Albistea entzun

Laso 22-8 Peio Etxeberria

Heldutasunak eman dio saria

Unai Laso 22-8 gailendu zaio Peio Etxeberriari, eta lau eta erdiko finalerako sailkatu da lehendabizikoz. Nahiz eta 1-5 atzetik joan, partida iraultzea lortu du, nagusitasun handiz
Unai Laso, garaipena ospatzen, atzo, Peio Etxeberriaren aurka jokatutako Lau eta Erdiko Txapelketako finalerdian, Labriten.
Unai Laso, garaipena ospatzen, atzo, Peio Etxeberriaren aurka jokatutako Lau eta Erdiko Txapelketako finalerdian, Labriten. IDOIA ZABALETA / FOKU Tamaina handiagoan ikusi

Mikel O. Iribar -

2021eko urriak 31

Pilotakadak. 204.
Iraupena. 49.52.
Sakez. Lasok bost; Peio Etxeberriak bi.
Egindakoak. Lasok hamabi; Peio Etxeberriak sei.
Huts egindakoak. Lasok bi; Peio Etxeberriak hamar.
Markagailua. 0-2, 1-2, 1-5, 13-5, 13-6, 17-6, 17-8, 22-8.
Bestelakoak. Jende asko bildu zen Iruñeko Labrit pilotalekuan. Apustuak Lasoren alde atera ziren nabarmen: 100 40ri.

Nork esango zuen bederatzi hilabetez profesionaletatik kanpo egon ostean Unai Laso sailkatu egingo zela azaroaren 14an Bilbon jokatuko den Lau eta Erdiko Txapelketako finalerako ? Bada, aspalditik buruan zuen «ametsa» gauzatu du Bizkarreta-Gerendiaingoak. Peio Etxeberriari 22-8 nagusitu zitzaion atzo, bor-borka egon zen Iruñeko Labriten. Baikoko pilotariak txapelketako lehen partidatik erakutsi dituen bertute asko berretsi zituen atzoko lehian ere, heldutasuna eta patxada makulu zituela.

Hain zuzen, Lasok izan zuen lehen sakea, baina Etxeberriak, ezustean, airez erantzun zion, tantoaren dominatzailea izateraino. Sekulako erritmoarekin ekin zio lehiari, distiraz eta ausardiaz. 0-2 aurreratu zen, eta Jon Mariezkurrena Lasoren botileroak etenaldia eskatu zuen berehala, Zenozkoaren sua itzali nahian; on egin zion Lasori. Sakea berreskuratu zuen, baina opari galanta egin zion Etxeberriari; motzegi sakatu baitzuen. 1-3. Deseroso zebilen Bizkarreta-Gerendiaingoa; Aspeko pilotariak, berriz, bere lanean serio jardun zuen. Erasokor zebilen, eta egoera ondo baino hobeto aprobetxatzen ari zen. 1-5.

Harik eta Lasok piztia otzantzea lortu zuen arte, ezker boleaz motz-motzean egindako tanto handi bati esker. Ordutik aurrera, sekulako erakustaldia eman zuen kantxan, harmailetan zeuden pilotazaleak aho bete hortz uzteraino. Baikoko pilotariak 12-0eko partziala egin zuen, bizi-bizi, markagailua 13-5ean uzteraino. Sakez, ezker zabalean nahiz txokoan maisuki amaitzen zituen tantoak. Guztia ondo ateratzen zitzaion, eta partida haustear zen; Etxeberria, berriz, nekeak erasanda, erabat lotuta zebilen, bere ohiko jokoa egin ezinik. Gozakaitz ari bazen ere, nola edo hala, 6. tantoa egitea lortu zuen.

Susperraldiak, ordea, ez zion askorik iraun Zenozkoari. Lasok behin eta berriz pilota zabalera bidaltzen zuen, Etxeberria zigortzeko; eskuinez ez baita ezkerrez bezain abila. 19. tantoa, esaterako, ederra izan zen; pilotakada sarri baten ostean, Lasok bigarren koadrotik horma-biko zoragarria egin zuen, frontoian zeuden zaleak zutik jartzeraino. Gertu zuen garaipena, eta ez zion ihes egin: 22-8. Pozik zen amaieran Bizkarreta-Gerendiaingoa: «Hasieran, markagailuan joan zaidanez, banekien gogor borrokatu behar nuela, eta lortu dut. Gozatzera noa finalera». Txanponaren alde iluna Etxeberriari egokitu zitzaion. «Pena handia dut. Batek irabazi behar zuen, eta Unaik [Laso] nik baino hobeto jokatu du. Zoriondu egin behar da».

Gaur, Altuna III.a-Ezkurdia

Lasok gaur jakingo du nor izango duen aurkari finalean; Jokin Altunak eta Joseba Ezkurdiak jokatuko dute, Gasteizko Ogetan (16:30, ETB 1). Azken lau urteetan, diziplina horretako txapeldunak izan dira biak: bina txapel jantzi dituzte. Bi pilotariek lau alditan neurtu dituzte indarrak, eta Arbizukoa hirutan nagusitu zaio Amezketakoari: besteak beste, bi finaletan, 2018koan eta 2019koan. Iaz, Altuna III.a izan zen txapelduna.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©JON URBE / FOKU

«Ez dut aldaketa asko egin; oker legoke egindako lan guztia galtzea»

Iñaki Berastegi

«Familia handi batekin» egin du topo Federico Gallok Ordizian. Taldeak oinarri sendoak baditu ere, arlo fisikoari berebiziko garrantzia eman dio sasoiaurrean. Bartzelonaren aurka jokatuko dute ligako lehen partida bihar, Altamiran (12:00).

Alavesek sasoiko lehen hiru puntuak lortu nahi ditu ligan

Berria

Arabarrek Vila-real hartuko dute, eta Mikel Crespok etxean indartsu izatearen beharra azpimarratu du
Maria Serna jokalaria eta Irene Senac entrenatzailea Txuri-Urdin izotz jauregian, aste honetan, taldearen aurkezpenean. ©GORKA RUBIO / FOKU

Harrobiarekin, aurrera doa

Zuriñe Iglesias Sarasola

Bihar jokatuko du sasoiko lehen partida Txuri-Urdinek. Irene Senac da taldeko entrenatzaile berria, eta multzoa asko aldatu da, hamar jokalarik utzi baitute taldea.
Geraezin segitzen dute zuri-gorriek

Geraezin segitzen dute zuri-gorriek

Ainara Arratibel Gascon

Partida aparta jokatu, eta 4-0 hartu dute mendean Athleticek Almeria. Denboraldi honetan ohikoa duen bizitasunez jokatu du erasoan talde zuri-gorriak, eta oso eraginkor aritu da aurkariaren ate aurrean. Festa izan da nagusi San Mamesen. Iñaki Williamsek, Oihan Sancetek, Nico Williamsek eta Mikel Vesgak penaltiz sartu dituzte golak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...