Sanfaustoak Durangon

Herritarren borroka luzeari aitortza

Erretiratu eta pentsiodunen pregoiarekin hasiko dira gaur sanfaustoak Durangon. Bederatzi eguneko egitaraua prestatu dute; bihar umeen eguna izango da
Durangoko erretiratu eta pentsiodunen plataformako kideak, suziria botako duten lekuan, udaletxeko balkoian.
Durangoko erretiratu eta pentsiodunen plataformako kideak, suziria botako duten lekuan, udaletxeko balkoian. ANBOTO Tamaina handiagoan ikusi

Zihara Jainaga Larrinaga -

2019ko urriak 11

Euskal Herriko pentsiodunek 21 hilabete daramatzate borrokan pentsio publiko duinak mantentzeko eta gutxieneko pentsioak igotzeko. Durangon (Bizkaia) borroka hori aitortu nahi izan diete, eta, horregatik, herriko erretiratu eta pentsiodunen plataformak emango die gaur San Fausto jaiei hasiera. Plataformako lau kide udaletxeko balkoira igoko dira, eta, 20:00etan, pregoia irakurri, eta suziria jaurtiko dute. Bederatzi eguneko festa abiatuko da hala.

«Ezustekoa izan zen pregoilari izateko izendapena; ez genuen espero», adierazi du Matias Oregi plataformako kideak. Pentsiodunen mugimenduari egindako aitortza azken hilabeteotako aldarrikapenak babesteko keinu gisa jaso dute, eta ziur daude gaur arratsaldeko ekitaldiak borrokan segitzeko bultzada emango diela. «Ia urte biko borrokaren adierazpena izango da, aurrera egiteko indarra emango duena».

Oregiren arabera, Durangaldean indartsu dago pentsiodunen mugimendua. Ia herri guztietan dute ordezkaritza, eta, adierazi dutenez, antolatzeko beharra orokorra da. «Hori da gure oinarria». Baina pauso kualitatiboa ematea falta zaie. Eskualdeko sindikatu, gazte talde, ikasle, feminista eta bestelako elkarteekin harremanetan daude, pauso hori elkarrekin emateko. Ikusten dute, baina, arazoa «agendan jarri beharra dagoela». Hori horrela, aurreratu dute gaur arratsaldeko pregoia Durangoko gazte jendeari dei berezi bat egiteko baliatuko dutela. «Ez ditugu soilik eguneko pentsioak defendatzen; biharkoak ere hor daude». Etorkizunean emango den erreleboari garrantzi handia ematen diote pentsiodunek, eta, horregatik, ezinbestekoa iruditzen zaie gazteak konturatzea borroka hori eurena ere badela.

Kaletik balkoirako aldaketarekin harro eta pozik daude Durangoko erretiratu eta pentsiodunen plataformako kideak, baina argi dute: «Balkoia egun bakarreko kontua da». Horregatik, balkoitik bertatik, asteroko topagunera, astelehenetako mobilizazioetara batzeko deia egingo dute. Bestalde, Oregiren esanetan, Durangoko zenbait herritarrek bizi duten errealitatea ezagutarazteko ere aprobetxatuko dute momentua. «Badaude 600 euroko pentsioa duten herritarrak, eta batez ere emakumeak eta alargunak dira kaltetuak». Pobreziaren errealitatea uste baino gertuago dagoela erakutsi, eta horren aurka mobilizatu beharra dagoela azpimarratuko dute.

Diskurtsoaz aparte, baina, Oregik ziurtatu du jaien testuingurua ere kontuan izango dutela udaletxeko balkoian pregoia irakurtzen ari direnean. «Durangoko sanfaustoak jai herritarrak dira». Gaur, 19:00etan, Patxikotxu jaietako pertsonaiaren ongietorrian parte hartuko dute pentsiodunek ere, eta, horrela, jaietan murgilduko dira. Bihar, bestalde, umeen eguna ospatuko dute Durangon, eta Zabalarra eskola publikoak botako du txupinazo txikia.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Osasun langileak PCR probak egiten Donostiako Okendo kultur etxean, ostiralean. ©Gorka Rubio/FOKU

500 positibo baino gehiago atzeman dituzte Euskal Herrian

Berria

Bizkaian behera egin dute kasuek: 211 positibo izan dira. Neurriak indartzearen alde agertu dira hiriburuetako alkateak. Ortzaizen, Nafarroa Beherean, hiru pertsonari atzeman diete COVID-19 gaitza.

Neurri bereziak dituen taberna bat, Donostian. ©Gorka Rubio / Foku

Bizkaiko eta Gipuzkoako ostalariek salaketa jarriko dute gaueko aisialdia mugatzearen aurka

Andoni Rekondo Izagirre

Uste dute «neurrigabea» dela 01:30ean ixteko agindua, eta laguntza ekonomikoak galdegin dituzte.

Bizkaiko zahar etxe bateko egoiliarrak paseoan. ©Marisol Ramirez/FOKU

Bilboko zahar etxe bateko zortzi egoiliarrek positibo eman dute

Olatz Esteban Ezkati-Irati Urdalleta Lete

Gasteizko zahar etxe bat eta Mutrikuko eguneko zentroa itxi egin dituzte.

 ©Raul Bogajo / Foku

Lanbidek Zaramagako eta Laudioko bulegoak itxi ditu, bi langilek positibo eman dutela eta

Andoni Rekondo Izagirre

Bulegoetako gainerako beharginak ere etxera bidali dituzte berrogeialdia pasatzera. Bitartean, tramiteak webgunearen bitartez egin ahal izango dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna