Albistea entzun

Reala 4-1 Eibar

Eibarren jai, Donostian festa

Realak irabazi du Eibarren aurkako derbia. Donostiarrek nahieran jardun dute bigarren zatian; haien erritmoari segitu ezinik aritu dira armaginak
JON URBE / @FOKU Tamaina handiagoan ikusi

Jon Ander De la Hoz -

2019ko abenduak 1 - Donostia

Golak. 1-0.: Le Normandek (25. min) 1-1.: Diopek (35. min.). 2-1.: Oiartzabalek (47. min.). 3-1.: Willian Josek (57. min.). 4-1. Odegaardek (80. min.). Epailea. Del Cerro Grande. Txartel horiak: Realeko Zalduari; eta Eibarreko Ramisi, Diopi, Oliveirari, eta Escalanteri. Bestelakoak. 28. 612 ikusle Anoetan,

San Andres eguna zen atzo, egun handia Eibarren, baina Donostiako taldeak egin zuen festa. Realak aise azpiratu zuen Eibar, lau eta bat, eta zapuztu egin zuen armaginen jaia. Bi taldeak garaipen egarriz zelairatu ziren Reale Arenan, baina etxekoak hobeto moldatu ziren orain egun gutxi berritutako zelaian.

Derbi eguna zen, baina harmailek ez zuten halako itxurarik. Azaroaren azken egunak murriztu egin zuen eibarzaleen presentzia, eta, eguraldi kaskarraren ondorioz, etxean geratu ziren donostiarren zale asko. Bertaratu zirenak, ordea, bero atera ziren Anoetatik; sasoi honetako gol sardarik handiena sareratu zuten Imanol Alguacilen jokalariek.

Hasi, berri txarrekin hasi zen norgehiagoka etxekoentzat. Seigarren minuturako min hartu zuen Aritz Elustondok, eta zelaitik atera behar izan zuten kolpe baten ondorioz. Robin Le Normandek ordezkatu zuen Beasaingo atzelaria, eta ezin hobeto aprobetxatu zuen bere aukera bretainiarrak. Korner batean buruz errematatu zuen, eta Dimitrovicen atean sartu zuen baloia. Gisa horretara lortu zuen bere lehendabiziko gola gorengo mailan.

Hurrengo minutuetan beren nagusitasunari eutsi zioten donostiarrek, baina arrakala handitzea lortu gabe. Indarrek berdintzera egin zuten gero, eta aurrerapauso bat eman zuen Eibarrek. Ondo atera zitzaien jokaldia Jose Luis Mendilibarren jokalariei; hurrengo minutuetan erasora egin zuten, eta aurkitu zuten Alex Remiroren atea zulatzeko zirrikitua.

Zutoinera botatako jaurtiketa baten aldaratzea Pape Diopi iritsi zitzaion, eta hark indarrez jaurti zuen baloia txuri-urdinen atera. Lehen zatia amaitzerako, indarrak orekatu zituen armaginen jokalariak. Lehen zatiaren hondarrean, bi taldeak saiatu ziren aurkaria estu hartzen; saialdi horietan Realak izan zituen aukerarik nabarmenenak, baina ez zuten lortu nahi besteko minik egitea. Bi taldeak berdinduta joan ziren atsedenaldira.

Epaileak jokoa berrekin orduko, baina, urrats bat aurrera egin zuen Realak. Alguacilenek beren legea ezarri zuten bigarren zatian; jokoan gehiago izan ziren etxekoak, baina xehetasun txikiek bota zuten balantza Realaren aldera. Haiek erabaki zuten neurketa.

Bigarren zatia hasi bezain pronto handitu zuen aldea Mikel Oiartzabalek. Bere herriko taldearen atea zulatu zuen eibartarrak, ondoen egiten dakien eran: zarata handirik atera gabe, baina unerik garrantzitsuenean aurkariari min eginez.

Aurretik zen Reala, eta Eibar zer egin ez zekiela geratu zen. Geldikako jokaldietan min egin zietela azaldu zuen Mendilibar Eibarko prestatzaileak partidaren amaieran: «Bigarren zatian oso gaizki atera gara. Erraz egin digute gola. Gure aldaratzeak haiengana joan dira, eta min handia egin digute haietan». Hurrengo minutuetan ere egoerak ez zuen hobera egin bisitarientzat; markagailuan aurretik jarrita, hazi egin ziren txuri-urdinak, eta partidaren jabe egin ziren gutxika-gutxika.

Gustura agertu zen Imanol neurketaren amaieran, eta berdinketako golaren ostean bere jokalariek izandako jarrera goraipatu zuen: «Akatsek ez dute zalantzarik ekarri behar; bestela, jai dago. Berdinketaren ostean, baloia jaitsi behar genuen, jokatu. Horretan segitu behar genuen, eta egin dugu. Horrek eman digu garaipena».

Ordutik eta partida amaitu bitartean ez zuen atsedenik hartu Realak. Oso distiratsu jokatu gabe, baina erreskadan sartu zituen golak, eta Eibarrek ez zuen aukerarik izan neurketari berriz ere heltzeko.

Partidak aurrera egin ahala, aldea handitu zuten etxekoek; bazekiten partida garrantzitsua zela azkenaldiko makalaldiari amaiera emateko. Willian Josek sartu zuen donostiarren hirugarren gola; brasildarrak bularrarekin kontrolatu zuen baloia, eta Dimitrovic ez iristeko moduan sareratu zuen baloia. Sasoi onean da aurrelaria; etenik gabe ari da golak sartzen.

Odegaard, sariaren bila

Garaipena zakuan zuela, nahieran aritu zen Reala azken minutuetan. Txuri-urdinen artean, Martin Odegaardek zuen partida zukutzeko asmorik handiena, eta saialdiek fruitua eman zioten neurketa amaitzeko hamar minutu falta zirela. Ordurako, Realak azpiratua zuen Eibar, baina armaginek ez zuten etsitzeko asmorik, eta erasora jo zuten ahal izan zutenetan. Jokaldi haietako batean, kontraerasora jo zuen Realak, eta Cristian Porturen pase bat jaso zuen Odegaardek; erdilari norvegiarrak eskuadrara jaurti, eta geratu ezinezko gola sartu zuen.

Gehiagorako aukerarik gabe, Anoetan geratu ziren gipuzkoarren arteko derbian jokoan zeuden hiru puntuak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Iñaki Williams, David Alabarekin lehian, Real Madrilen aurka jokatutako Espainiako Superkopako finalean. ©JULIO MUÑOZ / EFE

Zailenak, baina etxekoen babesaz

Julen Etxeberria

Athleticek Real Madril izango du aurkari Espainiako Kopako final-laurdenetan, eta Realak, Betis. Biek etxean jokatuko dute kanporaketako partida bakarra, otsailaren 3an

Mendizale bat erreskateko helikopteroari begira, Belaguako aterpetxearen inguruan. ©JESUS DIGES / EFE

Mendia ez dago edonorentzat

Unai Ugartemendia

Urtea hasi zenetik bost mendizale hil dira Pirinioetan. Azken astean gehiago korapilatu da kontua, eguraldiak asko aldatu baitu elurraren egoera. Zuhurtzia eskatu dute.

Gernikako Itziar Ariztimuño eta IDK-ko Yurena Diaz lehian, lehen itzuliko partidan. ©MONIKA DEL VALLE / FOKU

Atzerapenez ahaztu nahi dute

Ainara Arratibel Gascon

Derbia jokatuko dute bihar eguerdian, Donostiako Gaska kiroldegian, IDK Euskotrenek eta Lointek Gernika Bizkaiak. Bi taldeak «gogotsu» dira, behingoz segidan lehiatu ahal izateko.

Alexander Sorloth eta Yeray Alvarez lehian, Anoetan jokatutako derbian. ©Gorka Rubio / Foku

Athletic-Real Madril eta Reala-Betis, Espainiako Kopan

Julen Etxeberria

Zuri-gorriek eta txuri-urdinek etxean jokatuko dute final-laurdenetako partida bakarra, otsailaren 3an

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.