Elezkano II.a 6-22 Jaka

Ez ireki begiak, Jaka

Erik Jakak aurreneko aldiz jokatuko du Banakako Txapelketako finala, Danel Elezkanori 6-22 irabazi eta gero. Azken hamazazpi tantoak segidan egin ditu
Erik Jaka atzoko partida bukatu eta segituan, garaipena ospatzeko keinua eginez, Bilboko Bizkaia pilotalekuan.
Erik Jaka atzoko partida bukatu eta segituan, garaipena ospatzeko keinua eginez, Bilboko Bizkaia pilotalekuan. ARITZ LOIOLA / FOKU Tamaina handiagoan ikusi

Aitor Manterola -

2020ko azaroak 22

Pilotakadak. 176. Iraupena. 35.21. Sakez. Elezkano II.ak 0; Jakak 7. Egindakoak Elezkano II.ak 3: Jakak 12. Galdutakoak. Elezkano II.ak 10: Jakak 3. Markagailua. 0-4; 4-4; 4-5; 6-5; eta 6-22. Bestelakoak. Osasun egoera dela eta, ikuslerik gabe jokatu zen partida.

Begiak ixten ote ditu Erik Jakak pilota astintzean? Atzo, behintzat, irekita edukita ere, itxita balitu bezala jokatu zuen. Amets betean aritu zelako, ametsetako lorpena erdiesteko ametsezko partida eginez. Lo gozoan segitzeko moduan da datorren igandera arte, gutxienez. Irabazi du ametsetan jarraitzeko eskubidea, eta nahi badu, zabal ditzala begiak gaur zortzi, Bizkaia pilotalekuan, non eta Banakako Txapelketaren finalean. Sinesteko egia dela atzo lorturikoa. Baietz eta baietz. Aurreneko aldiz ariko da final handian. Atzo irabazi egin zuelako finalerdia, nola irabazi ere: 6 eta 22 azpiratu zuen Danel Elezkano, finaleko leku berean.

Ez zuen inor ezustean hartu Jakaren atzoko jokoak. Hitz egiten bezain gardena da pilotan jokatzen. Bizi eta azkar. Sano. Tantoa hasi eta ia hasi orduko, bukatu. Horrela ekin zion atzo ere, eta handik gutxira ekarriko zuen erauntsiaren lehen kolpea iragarri zuen. 0-4 aurreratu zen: zirriztaz egin zuen aurrenekoa; bigarrena, Elezkanoren errestoa atzera botaz, eta haren erantzuna aurrean bukatuz; hirugarrena, sakez, bikain gurutzatuz; eta laugarrena, biparetaz, zabalera ateratako sakearen ondotik.

Erauntsiaren aurreneko zartako horri, ordea, bikain erantzun zion Elezkano II.ak. Bikaintasuna ez zen estetikoa izan, baina berdin zitzaion. Jokoa nahastearen ondorioz erdietsi zuen launa berdintzea. Mugitu beharra zeukan lekuz Jaka, aurreko koadroetan bere lekuan pilota eroso harrapatzen badu, zitala delako oso Lizartzakoa. Hori lortu zuen lau tantoko segida horretan Zaratamokoak, baina garesti ordaindu zuen segituan: sekulako abiadura eman zion jokoari, biek jokatu zituzten tanto luze batzuk partidako hasiera horretan, eta deigarria izan zen erabat Jakaren bosgarren tantoaren ondorengo irudia: bi pilotariak jota, arnasari buelta eman ezinda. 24 pilotakadako tantoa jokatu berriak ziren.

Elezkanok 6-5 aurreratzea lortu zuen gero, Jakak txapa azpira botatako pilota batekin, eta defentsan zabaletik txokora egindako tanto ikusgarriarekin. Jakaren seigarren tantoa ere gordetzekoa izan zen: sakeari airez erantzun zion, ezkerrez, seigarren koadrotik, eta zabalean tanto egin. Zazpigarrena eta zortzigarrena ere azkar egin zituen, sakez eta atzean. 6-8 urdinaren alde, eta Elezkanok partida eteteko erabakia hartu zuen: aulkira. Erabat jota. Baita Jaka ere. Eta oso adierazgarriak gipuzkoarrak aurkariaz esandakoak partida ondorenean, eten horretaz galdetu zitzaionean: «Ikusi dut Danel zuri zegoela». Aulkitik jaiki zenetik, bizkaitarraren zurbiltasuna kamiseta gorriak bakarrik disimulatu zion. Partida amaitu arte ezinean aritu zen. Fisikoak pott egin zion? Edo Jakaren erauntsiak eragindako ezintasunak erasan egin zion psikologikoki? Erantzuna aurkitzeko galdera interesgarriak adituentzat.

Sakea, erabakigarria

Bueltatu ziren, horrenbestez, kantxara, etenaren ondotik, eta zirt eta zart egin zuen Jakak. Bizi eta azkar. Sano. Sakearekin ezkondu zen ondo, erakutsiz ondo mamituta eraman zuela estrategia hori partidara, eta tantoaren lehen pilotakadarekin ez bazuen gehitzen aldeko puntua, ondorengo jokaldian edo handik berehala amaitzen zuen lana. Ondo sakatu izanaren poderioz. Aurkaria nahastera joan zen: zabalera, gurutzatua... Sakeetan non jarri asmatu ezinda eduki zuen Elezkano. Erabakigarria izan zen: zazpi tanto sartu zizkion aurreneko pilotakadarekin.

Beste helduleku on bat ere izan zuen lagun Jakak atzo: Elezkanoren eskuina bilatu zuen botez, baita lortu ere. Egoera horri ere etekina atera zion. Edozeri aterako zion atzo, ateratzen hasita, eta premia parean tokatu izan balitzaio. Dena neurrira egokitzea lortu zuen, eta dohainik handiena duen horretan distira berezia egin zuen: abila da tantoak bukatzen aurreko koadroetan.

Partidaren hasieran erakutsi zuen erauntsia bete-betean gauzatu zuen etenaren ondoren, eta 0-17ko partziala egin zion Elezkanori. Hirugarren finalerdian ere kale horrek. Jakak, bale. «Ez dit utzi jokatzen», esan zuen gero Elezkanok.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Joseba Zaldua, baloi bat lehiatuz. Atzelari donostiarrak bere lehendabiziko partida jokatu du aurtengo Europa ligan. ©OLAF KRAAK / EFE.

Kilimarik egin gabe

Jon Ander De la Hoz

Reala lotuta aritu da AZ Alkmaarren zelaian, eta puntu bat zakuratuta itzuli da Donostiara. Txuri-urdinek bizirik segitzen dute Europa ligan, zazpi punturekin

Altunaren eta Jakaren pilota aukeraketa

Hasi dira finala jokatzen

Julen Etxeberria

Jokin Altuna eta Erik Jaka gustura azaldu dira igandeko finalerako pilotekin. Biek funtsezkotzat jo dute lehian agintzea

Paula Suarez ahalegin betean, lasterketa batean. ©PAULA SUAREZ

Lehiatzeko gosea ase ezinda

Aitor Manterola

Ziklo-krosa indarra hartzen hasita zegoen azkenaldian. Denboraldi honetan ere hori zen asmoa, baina pandemiak bertan behera utzarazi ditu hainbat proba. Hala ere, Paula Suarez eta Aitor Hernandez gogor ari dira geratu zaiena prestatzen.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.