ATZEKOZ AURRERA

Arnasgune bat bidegurutzean

Bilbo hirigunetik oso hurbil eta herri ugariren bidegurutzean dago Erandioko Akarlanda parkea. Besteak beste, eskalatzeko, paseoan ibiltzeko eta barbakoak egiteko aukera dago han.
Erandioko Akarlanda parkean aukera dago barbakoak egiteko, paseoan, korrika eta bizikletan ibiltzeko, eta eskalatzeko.
Erandioko Akarlanda parkean aukera dago barbakoak egiteko, paseoan, korrika eta bizikletan ibiltzeko, eta eskalatzeko. RAUL BOGAJO / FOKU Tamaina handiagoan ikusi

Uxue Gutierrez Lorenzo -

2020ko azaroak 29

Saskibaloi eta futbol zelaietan, zenbait haur baloiari kolpeka. Asfaltozko bideetan, pertsona maskaradun ugari paseoan. Bide bazterretako bankuetan, eguzkipean, beste zenbait herritar eserita. Jan-edanez betetako mahaien bueltan, familia eta lagun taldeak. Eskalada murruan ere, gazte ugari horma malkartsuetan gora. Haurren zirrara oihuez eta lagunarteko elkarrizketez gain, isiltasuna da nagusi. Larunbat goiza da, eta udazken kolorez jantzita dago Erandioko Akarlanda parkea (Bizkaia). Hosto marroixkaz beteta daude belardi eta bideak, eta bazter guztietan dabiltza arnasguneari zukua atera nahi dioten herritar taldetxoak.

Parkeak aukera ematen du ekintza ugari aire zabalean egiteko: korrika egin, paseoan ibili, eskalatu, bazkaldu, eguzkitan etzan... eta garaiotan are esanguratsuagoa den zerbait eskaintzen du Akarlandak: espazio estrategikoa da askorentzat. Hamaika herrirekin egiten du muga; eta, hain zuzen, hartutako azken neurrien arabera, posible da herri mugakideetara joatea aisialdi arrazoiak direla medio. Bilbo, Leioa, Getxo, Berango, Urduliz, Loiu, Sondika, Barakaldo, Sestao, Laukiz eta Loiuren artean dago Akarlanda. Herri eta hirien aztoramenetik at, arnasgune bat da bidegurutzean.

Askok buruari eragin eta neurriak errespetatuz aisialdiaz gozatzeko zirrikitua aurkitu dute Akarlanda parkean. Nagore Otazuak horrela topatu du amarekin eta ahizparekin elkartzeko espazioa. «Ni Bilbon bizi naiz , baina ama eta ahizpa, Urdulizen; Erandio da justu bien artean dagoen herria». Mahaiaren bueltan elkartu dira, etxetik ekarritako janaria aire zabalean dastatzeko prest. «Etxetik kanpo egoteko aitzakia ona da; aste barruan ezin gara hirigunetik mugitu, eta asteburua aprobetxatzen dugu Bilbo jendetsu eta zaratatsutik atera eta lasai egoteko». Udazkeneko egun laburrak gozatu, eta ilundu arte geratuko dira Akarlandan. Bazkaria prest dute, eta Otazuaren alaba, jostailuzko kamera eskuetan, han eta hemen ari da argazkiak ateratzen. Amama ere pozik, bilobekin egoteko tartea duelako.

Tapaki baten gainean, belardian eserita dago Patricia Garcia, eta alaba txikiarekin jolasten ari da. Familiarekin lotzeko toki estrategikoa da Garciarentzat Akarlanda. «Gu Bilbotik gatoz, eta familia Getxon dugu. Erandio erdibidean dago, eta hemen geratzen gara elkar ikusi ahal izateko». Beti izan dute parkea hurbil, baina aitortu du herriz herriko konfinamendua ezarri denetik egin dutela parkera eguna pasatzera joateko hautua.

Semea eskalatzen ari den bitartean, alaba txikiari bazkaltzen ematen ari da Ruben Gomez, bankuan eserita. «Nire loba sarritan etortzen da hona eskalatzera, eta semeak lehengusinarekin batera eskala dezan etorri gara». Bilboko Zorrotza auzotik joan dira Akarlandara Gomez eta familia. «Azaro amaiera izateko, eguraldi zoragarria dago, eta, tabernak itxita daudenez, aukera bikaina da parkera etortzea». Gomezek azaldu duenez, gutxitan joaten da Akarlandara, baina lobaren bidez jakin du azkenaldian jende gehiago dabilela. «Lobak esan digu normalean asko jota bizpahiru pertsona egoten direla eskalatzen, eta gaur dozena bat dabiltza eskalada murruaren inguruan».

Gertukoari erreparatu

Eskalatzera joan ohi da Jon Aberasturi Akarlandara, baina gaur bi zuhaitz enborren artean lotu du slackline egiteko xingola. Parkean dauden euskarriez gain, posible da kirol eta jarduera gehiago egitea etxetik eramandako gailuekin. Aberasturik xingola probatzeko tokia aurkitu du parkean. «Egia esan, konfinamendu garaian erosi nuen slackline egiteko xingola, eta neurri berriek inguru hurbilean ditudan parajeei gehiago erreparatzera behartu naute».

Paco Ibañez bankuan eserita dago, eguzkitan. Erandiokoa da bera, herrikoa, eta urteak daramatza ia egunero parkeko bideetan gora eta behera paseoan: «Inguru hau ondo zaindu behar dugu; ezin dugu hau galtzen utzi: ezinbestekoa dugun arnasgune bat da».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Arduraz komunika dezagun

Antxeta irratiak ‘Arduraz komunika dezagun’ dokumentala egin du

Urtzi Urkizu

Hedabideen hizkuntzaren erabilera berdintasunaren ikuspegitik aztertu dute herri ekimeneko euskarazko hedabideetako zenbait emakumezko kazetarik. Dokumentala ikusgai, albistearen barruan.

 ©JAIZKI FONTANEDA / FOKU

«Neure buruarekin hobeto sentitzen naiz gitarra jotzen dudanean»

Jone Arruabarrena

Gasteizko Oihaneder Euskararen Etxeak antolatutako 'Egin leku' gazteentzako musika deialdiaren irabazleetako bat da Zulaika. Azalera taldea atzean utzita, bakarlari dabil orain.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna