Albistea entzun

Cadiz 0-2 Alaves

Altxorra itsas hondoan

Alavesek sasoiko bigarren garaipena lortu du Cadizen, Joseluren bi goli esker. Berehala jarri da aurretik, eta, latz sufritu ostean, lehia erabakita utzi du amaieran
Joselu Mato Alaveseko aurrelaria, partidako lehen gola ospatzen, atzo, Cadizen.
Joselu Mato Alaveseko aurrelaria, partidako lehen gola ospatzen, atzo, Cadizen. ROMAN RIOS / EFE Tamaina handiagoan ikusi

Eñaut Agirrebengoa -

2021eko urriak 24

Golak. 0-1: Joseluk, penaltiz (6. min.). 0-2: Joseluk (91. min.). Epailea. Alberola Rojas. Txartel horiak: Alaveseko Miazgari eta Ximo Navarrori. Bestelakoak. 15.000 ikusle inguru Nuevo Mirandilla estadioan.

Partidak irabazteko formula aurkitu du Alavesek: gola berehala sartu, eta lorturiko aldea zain eta muin defendatzea. Hala gailendu zitzaion Atletico Madrili zazpigarren jardunaldian, eta modu berean erdietsi zuten atzo denboraldiko bigarren garaipena, Cadizen zelaian. Oso bolada makurrean zegoen Javi Callejaren taldea, eta, halakoetan, kosta ahala kosta irabazi behar da, asko sufrituta eta gutxi gozatuta bada ere. Pragmatismoa eta erresistentzia. Apaingarriak, beste baterako. Erasoan eraginkorra eta defentsan sendoa izan zen atzo Alaves, eta, bigarren zatian itolarri latza izanagatik, altxorra atera zuen itsas hondotik. Emaitzak teknikariaren esanak berretsi zituen: taldeak ez du amore eman oraindik.

Modurik onenean hasi zuen norgehiagoka, penaltiz 0-1ekoa eginda. Joseluri falta egin zioten area barruan, eta aurrelaria bera arduratu zen jaurtiketaz. Erdi-erditik sareratu zuen baloia, indarrez, arriskurik hartu gabe. Arabarrek etxetik kanpo egindako lehen gola izan zen, eta denboraldi osoko hirugarrena. Balio handikoa zen Callejaren mutilentzat, eta, horren jakitun, sariari eusteko lanera bideratu zituzten ia ahalegin guztiak. Laneko atorra soinean, pikotxa eta pala eskuan.

Hasieran, eroso eutsi zioten Cadizi. Tinko defendatu zuten Pachecoren area Cadizen erdiraketa ugariez. Gainera, baloiarekin argitasuna izan zuten zenbait minutuz. Manu Garcia, Toni Moya eta Pellistri izan ziren horren erantzuleak. Hain justu, uruguaitarra 0-2koa egiteko zorian izan zen 30. minutuan, baina erabakimena falta izan zitzaion Ledesma gainditzeko. Lokartu egin zen, eta gainera etorri zitzaion Espino. Lehenago, Duarteren erdiraketa pozoitu batek gutxirengatik ez zuen bukatu Cadizen ate barruan.

Egoera kontrolpean zuten gasteiztarrek. Azken ordu laurdenean, baina, aurrerako urratsa egin zuen Cadizek, eta atzean gotortu beste erremediorik ez zuen izan Alavesek. Dena den, apenas sortu zioten aukerarik. Sobrinoren jaurtiketa gurutzatu bat eta Alarconek buelta erdian eginiko errematea izan ziren etxekoen hurbilketarik onenak lehen zatian. Eskuin hegaletik erdiraketa batzuk egin zituzten elkarren segidan, baina ez zuten modurik topatzen Laguardiak, Miazgak, Duartek eta Loumek altxaturiko harresia gainditzeko. Nabarmentzekoa izan zen erdilari senegaldarraren jarduna, gotik garaiezina izan baitzen. Hori bai, arazo gehiago izan zuen baloiarekin.

Etxekoek azeleragailua sakatu zuten aldageletatik bueltan. Indarberrituta zelairatu ziren, berdinketaren gola ahalik eta azkarren lortzeko intentzioz. Setiatu egin zuten Alaves; orduan bai, gogotik sufritu beharrean izan zen Arabako taldea. Pereak erotu egin zuen eskuin hegalean, goi-mailako bakarkako jokaldiekin. Bestalde, Pacheco bere onena ematera behartu zuten Negredoren erremate akrobatikoek. Beste jokaldi batean, etxekalte aritu zen Ximo Navarro, atezainari pase txarra emanda, eta Laguardiak atepetik atera behar izan zuen baloia. Erauntsiari ozta-ozta ari zitzaizkion eusten arabarrak.

Joselu, barkatu eta asmatu

Haatik, Cadizen grina apalduz joan zen pixkanaka. Ez zuen olatua baliatu, eta, etxekoen aparraldia igarota, Alavesi aukerak zabaldu zitzaizkion partida erabakita uzteko. Lehenik, Edgarri gol bat baliogabetu zioten, jokoz kanpo zegoelako; geroago, Riojak ez zuen asmatu kontraeraso azkar bat behar bezala bukatzen; eta hurrena, Joseluk erdi-erdira errematatu zuen korner bat, dena alde zuela. Ordea, ez zuen kale egin 91. minutuan, Haroyanek eta Ledesmak atzean egindako oparia baliatuta. Miguel de la Fuentek hondoko marratik pasatu zion baloia, eta aurrelariak arazorik gabe sareratu zuen.

Hortaz, kolpea eman zuen mahai gainean, bi gol sartuta, eta arnasa hartzeko aukera eman zion taldeari. Garaipenak ez dio balio jaitsieratik irteteko, baina, behintzat, argia dakusa tunelaren bukaeran. Datorren asteartean beste pauso handi bat emateko aukera izango du, Elxen aurka, Mendizorrotzan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Oinatz Bengoetxea Leitzan (Nafarroa), pasa den urrian. ©Idoia Zabaleta / Foku

Oinatz Bengoetxeak pilota profesionala utziko du

Paulo Ostolaza

Baikok iragarri duenez, Iruñean jokatuko du bere azken neurketa urtarrilaren 29an. Ordura arte agurreko lau partida jokatuko ditu. Hemeretzi urte egin ditu profesionaletan.

Athletic argitasunik gabe beste behin

Athletic argitasunik gabe beste behin

Ainara Arratibel Gascon

Zuri-gorriek 0-0 berdindu dute Getafaren zelaian. Lehen zatian jokoaren ekimena izan dute, baina argitasuna falta izan zaie. Bigarren zati kaskarra jokatu dute, ordea. Zazpi jardunaldi daramatzate irabazi gabe.

 ©ARITZ LOIOLA / FOKU

«Txapeldun izateak azken lasterketako arantza ateratzeko balio izan dit»

Unai Ugartemendia

Bi aste besterik ez da igaro Sandra Sevillanok International Skyruning Federationeko Europako Ultra Txapelketa irabazi zuenetik. Portugalgo Pisao Extreme lasterketan izan zen.
 ©BERRIA

Aurrera egiten baino ez daki

Julen Etxeberria

Udan iritsi zen Garziandia Hungariara, Pick Szegedera. «Oso gustura» ari da, eta hura eta taldea oso ondo ari dira: lider dira ligan, eta lehia bete-betean daude Txapeldunen Ligako final-laurdenetarako sailkatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.