Amets handitik esnatuta, ilusioa piztu du berriz

Golak. 1-0. Budimirrek (46. min.). 2-0. Abdek (51.min). 3-0. Moi Gomezek (81. min) 3-1. Lazarok (91. min)

Ate bat ixten denean, leiho bat zabaldu ohi da: Kopako finala galdu ondoren, Osasuna sendotu egin zen atzo Europako postuetan sartzeko hautagai gisa. Nagusitasunez irabazi zion Almeriari Sadarren, eta argi gelditu zen denboraldia ez duela amaitutzat ematen. Ezin izan zuten Kopako txapeldun izateko ametsa bete, baina ilusio berri bat dute gorritxoek: Europan barna bidaiatu nahi dute datorren sasoian. Egutegi egokia dute, eta, atzo erakutsi zuten mailari eutsiz gero, erronka egingarria da.

Osasuna partida oso berezi bat jokatu berria zen, eta hori asko nabaritu zen Sadarren. Zaleek gogo biziz egin zuten bultza, eta jokalariek grina handiz jokatu. Joko jario etengabea sortu zuten, Aimar Orozen gidaritzapean. Erakustaldi handia egin zuen nafar gazteak: jokaldi on asko sortu zituen, eta goleko bi pase eman, bata Budimirri, eta bestea Moi Gomezi. Abdek egin zuen gorritxoen beste gola. Sasoi honetako hamaikagarren artelana egin zuen marokoarrak, eta, oro har, amesgaiztoa izan zen Almeriako atzelarientzat.

Gol guztiak bigarren zatian sartu zituen Osasunak. Aurrez ere distiratsu aritu zen, baina ate aurrean asmatzea falta izan zitzaion. Ante Budimirrek izan zuen aukerarik garbiena, 33. minutuan, Aimar Orozen jokaldi eder baten ostean, baina Fernando atezainarekin egin zuen topo. Merezi zuten gola gorritxoek, goitik behera ari baitziren nagusitzen. Erritmo handian mugitu zuten baloia, eta barneraldi ugari egin zituzten bi hegaletatik. Neurketak bakarrizketa itxura ere hartu zuen zenbait unetan.

Nafarrek bigarren zatia hasi orduko kendu zioten kortxoa botilari: Budimirrek sotilki sareratu zuen baloia 46. minutuan, Aimarren pasea jasota; eta bost minutu geroago, Fernandoren ateko armiarma sareak kendu zituen Abdek, eskuinkada itzel batekin. Zerraldo erori zen Almeria, eta ez zuen ia zirkinik ere egin hortik aurrera. Azken txanpan, etxekoen festa biribildu zuen Moi Gomezek, Aimarren beste pase erabakigarri bat probestuz. Vinicius Lazarok 3-1ekoa egin zuen luzapenean. Edonola ere, irribarrez eta ilusioz bukatu zuten lehia gorritxoek.