Albistea entzun

Hamaikak telebista adimendunetarako bere aplikazioa estreinatu du

Hamaikaren digitalizazioan «beste jauzi bat» da aplikazioa. Ostiralean jarri zuten eskuragarri
BERRIA Tamaina handiagoan ikusi

Enekoitz Telleria Sarriegi -

2022ko urriak 2

«Jauzi bat» eta «apustu bat». Ekhiñe Atorrasagasti eduki arduradunak dio horixe dela Hamaika telebistak egin duena smart TV edo telebista adimendunetarako euren aplikazio propioa abian jarrita: «Euskal komunitate digital horri guztiari zerbitzua eskainiko diogulako orain, muga geografikoak eta muga teknikoak gaindituz behin betiko».

Ostiralean atera zuten plazara, eta denen eskura dago. Hamaikaren sare sozialetan eta webgunean (Hamaika.eus) agertzen dira hura eskuratzeko azalpenak, baina oso sinplea eta erraza da: norberaren telebista adimendunetik Google Play plataforman sartu, Hamaika aplikazioa bilatu, aukeratu, eta instalatu. «Askok nahas dezakete sakelakoetan deskargatzen ditugun aplikazioekin. Argi eta garbi esan behar da hau telebista adimendunetarako aplikazioa dela. Gure egunerokoan jada txertatuta dauzkagun beste hainbat plataformarekin batera, euskarazko telebista bat egongo da orain Euskal Herri osora eta mundu osora zabaltzeko erronka txiki handiarekin», azaldu du Atorrasagastik.

Urtebeteko prozesu baten emaitza izan da Hamaikaren aplikazioa. Telebistako lantaldea «buru-belarri» aritu da egiteko horretan, Maddi Mochales digitalizazio arduraduna buru hartuta. Atorrasagastik nabarmendu du bi «indargune» dituela aplikazioak: munduko edozein tokitatik Hamaika telebisaren zuzenekoa digitalki ikusteko aukera bata, eta Hamaikaren menuan sartzeko aukera bestea: «Eta zer aurkituko dugu menu horretan? Eguneko albiste zerbitzuez gain, Hamaikak ekoitzi dituen saio esanguratsuenak: Musika zuzenean saioko atalak, saio bereziak, elkarrizketa edo monografiko konkretuak, Klik batean, Nafar away saioaren denboraldi berria eta aurrekoak, Hezurren memoria saioko kapituluak...».

Hamaika telebista lurreko telebista digitalaren eta Euskaltelen bidez ikus zitekeen orain arte, baita Interneten ere. Atorrasagastik azaldu duenez, «beste jauzi bat» da orain egin dutena: «Pandemia garaiaren ostean, birkokatze une batean gaude denok. Informazio zerbitzuak eta ekoizpen propioa indartzeko asmoarekin batera, erronka nagusia zen hedapen digitala erabat garatzea. Hamaikarentzat apustu handia da hau. Izan ere, Smart telebisten bidez, Euskal Herriko etxe guztietara bakarrik ez, mundu osoan barreiatuta dagoen euskal komunitatearen etxeetara iritsiko gara».

Datu propioak

Atorrasagastik dio hedabideen digitalizazioa «martxa bizian» sartu dela azken urteotan, eta «egiturazko aldaketak» horren azkar gertatzen diren garaiotan ezin direla «atzean» geratu. Alde horretatik, aplikazio hori «erabilera handikoa» izango da haientzat: «Zuzeneko datuak eskainiko dizkigulako. Zeren askotan CIESen datuen menpe egoten baikara, eta oso garrantzitsua da Hamaika telebistak bere datu propioak izatea, bere audientzia datuekin dagokion tokian aitortza bat izateko; besteak beste, finantzaketaren garrantzia berebizikoa delako, eta iraupena eta garapena horren menpe daudelako».

Finean, aplikazio horrek «aukera asko» ematen dituela dio Atorrasagastik: zuzeneko emisio hori edozein tokitatik ikusteko aukera emanda, eduki guztiak nahieran jarrita... Hamaikaren jarduna ikasgeletan erabiltzeko, Euskaltegietan baliatzeko aukera ere sortzen dela.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Filip Albor, Amaia Karrere eta Arantxa Hirigoien, <em>Ttinka</em> disko-liburuaren egileak. ©MATHIEU HARANBURU/ BELARRI

«Ikusi dut gauza gutirekin anitz pasarazten ahal dela»

Ainize Madariaga

'Ttinka' disko-liburua plazaratu du Hirigoienek, Filip Albor eta Amaia Karrerekin batera.Ttipitik «on» denez kantuak eta ipuinak euskaraz entzutea, haurren beharretara egokitu dute obra.
Jon Zabaleta, HernaniKomik azokan emandako Joseph Camino saria eskuetan duela. ©JON URBE / FOKU

«Marrazteak goizero jaikitzen laguntzen dit»

Enekoitz Telleria Sarriegi

Trazu ezberdin asko dituen bineta erraldoi bat da Zabaletaren bizitza, marrazkiz zirriborratu duena. Hernani bere jaioterrian saritu dute, eta euskal komikiari egindako ekarpena aitortu.
 ©MONIKA DEL VALLE / @FOKU

«Euskaraldia oso neorrealista da»

Urtzi Urkizu

ETB1ek 'Dailobit' saioaren bigarren atala emango du gaur, Euskaraldian izandako bizipenekin. Rutak Leire Palaciosekin batera aurkezten du programa. «Naturaltasunez agertzen saiatzen naiz».

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.