Albistea entzun

ATZEKOZ AURRERA

Mundu batetik bestera

EHZ Nomadak Baionan pausatu zuen bere karabana atzo, hirian barna eskaintzen diren ostatu eta plazak bereganatuz; gaur Itsasura doa, Laborantza Ganberaren zikiroarekin.
Rebecca M'boungourekin Kongoko dantzak ikasi eta gozatu dituzte Baionako karriketan.
Rebecca M'boungourekin Kongoko dantzak ikasi eta gozatu dituzte Baionako karriketan. AURORE LUCAS Tamaina handiagoan ikusi

Nora Arbelbide Lete -

2018ko uztailak 1 - Baiona

Baionako hiriguneak ematen du nomada izateko aukera. Bidaiatzen da laster batean, preziorik merkeenean. Ostatu batetik bestera, plaza batetik bestera, mundu batetik bestera sartzen da. Baiona Ttipi atarian, hor dago bikote bat ezkontzako jantzi zurietan, auto bilduma zahar batetik atera auto batekin, xingolaz betea, tuta joka, bere egun handia ingurukoei partekatu nahian. Baina trajeak ez dio ongi eusten eguzkiaren beroari. Eta, dena den, bada besterik begiratzeko ere. EHZk eskaini egitaraua gozatzera bilduak dira handik hurbil.

Batzuetan, ate bakar bat ere aski da munduen bereizteko. Horra beste argazki bat. Baiona Ttipiko Pyrenees ostatua. Barnean, telebista piztua. Beste ostatu anitzetan bezala, funtsean. Jendea metatua aitzinean. Ezin zitekeen bestela. Munduko Futbol Kopa da. Nor, eta Frantzia Argentinaren aurka. Eta kanpoan, justu hortxe, atearen bestaldeko plazan, Miarritzeko dantza eskolako dantzariak. Hip hop mugimenduetan. Eguzkiaren beroa desafiatzen, beren dantzaz izerditzen diren indarrarekin. Baita telebistan agertzen diren golei desafioa ere. Performance zirraragarria.

Hortik landa, Xaho plazan izan da zirkua. Eta hor ere desafioa. Frantziak sartu gol bakoitzaren oihartzunari errefera, han eta hemen entzuten diren oihuak tarteka. Azkenean, Frantziak irabazi du. Eta horra besta ezberdinak metro karratu beretan.

Hortik laster euria da etorri. Euri zaparrada. Eta hor beste desafio mota bat. Euririk gabe, EHZ ezin EHZ izan. Hori dio zale batek. Nola edo hala ironiaren bidez ea gaina hartuko ote dion EHZren patuari. Iaz EHZ bertan behera utzi behar izan baitzuten ekaitzagatik. Baina aldi honetan, desafioari gaina hartu ahal izan diote. Baionak eskaintzen baitu aukera hori. Harresi barneetako lurpwko Magneto gelan bururatu ahal izan dute gaualdia. Leku guztiak salduak zituztela.

Bien bitartean, ezin aipatu gabe utzi goizeko bidaia gomita. Errekaleortik Notre-Dame-des-Landesko aireportu xedearen kontrako BBGra egin bidaia. Nondik eta Patxokitik. Han jarri dute eztabaida gunea. Nahiz eta ez usaiako EHZ izan, bere leku naturala aurkitu du hortxe. Izan ere, autokudeaketa mugimenduetako proiektuak eta haien saretzea izan dute lehen mintzaldia. Eta saretze horretan, justuki, EHZko eztabaida guneak izana du bere eragina. Hortik sortu da, nonbait, Aman Komunak sarea. Oraino definizio fasean da sarea, baina hiru hilabetean behin biltzen dira, auzolana eta solasa tarteko.

Bigarren mintzaldia ere nolabaiteko bidaia bat izan da. Iheslarien egoera aztertu baitute genero ikuspegitik. Usaian «ikusi ezinak diren» emazte iheslarien egoeraz aritu dira. Nola etxeko lanetan aurkitzen diren proportzio handian. Esplotatuak. LGTBk jasaten dituzten diskriminazioak ere argira ekarri dituzte. Non, eta normalki iheslarien babesguneak diren lekuetan. Horri nola erantzun gogoetatu dute. Elkartasun sareetan «zuritasunetik» sor daitezkeen kalteak nola saihestu aipatu dute. Nola egin ez mintzatzeko iheslariez, baizik eta iheslariekin.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Arturo Campion euskaltegiaren 50. urteurrenaren besta, atzo. ©IÑIGO URIZ / FOKU

Beste hamaika istorio bizitzear

Yasmine Khris

IKA Iruñeko Arturo Campion euskaltegiaren 50. urteurrena kari, egun osoko besta egin dute. «Etxea» aurkitu zutela gogoratzera joan dira ikasle berriak, ikasle ohiak eta irakasleak.
 ©MONIKA DEL VALLE / FOKU

«Albokari izaera mitologikoa eman zaio: benetan, jotzea ez da hain gaitza»

Amaia Igartua Aristondo

Kantuak entzuten, eta partitura irakurtezinek lagunduta: hala ikasi du alboka jotzen Koteronek. Autodidakta izan da: tresnaren inguruan ezer gutxi egon denez, sortuz joan behar izan du, beste batzuekin batera. Filosofia irakaslea da ogibidez.
Paul Verhoeven zinemagilearen <em>Benedetta</em> filma (2021) euskarazko azpidatziekin ikus daiteke Movistar Plusen. ©BERRIA

Movistar Plusen 148 film azpidatzi zituzten euskaraz 2021. urtean

Urtzi Urkizu

Iaz, 31 telesailetako 279 atalen euskarazko azpidatziak jarri zituen plataformak. Konpainiak 2014an hasi zuen akordioa Jaurlaritzarekin

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...