Albistea entzun

ATZEKOZ AURRERA

Plaza bat, zinez egurasteko

'The Works and Days' dokumentala saritu dute Ikuspuntu jaialdian. Egitarau ofizialaz harago, jende ugari bertaratu da Plaza espazioan egin diren solasaldi, tailer eta doako emanaldietara.
Dozenaka lagun bildu dira egunero Plaza gunean, areto ibiltariko emanaldiak ikusteko.
Dozenaka lagun bildu dira egunero Plaza gunean, areto ibiltariko emanaldiak ikusteko. JAGOBA MANTEROLA / FOKU Tamaina handiagoan ikusi

Ion Orzaiz -

2021eko martxoak 21

Atzo amaitu zen Ikuspuntu, Nafarroako zinema dokumentaleko nazioarteko jaialdia, eta Iruñeko Baluarte auditoriumeko Ganbera aretoan bildu ziren zinemagileak, jaialdiko arduradunak, ikusleak eta kazetari ugari, akreditazioa lepoan zintzilik. Sei egunez, ez-fikziozko zinemaren arnasgune izan da Iruñea, emanaldiak eskaini baitituzte, Baluartez gain, Kondestablearen jauregian, Nafarroako Filmotekan, Planetarioan eta Katakrak liburu dendan.

Aurten, gainera, dokumentalen oihartzuna ez da aretoetara mugatu. Kanpoan, Baluarte plazan, zinemazaleek aukera izan dute filmen egileekin solastatzeko, film laburrez gozatzeko eta jarduera alternatiboetan parte hartzeko. Plaza izena eman diote espazio berriari: topaleku ireki bat, beste baten barruan.

Auditoriumaren parean jarritako karpa, dozena bat mahaitxo, aulkiak eta agertoki txiki bat: hori da, funtsean, Plaza gunea. Formula sinplea, baina oso eraginkorra izurri garaian edukiak jendarteratzeko. Han aurkeztu zuten, besteak beste, Marina Lameiroren Dardara, Berri Txarrak taldearen azken birari buruzko dokumentala. Horrez gain, solasaldiak, tailerrak eta doako emanaldiak eskaini dituzte egunero.

Rick Prelingeren Lost Landscapes filma izan zen atzo proiektatu zituztenetako bat. «Filma gustatu zait, baina, batez ere, interesgarria iruditzen zait gisa honetako dokumentalez gozatzeko aukera zabaltzea», esan du Plaza gunetik atera berri den Mikel Sarriegik: «Egitasmo honengatik izan ez balitz, oharkabean pasatuko litzaizkiguke lan hauetarik gehienak», gaineratu du.

Plazako proiekzio guztiak, baina, ez dituzte aire zabalean egin: kamioi handi baten atzealdea atondu zuten zinema areto ibiltari baten gisara, eta COVID-19aren aurkako neurri ugari ezarri zituzten, «emanaldi seguruak» direla ziurtatzeko. Hala, aulki guztiak desinfektatu dituzte proiekzio baten eta bestearen artean, aretoko ateak zabalik egon dira une oro, aireztatzea bermatzeko, eta edukiera mugatu dute: gehienez, hamabi lagun sar zitezkeen aldi berean.

Hori dela eta, atzo kanpoan gelditu ziren sarrera aldez aurretik erreserbatu ez eta, besterik gabe, leihatilara hurbildu zirenetako asko. «Sanferminetako dokumentala ikusi nahi genuen, baina sarrerak agortu dira», azaldu zuen Maria Luisa Remirezek. Bi lagunekin joan zen eguerdiko emanaldia ikustera, baina ezin izan zuen gonbidapenik lortu.

Izan ere, arrakasta handia izan du Iruñeko Udalak iazko ez-sanferminei buruz ekoitzitako dokumentalak. Bi emanaldi egin dituzte egunero gaztelaniaz denak, eta gehienetan agortu dituzte sarrerak. Atzoko emanaldiaren ostean, negar malkotan atera ziren ikusleetako batzuk. Beste batzuei ez zitzaien hainbesterako iruditu: «Izurri garaian festak bertan behera gelditu zirela eta hainbeste drama egitea... Ez dakit, gehiegitxo iruditzen zait», laburbildu zuen Pedro Martirenak.

Winter eta Edström garaile

Plazako azken emanaldia bukatu eta berehala hasi zen Ikuspuntu jaialdiaren sari banaketa ekitaldia, Baluarten. C.W. Winter eta Anders Edström dokumentalistek jaso zuten filmik onenaren sari nagusia, The Works and Days (of Tayoko Shiojiri in the Shiotani Basin) lanarengatik. Nicole Brenez, James Lattimer eta Antoine Thirion epaimahaikideen esanetan, film «monumentala eta apala» da aldi berean: «Film horrek mundu bat sortzen du, ikusleen buruan loratzen den mundu bat».

Morgan Quaintancek jaso zuen zuzendari onenaren saria, Surviving you, always filmarengatik. Epaimahaikideek maitasun istorio baten gisara definitu zuten dokumentala, «beldurra, irrika eta paranoia ere biltzen dituen maitasun istorio bat».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Gasteizko hainbat gaztek parte hartu zuten atzo erronkan. ©ENDIKA PORTILLO / FOKU

Jolas bat tokiko saltokien alde

Edurne Begiristain

'Googaz 3.0' egitasmoak eta Gasteizko Udalak ihes gela antzeko bat antolatu dute Gasteizen, bertako merkataritza gazteen artean sustatzeko. Hogei taldek parte hartu dute.
 ©JON URBE / FOKU

«Kirola, Euskal Herria eta ofizialtasuna; hiru gai horiekin, amaierara arte»

Jon Ander De la Hoz

Martxel Toledo pilotaren mundutik igaro zen euskal selekzioen ofizialtasunaren alde engaiatzera. Egun, lehen lerrotik aldenduta dago, baina aldarrikapenari eusten dietenak sostengatzen segitzen du oiartzuarrak: «Behar banaute, prest izango naiz».
Hamasei eragileren babesarekin egin zuen atzo agerraldia Netflix Euskaraz taldeak, Durangon (Bizkaia). ©E. PORTILLO / FOKU

Netflix Euskaraz herritar taldeak euskalgintzaren babesa jaso du

Urtzi Urkizu

Netflixi euskarazko edukiak eskatzeko, 10.500 sinadura bildu dituzte. Jarraitu egingo dute sinadura biltzen: 20.000 lortzea da xedea

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna