarri da aurretik, eta, gero, sendotasun handiz iraun du zutik
Alaveseko jokalariak Laguardiak sartutako gola ospatzen. Arabarrek sasoiko lehen garaipena lortu zuten gol horri esker.
Alaveseko jokalariak Laguardiak sartutako gola ospatzen. Arabarrek sasoiko lehen garaipena lortu zuten gol horri esker. ENDIKA PORTILLO / FOKU Tamaina handiagoan ikusi

Eñaut Agirrebengoa -

2021eko irailak 26

Alaves. Pacheco; Martin, Ximo, Miazga, Laguardia, Duarte (Tachi, 79. min.); Loum, Toni Moya (Pina, 79. min.), De la Fuente (Pellistri, 61. min.), Rioja (Saul Garcia, 87. min.); eta Sylla (Joselu, 61. min.).

Atletico Madril. Oblak; Trippier (Cunha, 59. min.), Savic, Felipe, Hermoso (Herrera, 61. min.), Carrasco (Lodi, 59. min.); Kondogbia (Correa, 59. min.), Llorente (Vrsaljko, 74. min.), De Paul; Griezmann eta Luis Suarez.

Gola. 1-0. Laguardiak (4. min.). Epailea. Mateu Lahoz. Txartel horia Alaveseko Syllari eta Loumi eta Atletico Madrileko Savici, Trippierri eta Kondogbiari. Bestelakoak. 9.836 ikusle Mendizorrotzan.

Oinarrietara itzuli zen atzo Alaves. Jarrerari dagokionez, erabakimenez aritu zen zaleen aurrean. Jokoari dagokionez, ahalegin nekaezina eta defentsako lan koordinatua izan zituen ardatz. Eta sinbolikoki, men egin zion ereserkiari, indarrez berpiztu baitzen, Atletico Madrili irabazita (1-0). Ez zuen nabaritu lehia guztiak galdu izanaren zama, eta merezita eskuratu zituen puntuak. Lehiarik galdu gabe zegoen Ligako txapelduna, baina atzo, amore eman behar izan zuen arabarren bertsiorik lehiakorrenaren aurka. Garaipen handia izan zen, duen balioarengatik nahiz lortzeko moduarengatik. Laguardiak 4. minutuan apurtu zuen lehia, korner batean, eta, ondoren, erresistentzia ariketa aparta egin zuten gasteiztarrek. Puntuek ataka estutik ateratzeko balio diote taldeari, eta zer esanik ez Javi Callejari.

Hamaikako berritzailea zelairatu zuen Alaveseko teknikariak, behingoz tekla egokia sakatu nahian. Hautatuen artean ez zeuden ez Joselu, ez Pina. Haien ordez, De la Fuentek eta Moyak jokatu zuten. Halaber, prestatzaileak apustu deigarria egin zuen defentsan, bosteko lerroa ezarrita. Ximo erdian jarri zuen, eta Martin eskuinean. Atletico Madaril ispiluaren aurrean jartzea zen helburua, espainiarrak ere bost atzelarirekin hasi baitziren.

Bada, asmatu egin zuen Callejak, eta odolkiak ordainetan eman zizkion Simeoneri, haren emaitza kutunarekin gailendu baitzen Alaves. Partida hasi orduko sartu zuen garaitzeko gola Laguardiak. Ametsetako hasiera izan zen arabarrentzat. Alde txar bat ere badute, ordea, gol goiztiarrek: aurkariak oraindik ia neurketa osoa du bere onera itzultzeko. Eta mehatxua askoz ere handiagoa da aurrean duzun taldea Atletico Madril bada. Haatik, atzora arte erakutsi gabeko irmotasunez jardun zuen Alavesek defentsan. Barruko pasabide guztiak itxi zituen, eta, hala, ia gaindiezina izan zen lerro artean. Amarauna ehundu zuen kokapen onarekin eta zaintza estuarekin. Hori horrela, ordubete baino gehiago igaro zen madrildarrek lehen aldiz atera jaurti zuten arte.

Soilik bi estualdi izan zituen Callejaren taldeak. Bata, lehen zatiaren erdialdean, Laguardiaren urruntze txar bat eta Riojaren baloi galera arriskutsu bat tarteko. Alabaina, Llorentek eta Griezmannek ez zuten asmatu jokaldiak bukatzen. Alaveseko jokalari ohiak kanpora jaurti zuen oinaren kanpoaldearekin, eta Realean aritutakoari zehaztasuna falta izan zitzaion azken pasean. Alavesek arnasa hartu zuen berehala, Sylla aurkitzen hasi ahala. Hark espaziora egindako korrikaldiek oxigeno botila gisa balio izan zioten. Metroak irabazi zituzten gasteiztarrek.

Loum eta Pinaren aukerak

Laguardiak baloi bat atepetik atera zuen bigarren zatia hasi berritan. Alavesek berehala berrezarri zuen ordena, baina sufritzen hasi zen Simeonek Correa zelairatu zuenean. Argentinarrak nabarmen zorroztu zuen Atleticoren erasoko jokoa. Zutik iraun zuen, halere, Alavesek, eta bigarrena sartzeko aukerak ere izan zituen, Loum eta Pinaren oinetan. Biek dena alde izan zuten baloia sareratzeko, baina atera ez, harmailetara jaurti zuten. Edonola ere, Callejaren taldeak ez zuen gol gehiagoren beharrik izan denboraldiko lehen garaipena lotzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Irizpidea duzulako. Giroan zabiltzalako.

Zuk badakizulako.

Albiste gehiago

JOKIN ALTUNA PEIO ETXEBERRIAREN KONTRA FINAL LAURDENETAKO LIGAXKAN, 2019an. 22-5 IRABAZI zuen ALTUNAK. ©Jon Urbe / FOKU
Mikel Huerga xake jokalari iruindarra, txapelketa batean. ©BERRIA

Bidea, luzea bezain aberasgarria

Josu Tornay

Mikel Huergak xakeko Maisu Handi titulua eskuratu berri du. Eskura zuen 19 urte zituela, baina hamabi urtez egon da hura ziurtatu ezinik. Harekin itsutu ez denean lortu du. Beste hiru euskal jokalarik baino ez dute.

 ©MANIX DIAZ DE RADA

«Hasiera da, ez dugu ezer egin, baina sentipenak onak dira»

Jon Ander De la Hoz

Zuhurtzia lege, Aritz Elustondok partidaz partida zizelkatu nahi du Realaren aldi oparoa. Beasaindarrak dio eguneroko lan ona dela helburuak lortzeko biderik eraginkorrena: «Zaila da Lehen Mailan irabaztea».
 ©IDOIA ZABALETA / FOKU

«Nire nahia beste urtebetez jarraitzea da»

Mikel O. Iribar

Profesionaletan 20. urtea beteko duen «jakin gabe», «seguruenik» azken Lau eta Erdiko Txapelketa izango du honako hau leitzarrak. Aitor Elordiren aurka jokatuko du etzi, Bilbon.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Irizpidea duzulako. Giroan zabiltzalako.

Zuk badakizulako.

Egin BERRIAlaguna