Albistea entzun

Osasuna 0-1 Reala

Sufrituz berriro ere

Realak irabazi egin dio Osasunari Sadarreko derbian, eta txuri-urdinak Europa ligan ariko dira datorren denboraldian. Isakek sartu du partidako gol bakarra
Realeko jokalariak, Osasunaren aurkako derbian lortutako garaipena ospatzen, atzo, Sadarren.
Realeko jokalariak, Osasunaren aurkako derbian lortutako garaipena ospatzen, atzo, Sadarren. IÑIGO RUIZ / FOKU Tamaina handiagoan ikusi

Mikel O. Iribar -

2021eko maiatzak 23

Osasuna. Perez; Vidal, D. Garcia, U. Garcia (Ramalho, 54. min), Sanchez; Oier, Torro (Moncayola, 45.min), Perez (Martinez, 80. min), Torres, Barja (Jony, 80. min); eta Gallego (Budimir, 69. min).
Reala. Remiro; Gorosabel, Aritz, Le Normand, Monreal; Gebara, Zubimendi; Oiartzabal (Barrenetxea, 82. min) Silva (Fernandez, 74. min), Portu (Januzaj, 80. min); eta Isak (Lopez, 89.min).
Golak. 0-1. Isak (86. min.). Epailea. Figueroa Martinez. Txartel horiak Osasunako Gallegori.

Realak, iazko sasoian bezalaxe, Ligako azken partidako hatsean lortu du Europako Ligara sailkatzea, atzo Osasunari 1-0 irabazita, Sadarren. Oro har, Imanol Alguacilen taldea nagusi izan zen partidan, baina gola sartzea izugarri kostatu zitzaion, harik eta 86. minutuan saria jaso zuen arte, Alexander Isaken eskutik. Garaipenaren gola sartu zuen suediarrak, eta gisa horretara biribildu dute aurtengo denboraldia txuri-urdinek. Egun aparta txuri-urdinentzat, Reala Bk Bigarren Mailara igotzea lortu baitzuen.

Demaren atarikoan, Imanol Alguacil Realeko teknikariak argi esan zuen ez zirela jolasera joango Iruñera, eta Jorge Figueroa Martinez epaileak txistua jo orduko baieztatu zen hori. Hasiera-hasieratik, baloiaren jabetza Realaren aldekoa zen, eta, ibilian-ibilian, txuri-urdinek izan zituzten partidako lehen abaguneak; lehenengoan, Isakek erdiraketa pozoitsua bezain zitala egin zuen, eta Osasuna atzelariek hala moduz urrundu zuten; bigarren aukera are handiagoa izan zuten. Portuk eskuin hegaletik erdiraketa egin ostean, Ander Guevarari oinetara heldu zitzaion baloia; gasteiztarrak, ordea, baloia gora bidali zuen.

Osasunako jokalariak atzean sartuta zeuden, eta, nola edo hala, kontraerasoan atera nahi zuten baloia. Reala, berriz, serio atera zen zelaira, eta soseguz zebiltzan donostiarrak, batez ere eskuinetik sortutako ahaleginen bitartez. Atea zulatzea falta zitzaien, ordea. Partidak aurrera egin ahala, Realari jokoa nahasi zitzaion, Osasunaren mesederako; pauso bat aurrera egin zuen, harik eta Alex Remiroren atera aurrenekoz iritsi ziren arte. Kike Barjak sekulako zartakoa eman zion baloiari, baina langatik gora joan zitzaion. Lehen zatiko hondarrean, Arrasateren taldea indar nahiz gogortasun handiarekin lehiatzen ari zen arren, hutsean heldu ziren atsedenaldira.

Realaren erauntsia

Bigarren zatiaren hastapenean ere Realak hartu zuen demaren lema, eta aurkariaren areara ere sarriago heltzen zen. Jokaldi batean, David Silvak pase ederra bidali zion Isaki, baina hark eskuinez gurutzatuegi jaurti zuen. Alguacilek txinpartari hauspo handiagoa eman nahi zion, eta Ander Barrenetxea, Carlos Fernandez eta Adnan Januzaj atera ditu zelaira, eta Oiartzabal, Silva eta Portu bidali aulkira. Enegarrenez, gola sartzeko zorian izan da Reala; Fernandezek aukera paregabea izan du area txikian, baina zutoinaren ondotik joan zaio baloia. Osasuna sekulako erauntsia jasotzen ari zen bisitarien partetik.

Kosta ahala kosta, donostiarrek gola behar zuten Europako Ligako postua ziurtatzeko; izan ere, Galiziatik ez zetorren albiste onik; Betisek 3-2 irauli baitu markagailua Celtaren aurka, eta, egoera horretan, Europatik at ziren txuri-urdinak. Azken-azkenean, ordea, ez zuten iparra galdu, eta, ekinaren ekinaz, saria jaso zuen Realak 86. minutuan. Januzaj maisua da eskuinetik erdiraketak egiten, eta, aukera izan duenean, gozo-gozo jarri du baloia arean; izan ere, han zegoen Isak, zain. Aztia da horrelako jokaldietan, eta suediarrak denboraldi osoan argi erakutsi du gol sena baduela. Indarra eta arima jarri ditu baloia errematatzeko, eta, nola ez, sareetara bidaltzeko. Zoramena Realeko taldekideen artean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©Aritz Loiola / FOKU

Euskal derbia izango da Kopako finalerdietan

Beñat Mujika Telleria

Sadarren jokatuko da joaneko partida, eta San Mamesen itzulerakoa. Hortaz, euskal talde bat arituko da Espainiako Kopako finalean. Real Madrilek eta Bartzelonak jokatuko dute beste finalerdia.

Jai Alai Ligaren antolatzaileak eta sustatzaileak, gaur, Gernikako frontoian. ©Markel Suarez

Lehen aldiz, liga bakarra osatuko dute Iparraldeko eta Hegoaldeko txapelketa nagusiek

Julen Etxeberria

Gernikako, Donibane Lohizuneko, Miarritzeko eta Paueko txapelketak batuko ditu Jai Alai Liga berriak. Antolatzaileen arabera, zesta-puntak «pauso historikoa» eman du, eta «mugarri» izango da aro berri honetan.

Realaren eta Real Madrilen arteko partida. ©Rodrigo Jimenez / EFE

Puntu batekin itzuli da Reala

Berria

Bederatzi jokalari bajan edukirik ere, Real Madrilen erasoei eutsi ahal izan zieten txuri-urdinek atzoko partidan. Bigarren erdian sendo aritu zen Reala, baina berdintuta amaitu zuten.

Celtaren eta Athleticen arteko partida amaiera. ©Salvador Sas / EFE

Porrot egin dute zuri-gorriek Balaidosen

Berria

Hasierako gol baliogabea medio, berdintsu ibili ziren bi taldeak. 70. minutuan, ordea, Iago Aspasek gola sartu zuen. Iñaki Williams ez zen izan Balaidoseko partidan.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.