Albistea entzun

Rayo 0-3 Osasuna

Ondo olioztatuta dago

Osasunak nagusitasunez irabazi dio Rayori, lehen zatian hautsi duen partida batean. Bigarren garaipena kateatu du etxetik at, eta 32 puntu ditu jada
Osasunako jokalariak, Ruben Garciak sartutako gola ospatzen, gorritxoen bigarrena, atzo, Vallecasen.
Osasunako jokalariak, Ruben Garciak sartutako gola ospatzen, gorritxoen bigarrena, atzo, Vallecasen. MARISCAL / EFE Tamaina handiagoan ikusi

Eñaut Agirrebengoa -

2022ko otsailak 13

Golak. 0-1: Moncayolak (9. min.). 0-2: Ruben Garciak (39. min.). 0-3: Kike Garciak (93. min.). Epailea. Figueroa Vazquez. Txartel horiak: Rayoko Alvarori eta Saveljichi; eta Osasunako Vidali. Bestelakoak. 8.586 ikusle Vallecasen.

Osasunaren makineriak jada ez dauka herdoilik. Garaipen lehorteak ugertuta utzi zuen, baina olioztatu egin dute gorritxoek azken bost lehietan lortu dituzten hamar puntuek. Horietatik hiru atzo lortu zituzten, Rayoren zelaian. Partida sendoa eta eraginkorra jokatu zuten, eta guztiz merezita irabazi zioten Andoni Iraolaren taldeari. Etxetik kanpo denboraldi ikusgarria ari dira osatzen: atzokoa seigarren garaipena dute Iruñetik urrun. Dagoeneko 32 puntu dituzte zakuan; beraz, salbazioa berriz ere aurrerapenez lortzeko moduan daude.

Jagoba Arrasatek ehungarren aldiz zuzendu zuen Osasuna Espainiako Lehen Mailan. Hamaikakoan ezusteko aldaketak egin zalea zen lehen, baina azkenaldian jokalari sorta finkoa ari da zelairatzen. Atzo, esate baterako, Nacho Vidal eta Darko Brasanac izan ziren berritasun bakarrak; biak ere, zigorra bete ostean itzuli ziren taldera. Bestela, Sevillaren aurka titular gisa aritu ziren jokalari berberek hasi zuten norgehiagoka.

Beti antzeko hamaikakoa erabiltzeak lanak erraz diezazkioke aurkariari. Aldiz, jokatzen dutenek buruz dakite teknikariak zer nahi duen eta taldekideak nondik nora dabiltzan. Atzo, erabateko elkar ulertzea izan zen jokalari gorritxoen artean. Rayon, ordea, txandakatzeak egin zituen Iraolak, Kopako lehia jokatu ondoren, eta txinparta galdu zuen taldeak. Hori, neurri handi batean, nafarren meritua izan zen, Rayori ez ziotelako arnasa hartzen utzi. Hertsiki estutu zuten haren zelaian, ondo antolatutako presioaren bidez. Eta erasoan, zuzen eta zorrotz jardun zuten, itzulingururik gabe.

Bizitasun handiz ekin zioten partidari; hainbeste, ezen 10. minutua betetzerako jada aurretik baitziren markagailuan. Moncayolak etekina atera zion Budimirren borrokarekin hasi eta Avilaren fedeari esker arriskutsu bihurtu zen jokaldiari. Argentinarra ahalegindu zen Ruben Garciaren erdiraketa luzea zelaitik atera ez zedin, eta Moncayolak area txikiaren ertzetik sareratu zuen baloia, aurrelaria balitz bezala. Maiz agertu zen arean; erdilariei asko igotzeko eskatu zien Arrasatek, mehatxua handitzeko.

Osasuna ez zen gol bakarrarekin konformatu, eta nagusi izaten jarraitu zuen, jokoaren zentzu guztietan. Bigarren baloi gehienak Nafarroako taldearentzat izan ziren, eta hori izan zen lehen zatiko gakoetako bat. Beste giltza Rayoren atean egon zen: zalantzati aritu zen Dmitrievski atezaina. Lehenik, irteera ustela egin zuen, eta buruz errematea egiteko aukera eman zion Budimirri. Gero, komeriak izan zituen Ruben Garciaren falta bihurri bat gelditzeko. Eta 39. minutuan, ez zen gauza izan erdilari gorritxoaren ezkerkada gelditzeko. Jaurtiketa itzela izan zen, baina atezainari eskuak tolestu zitzaizkion.

Hala, neurketa ia erabakita utzi zuen Nafarroako taldeak. Errentari eustea besterik ez zeukan etxetik kanpo bigarren garaipena kateatzeko. Ez zirudien erronka zailegia, lehen zatian Rayok ia kilimarik ere ez baitzion egin. Alabaina, etxekoek estutu egin zuten bigarren zatian. Lehen aukera garbia Osasunak izan zuen, Moncayolaren bidez, baina erdilariak gora jaurti zuen penalti puntutik. Hortik aurrera, Rayoren aukeren segida iritsi zen. Garbienak Ntekak eta Falcaok izan zituzten, baina Herrerarekin egin zuten topo. Atezain gorritxoa erabakigarria izan zen berriro, iragan partidan Sevillari penaltia gelditu ostean.

Falcaok gola sartu zuen geroago, baina eskuarekin, argi eta garbi. Balekoa izan zen, ordea, Kike Garciak luzapenean sartu zuena. Ordezkoen arteko jokaldia izan zen. Osasunaren makineria ondo olioztatuta dagoen beste erakusgarri bat.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

Donato Larretxea, entrenatzeko bere tokian ©Ainhoa Larretxea

Herritarren beroa jasoko du

Ainhoa Larretxea - Nafarroako Hitza

Donato Larretxea aizkolariari omenaldia eginen diote gaur Arantzan (Nafarroa), haren sorterrian. 12:00etan herri kirol saio bat eginen dute, eta, gero, herri bazkaria izanen dute frontoian.

Luis Suarez, Uruguaiko aurrelaria, negarrez, Munduko Kopatik kanporatua izan ostean. ©ALBERTO ESTEVEZ / EFE

Oraingoan erre egin da

Ainara Arratibel Gascon

Uruguai kanpoan geratu da, eta Hego Korea sailkatu da H multzoan. Brasil eta Suitza dira G multzoko sailkatuak
Brasilgo jokalariak, multzoen faseko bigarren jardunaldian Suitzari sartutako gola ospatzen. ©ALBERTO ESTEVE / EFE

Zerrenda ez da asko aldatu

Iñaki Berastegi

Munduko Kopa irabazteko hautagai gehienek egin dute aurrera multzoen fasean. Alemania eta Belgika izan dira dezepziorik handienak: ez dira iritsi kanporaketetara.
Dohako Al-Thumama estadioa. Munduko Futbol Txapelketarako eraiki diren zazpi estadioetako bat da. ©EFE

Zuriketa berdearen adibide

Gorka Berasategi Otamendi

Qatarrek ziurtatu du aurtengo Munduko Futbol Txapelketa karbonoan neutroa izango dela, baina, Carbon Market Watchen txosten batek salatu duenez, baieztapen hori okerra eta nahasgarria da.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...