Albistea entzun

Tokio 2020

DOMINA JARRI DU JAPONIAK

Japoniak nabarmen hobetu ditu aurreko Olinpiar Jokoetako emaitzak, ohi bezala judoan eta gimnastikan oinarrituta, baina kirol berrietan ere dominak eskuratuta. Talde kiroletan ere emaitza onak lortu ditu: saskibaloian eta futbolean, adibidez.

Ainara Arratibel Gascon - Berriemaile berezia

2021eko abuztuak 8 - Tokio

Sortzen ari den eguzkiaren herrialde esaten zaio Japoniari. Bada, herrialdean jokatzen ari diren Olinpiar Jokoetan, bertako kirolariak eguzkiaren pare ari dira distira egiten. Dominei erreparatuta, eta Jokoak amaitzeko egun baten faltan, inoizko urre gehien lortu dute: 27. Horiez gain, baita zilarrezko hamabi eta brontzezko hamazazpi ere. Gainera, orain arte nabarmendu gabeko diziplinetan nabarmendu dira kirolari japoniarrak, bai bakarka, bai taldeka.

Japoniak 1912an hartu zuen parte estreinakoz Olinpiar Jokoetan, Stockholmen. Ordutik 22 jokotan izan da, eta, hauetan lortzen ari dena kontuan hartu gabe, 439 domina lortu ditu. Horietatik 142 izan dira urrezkoak, 136 zilarrezkoak, eta 161 brontzekoak. Domina kopuruari erreparatuta, Rioko 2016ko Olinpiar Jokoak oparoak izan ziren. 41 lortu zituen, eta seigarren amaitu zuen zerrendan: hamabi urre, zortzi zilar eta 21 brontzerekin.

Baina urreei begira, ez zen Brasilgoa onena izan. Hamasei lortu zituen Atenasen, 2004an, eta beste horrenbeste herrialdeak Jokoak estreinakoz antolatu zituenean, 1964an.

Marka horiek txiki utziko zituen helburu bat jarri zion Japoniako Olinpiar Batzordeak bigarren aldi honetarako, urreei begira: 30 lortzea. Hau da, orain arteko markarik onena bikoiztea. Inoizko talde handiena osatu dute horretarako, 582 kirolarikoa.

Pandemia iritsi aurretik jarri zituzten helburuak. Izurriak, ordea, dena hankaz gora jarri zuen, Jokoak baldintza oso berezietan eta publikorik gabe jokatzeraino. Zaleen babes hori erabakigarria izan ohi da herrialde antolatzailearentzat, dominak lortzeko orduan.

Helburutik gertu

Hauspo hori gabe, argi esan ez arren, helburuan atzera egitera eraman zuen Japoniako Olinpiar Batzordea. Zera adierazi zuen Yushiro Yamashitak, Batzordeko buruak: «Garrantzitsuena ez da urrezko zenbat domina lortzen den, baizik eta kirolari guztiek beren onena ematea». Hala ere, gaur egun, 30etik oso gertu daude.

Eta hala ari dira Japoniako kirolariak, eta jada bikoiztu egin dute Rioko urre kopura. Esan bezala, gainera, oraindik, egun bat falta da Olinpiar Jokoak amaitzeko.

Baina non lortu du domina gehien? Historian, gimnastikan eta judoan kolkoratu dute garaikur gehien: 98 gimnastikan eta 84 judoan. Urre gehien judoan dute, 39; eta, ondoren, borrokan, 32.

Oraingoan ere judoa izan da emankorrena domina aldetik: 11 lortu dituzte. Horietatik, gainera, bederatzi urrezkoak izan dira. Hala ere, urreez gain, irabazi dituzten bi zilarretatik bada bat bereziki mingarria: talde mistoetan lortutakoa. Finala galdu zuten Frantziaren aurka, eta hori porrota da judoa sortu eta bere egin duen herrialdearentzat.

Talde kirolak

Japonia talde kiroletan ere nabarmendu da bere Olinpiar Jokoetan. Bi adibide nabarmen: emakumeetan, saskibaloi taldea finalera iritsi da, eta gaur goizaldean jokatu du AEBen kontra, finalerdietan Frantziari aise gailendu eta gero; gizonetan, futboleko taldea finalerdietara iritsi da, baina finalerdia galdu egin zuen Espainiaren aurka, eta brontzea lortzeko partida Mexikoren kontra.

Talde kiroletan, urrezko dominak lortu dituzte japoniarrek asko estimatzen dituzten bi kiroletan ere: emakumeek softbolean, eta gizonek beisbolean.

Gimnastika eta judoa dira Japoniaren domina iturri nagusia, baina azken urteetan beste kirol batzuk ere indartu dituzte, eta hori nabaritu egin da Jokoetan. Japoniak dominak lortu ditu aurten lehen aldiz egin diren kiroletan: skateboardingean (hiru urre, zilar bat eta brontze bat), surfean (zilar bat eta brontze bat) eta eskaladan (bi brontze).

Japoniako kirolarien emaitza onak ondo datozkio Japoniako Gobernuari: alde batetik, Tokioko Olinpiar Jokoen kontra dauden edo Jokoen inguruko axolagabetasuna adierazi duten herritarren eragina apaltzeko; bestetik, azkeneko hilabeteetan koronabirus kasuek izan duten igoera ikusgarriak eragindako kezka orekatzeko. Japoniako telebista publikoak ia programazio osoa eskaintzen die Olinpiar Jokoei, kirolari japoniarren lorpenei batez ere.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Oinatz Bengoetxea Leitzan (Nafarroa), pasa den urrian. ©Idoia Zabaleta / Foku

Oinatz Bengoetxeak pilota profesionala utziko du

Paulo Ostolaza

Baikok iragarri duenez, Iruñean jokatuko du bere azken neurketa urtarrilaren 29an. Ordura arte agurreko lau partida jokatuko ditu. Hemeretzi urte egin ditu profesionaletan.

Athletic argitasunik gabe beste behin

Athletic argitasunik gabe beste behin

Ainara Arratibel Gascon

Zuri-gorriek 0-0 berdindu dute Getafaren zelaian. Lehen zatian jokoaren ekimena izan dute, baina argitasuna falta izan zaie. Bigarren zati kaskarra jokatu dute, ordea. Zazpi jardunaldi daramatzate irabazi gabe.

 ©ARITZ LOIOLA / FOKU

«Txapeldun izateak azken lasterketako arantza ateratzeko balio izan dit»

Unai Ugartemendia

Bi aste besterik ez da igaro Sandra Sevillanok International Skyruning Federationeko Europako Ultra Txapelketa irabazi zuenetik. Portugalgo Pisao Extreme lasterketan izan zen.
 ©BERRIA

Aurrera egiten baino ez daki

Julen Etxeberria

Udan iritsi zen Garziandia Hungariara, Pick Szegedera. «Oso gustura» ari da, eta hura eta taldea oso ondo ari dira: lider dira ligan, eta lehia bete-betean daude Txapeldunen Ligako final-laurdenetarako sailkatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.