Labritetik joaten da Nafarroa Arenara

Iraupena. Ordubete eta hamar minutu.
Pilotakadak. 509.
Sakez. Lasok bat; Elordik bat.
Egindako tantoak. Lasok hamahiru, Imazek batere ez, Elordik hiru eta Zabaletak sei.
Huts egindakoak. Lasok bost, Imazek bost, Elordik zazpi eta Zabaletak bi.
Markagailua. 3-0, 3-1, 5-1, 5-5, 7-5, 7-7, 10-7,10-8, 11-8, 11-9, 12-9, 12-10, 15-10, 15-14, 17-14, 17-15, 19-15, 19-19 eta 22-19.
Bestelakoak. Lepo bete zen Labrit: 1.200 ikusle inguru. Apustuak Elordiren eta Zabaletaren alde atera ziren nabarmen: 100-40ri.

Hiru kilometro daude Iruñeko Labrit pilotalekutik Nafarroa Arena pabiloira. Hango frontoian jokatuko dute apirilaren 2an Eskuzko Pilota Enpresen Ligako (EPEL) Binakako Txapelketako finala; lehen aldiz jokatuko da han binakakoaren finala. Hara iristeko bidearen zati handi bat egina dute Unai Lasok eta Ander Imazek. Bi partida jokatu dituzte finalerdietako ligaxkan, eta biak irabazi dituzte: duela astebete, 22-21 hartu zituzten mendean Jokin Altuna eta Xabi Tolosa; atzo, berriz, 22-19 nagusitu zitzaizkien Aitor Elordiri eta Jose Javier Zabaletari Labriten.

Horri esker, oso bideratua dute finala jokatzea. Gaur bertan ziurta dezakete bigarren urtez jarraian txapela irabazteko lehian aritzea. Nahikoa dute gaur Jokin Altunak eta Xabi Tolosak Jon Ander Peñari eta Jon Mariezkurrenari irabaztea. Eibarko (Gipuzkoa) Astelena pilotalekuan jokatuko da bigarren jardunaldiko azkeneko norgehiagoka. Hau da, Lasori eta Imazi enpresakideek galtzea komeni zaie. Bestela, astebete itxaron beharko dute azken urratsa egiten saiatzeko. Hala ere, esku-eskura lukete. Handia gertatu beharko litzateke finala ez jokatzeko. Historiak ere halaxe dio: behin bakarrik ez da bikote bat sailkatu finalerako, ligaxkako aurreneko bi neurketak irabazi eta gero. Aimar Olaizolari eta Imazi gertatu zitzaien, 2018an.

Gainera, Laso eta Imaz konfiantzaz gainezka iritsiko dira azken partida horretara: unerik aproposenean suspertu dira. Lehen jardunaldian, ligaxkan eta kanporaketan baino askoz hobeto aritu ziren. Atzo, berriz, beste koska bat egin zuten gora: bikain aritu ziren. Laso nabarmendu zen: aspaldiko partidarik onena jokatu zuen, eta zutik jarri zuen hainbat tantotan Labrit: hamahiru egin zituen, eta bost huts egin. Hark egin zuen distira handien, baina Imazek oso ondo lagundu zion. Meritu handia du horrek, parean Zabaleta zegoela kontuan hartuta.

Elordi, nerbioak jota

Batzuen gozamena, besteen ezina. Atzo galduta, Elordi eta Zabaleta azkeneraino borrokatu beharko dira finalerako sailkatzeko. Ikusgarri ibili ziren atzo arte, aurkari guztiak hankapean ibilita: batez beste, hamalau tanto besterik ez zieten egin partidako. Baina, atzo, aurreneko aldiz, ezinean aritu ziren. Elordirena izan zen ezinik handiena. Aurrelaria ametsetako estreinakoa egiten ari zen binakako nagusian, baina atzo ametsa amesgaizto bilakatu zitzaion. Urduritasunak jota aritu zen hasi eta buka, eta ez zen inoiz haren maila emateko gai izan. Argigarriak dira haren datuak: hiru tanto bakarrik egin zituen, eta zazpi huts egin.

Apur bat hobeto aritu izan balitz, ziurrenik irabazi egingo zuten hark eta Zabaletak, atzelaria berriro ikusgarri aritu baitzen. Sei tanto egin zituen, eta bi huts egin. Zenbaki bikainak dira atzelari batentzat, baina alferrikakoak atzo; laguntza falta izan zitzaion.

Hari esker eutsi zioten Aspekoek lehiari, hasiera-hasieratik izan baitzuen Baikokoen aldeko joera: 5-1. Lasok bi tanto egin zituen, eta Elordik hiru pilota galdu. Baina Zabaleta egurrean hasi, eta partida berdindu egin zen.

Laso berehala ohartu zen tantoa luzatzeak kalte egiten ziela: Zabaletaren joa nagusitzen zen. Erritmoa bizitu behar zuen, eta jokoa nahastu. Pentsatu eta egin; ondo egin. Gainera, Elordik suspertu ezinik jarraitzen zuen. Horrela, alderik handiena lortu zuten: 15-10.

Baina Elordiren susperraldi txiki batek eta Zabaletaren pilotakadek aldea murriztu zuten: 15-14. Lasok beste astindu bat eman zion partidari (19-15), baina ez zen erabakigarria izan, gorriak hutsak egiten hasi baitziren. Lasok kanpora bidalitako bi paretakoari esker lortu zuten urdinek 19. tantoa. Baina berehala atera zuen arantza buruz buruko txapeldunak: lehenbizi, tanto ikusgarria lortu zuen ezker gantxoz; eta, ondoren, sakez, biparetaz. Elordiren huts batekin amaitu zen lehia. Azken bi tantoek ezin hobeto islatzen dute Labriten gertatutakoa: batzuen konfiantza, eta besteen ezina.

Laso eta eta Imaz, eta Elordi eta Zabaleta gaur gertatzen denari begira egongo dira. Asko dute jokoan Altuna III.a eta Tolosak eta Peña II.a eta Mariezkurrena II.ak, bi bikoteek galdu baitzuten lehen jardunaldian. Baikokoak aukerarik gabe geratuko dira galtzen badute, eta Aspekoak, ia kanpoan.