Garaipenik onena, itzultzea

Ezohiko itxurarekin zabaldu ditu ateak Galarretak. Protokolo zorrotza bete behar izan arren, berrehun lagunetik gora elkartu dira harmailetan, eta ilusioa nagusitu da. Emaitzak izan dira gutxienekoak.
Ikusle bat, maskara jantzita, atzo, Galarreta pilotalekuan.
Ikusle bat, maskara jantzita, atzo, Galarreta pilotalekuan. JON URBE / FOKU Tamaina handiagoan ikusi

Jon Eskudero -

2020ko ekainak 21

Azkena izan zen erretiratzen, eta lehena itzultzen. Duela hiru hilabete pasatxo azken jaialdia jokatu ondoren, erremontearen katedralak atzo zabaldu zituen ateak berriz ere, eta ez edonola. 200 lagunetik gora elkartu ziren Hernaniko (Gipuzkoa) Galarreta frontoian, eta guztiek izan zuten irribarrea ahoan. Protokolo zorrotza jarraitu behar izan arren, pozik eta ilusioz egon ziren harmailetan jaialdia ikusten, eta sekula baino gehiago baloratu zuten aukera hori. «Luze joan da geldialdia, buruhauste ugari izan ditugu, baina berriz ere hasteak sekulako ilusioa piztu digu. Pilotazaleak oso pozik egon dira», aitortu zuen Joxe Mari Barrenetxea Oriamendiko arduradunak. Eta bai, gustura hartu zuten etxerako bidea pilotazaleek.

Jaialdia abiatu baino ordu erdi lehenago suma zitekeen egun berezia zela pilotarentzat. Ezohiko itxura zuen Galarretaren kanpoaldeak, ohi baino auto gehiago baitzeuden aparkatuta. Ilusioaz gain, urduritasun apur bat ere nabari zitekeen pilotari zein pilotazaleen artean. Frontoira sartu baino lehen, neurri zorrotzak bete behar izan zituzten guztiek. Besteak beste, banaka-banaka tenperatura hartzen jardun zuten Oriamendiko kideek, eta eskuak desinfektatzea ere derrigorrezkoa zen. Behin frontoira sartuta, harmailetako aulki ugari zigilatuta zeuden. Barrenetxearen esanetan, beharrezkoa baitzen bi metroko distantzia mantentzea. «Ertzaintzaren bisita jaso dugu, ziurtatu nahi baitzuten dena egoki genuela, eta halaxe izan da. Jendearen erantzuna bikaina izan da, guztiek bete dituzte ongi neurriak, eta etapa berri baten hasiera izan da». Pilotazale orok izan zuen maskara jantzita.

Neurriak zorrotz bete ahal izateko, Oriamendik ohi baino lagun gehiago ipini zituen lanean, batez ere jendearen jarrera kontrolatzeko. Dena den, pilotazaleek ez zuten inolako arazorik eragin. «Etxetik etortzerako bagenekien nolako egoera topatuko genuen, eta gure helburu bakarra partidak ikustea zen. Ez da oso erosoa maskara jantzita egon beharra, baina puska batean hala egon beharko dugu», adierazi zuen Patxi Jauregik, Galarretara bildutako pilotazale batek. Haren esanetan, premia zuen frontoi batean izateko. «Telebistan bideoteka bidez eskaintzen dituzten partidak pozik ikusten dira, baina ez da nahikoa. Pilota zuzenean ikustea beste gauza bat da». Jauregiren iritzi berekoa da Lurdes Zabala ere. «Sarritan etortzen nintzen Galarretara, eta faltan sumatu dut. Pilota zuzenean ikusteaz gain, gustatzen zaigu gainerakoekin iritzia partekatzea, eta oso pozik egon gara. Gainera, gutxitan bezalako jendetza bildu da, eta horrek poz bikoitza eragiten du».

Pilotariak ere gustura

Pilotazaleak ez ezik, pilotariek ere sentimendu pozgarriak azaldu zituzten. Horietako bat izan zen Imanol Ansa. «Emaitza zen gutxienekoa. Pilotarion artean komentatzen genuen nolako egoera topatuko ote genuen, eta Galarretak izan duen jarrera bikaina izan da. Sinatuko genuke larunbatero berrehun lagun batzea. Ez gaude jendetza horietara ohituta, eta baikorrak gara aurrera begira».

Galarretaren 50. urteurrenaren Txapelketako emaitzei dagokienez, Ansa-Larrañagak 35-23 irabazi zieten Goikoetxea V.a-Barrenetxea IV.ari. Beste partidan, berriz, Juanenea-Endika izan ziren garaile, Urriza-Zubiriren kontra: 35-28. Txapelketak datorren larunbatean izango du jarraipena, ligaxkako bigarren saioarekin.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Santos Indurain kontseilaria prentaurreko batean, artxiboko irudian. ©Jesus Diges/EFE

324 kasu atzeman dituzte Hego Euskal Herrian

Berria

Kasuen beherakada orokorra izan da herrialde guztietan: Araban 44 kasu detektatu dituzte (-31); Bizkaian, 180 (-31); Gipuzkoan, 35 (-29); eta Nafarroan, 59 (-87). Nafarroako Gobernuak ez du neurri orokorrik ezarriko oraingoz. «Atzokoa ez zen alarma guztiak pizteko modukoa, eta gaurkoa ez da kriskitinak jotzekoa», adierazi du Santos Indurain Osasun kontseilariak.

Gizon bat PCR proba egiten, Donostian. ©Gorka Rubio / FOKU

Hogei milioi koronabirus kasu baino gehiago detektatu dituzte mundu osoan

Oihane Puertas Ramirez

COVID-19a 188 herrialdetara iritsi da, eta 736.000 lagun baino gehiago hil ditu.

Zahar etxe bateko egoiliarrak paseoan, artxiboko irudian. ©Marisol Ramirez/FOKU

Donostiako zahar etxe bateko egoiliar batek positibo eman du

Berria

Zahar etxe bereko bi langile ere kutsaturik daude.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Agerraldi bat detektatu dute Murillo el Fruto eta Zarrakaztelu inguruan

Berria

30 positibo atzeman dituzte; gehienak, laborarien artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna