Noiz sortua: 2020-04-08 00:30:00

Lorpen bat baino gehiago

Elbarritasunen bat duten kirolarientzat balio erantsi bat du kirola egiteak. Egun hauetan etxean egon beharra tokatu den arren, horretan segitzen dute tinko.
Alex Prior eskrimalaria etxean entrenatzen.
Alex Prior eskrimalaria etxean entrenatzen. ALEX PRIOR Tamaina handiagoan ikusi

Mikel Orbañanos Iribar -

2020ko apirilak 8

Itxialdia ez da samurra kirolarientzat. Kolpe batez aldatu zaie egunerokoa, eta, ahal duten moduan, sasoia ez galtzeko ahaleginean dabiltza, nor bere kasa eta etxean dituzten baliabideen arabera. Egoera horretan daude kirol egokitua praktikatzen dutenak ere. «Goi mailan aritzen direnak ondo ari dira lanean, etxean entrenatzeko heldutasuna eta esperientzia baitute», azaldu du Alicia Figueroak, Gipuzkoako Kirol Egokituaren zuzendari teknikoak (Santa Cruz Tenerifekoa, Espainia, 1971). Hain zuzen, uste du norberaren abileziaren eta jarreraren arabera dagoela ezohiko egoera honetara egokitzea.

Datorren urtera arte atzeratu dira Tokioko Paralinpiar Jokoak, eta horiexek dauzkate denek begiz jota. Momentuz, Iñigo Llopis igerilariak du Jokoetarako postua ziurtatua. Besteek, berriz, lanean gogor dihardute sailkatze probak iristen direnerako sasoiko egoteko. Besteak beste, egoera horretan dago Alex Prior eskrimalaria (Donostia, 1991). Gurpil aulkian lehiatzen da, hankan duen malformazioa dela eta. Orain dela 11 urtetik dabil eskriman, eta haren garaipen zerrenda gizenduz doa urtez urte. 2013an, 23 urtez azpiko munduko txapelduna izan zen, eta Espainiako Txapelketan zortzi aldiz lortu du garaipena. Iaz, gainera, hiru modalitatetan sablea, ezpata eta floretea nagusitu zen lehen eskrimalaria izan zen.

Garaipen horiek hauspoa eman diote Priorri bere ametsa betetzeko: Tokioko Paralinpiar Jokoetan lehiatzea. Ametsak, ordea, zain egon behar du gutxienez beste urtebetez. Jokoetarako sailkatzeko azken proba ekainean jokatzekoa zen, Europako Txapelketa, baina bertan behera geratu da koronabirusaren erruz. Kolpe gogorra izan da Donostiako eskrimalariarentzat. «Sasoi onean nengoen, eta ondo ari nintzen entrenatzen». Azken lau urteetan Jokoetara begira prestatzen ibili da buru-belarri. Psikologikoki eragin diola ez du ukatu. «Amorruz nago, baina egoerara moldatu eta aurrera jarraitu beharra dut». Ilusiorik eta adorerik, behinik behin, ez zaio falta.

Etxean egon beharrak arlo teknikoa lantzea eragotzi dio Priorri: «Ez dut aurkaririk». Gainera, etxea ez da eskriman aritzeko lekurik egokiena. Baina imajinazioari astindu bat eman, eta nola edo hala moldatzen ari da; aulki bat sukaldeko ertz batean jartzen du, aurkaria irudikatzeko. «Neroni ez mugi tzeko, berriz, leihoko heldulekuan lotuta dagoen soka bati heltzen diot, eta aurrean dudan aulkian kuxin bat jartzen dut sablearekin jarduteko». Gutxienez, sentsazioak ez galtzen laguntzen dio horrek. «Ez da egoerarik onena, baina ohitu beharra daukagu».

Elbarritasunen bat duten kirolarien inguruan azken urteetan egin den lana baliagarria izaten ari da. «Lan asko egin da baliabideak izan ditzaten, eta entrenamendu pertsonalizatuak. Psikologiaren ikuspegitik ere lanketa garrantzitsua egin da», azaldu du Figueroak.

Besteak beste, Nazioarteko Paralinpiar Batzordearen, Bat Basque Team-en eta Kirolgiren laguntza jasotzen ari dira zenbait kirolari. Materiala uzten diete etxean ariketak egiteko. Gainera, Figueroak adierazi du teknologia berriari esker harreman sare bat osatu eta kirolarekin une oro kontaktuan daudela euren beharrak asetzeko. Egoera honetan funtsezkoa da sare hori, kirolarien jarraipena egiteko.

Ez da lehen aldia

Zailtasunak zailtasun, konfinamendu egoera gainditzea lagungarri izan dakieke kirolariei etorkizunean, Figueroaren ustez. Urrunago ere joan da: «Egoera oso zailetatik aurrera ateratzea lortu duten kirolari asko daude; bizitza zaila eta gogorra eraman dutenak». Hain justu, kirolari batzuk, osasun arazoengatik edota etxeko irisgarritasun faltarengatik, kalera irten ezinik egon izan dira denbora luzez. «Haiek, herritar askok ez bezala, iraganean pairatu dute azken asteetan bizitzen ari garena. Egoera hau gainditzeko gaitasuna dute; prest daude horretarako».

Ariketa fisikoa edota kirola bere horretan egitea edonorentzat osasuntsua bada, zer esanik ez elbarritasunen bat dutenentzat. Figueroaren arabera, «aurrez diskriminatuak sentitu direnek»elkarren arteko harremanak izateko bidetzat hartzen dute kasu askotan kirola. Horrez gain, euren autonomia garatzeko eta norberarenganako konfiantza lantzeko aukera izaten dute. «Lorpen ikaragarria da guretzat haiek elkarren artean modu informalean eta ludikoan harremanak izatea». Gipuzkoa Kirol Egokituen Federazioak lan horretan dihardu: egun, «utopikoa» den benetako gizarte inklusibo bat sortzen. «Kirola elementu perfektua da integrazio hori gauzatzen errazteko».

Hala, elbarritasunen bat duten pertsonak kirolera erakartzeko eta bideratzeko lanetan dihardu duela hamazazpi urtetik hona federazioak, oinarritik. Izan ere, Gipuzkoako herri eta eskualde askotan, elkarlanean ari da aldundiarekin, udalekin eta hainbat enpresekin, taldeak dituzten haur eta nerabeek kirola egin dezaten. Dena ez baita goi mailako kirola, eta hortik kanpo ere asko dira beharrak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 2an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan hamar lagun hil dira COVID-19 gaitzaren eraginez. Zortzi positibo atzeman dituzte PCR probekin, eta bost gaixo ospitaleratu dituzte. Euskal Herrian 29.491 gaixok eman dute positibo guztira, koronabirusa atzemateko probaren bat eginda. Horietatik 2.078 hil dira. Grafikoak, albiste barruan.

Aritxulegiko gaina, Nafarroa eta Gipuzkoa artean. ©

Nafarroako Gobernuak «jarrera zuhurra» du lurraldeen arteko joan-etorriekin

Berria

«Autonomia erkidego guztiek dute lurralde mugakideen artean mugitzeko helburu bera, baina litekeena da erritmoa berbera ez izatea», esan du Javier Remirez gobernuko bozeramaileak. Salvador Illa Espainiako Osasun ministroak atzo esan zuen hirugarren fasea bukatu arte ezingo dela autonomia erkidego batetik bestera bidaiatu. 

Heriotza kopurua asteka, Araban, Bizkaian eta Gipuzkoan. ©INE

Nabarmen goratu da izurriak eragindako heriotzen kurba

Edu Lartzanguren

Espainiako Estatistika Institutuak grafiko bat argitaratu du, erakusteko izurriak nola eragin duen heriotza tasan.

Pedro Sanchez Espainiako presidentea, gaurko lehen agerraldian, Kongresuan. ©J. J. Guillen / EFE

Espainiako Kongresuak larrialdi egoeraren seigarren luzapena onartuko du gaur

Paulo Ostolaza

Ekainaren 21 arte luzatuko dute; printzipioz, azken aldiz. Sanchezek iragarri duenez, «hirugarren fasean sartzen diren autonomia erkidegoetan hango presidenteak erabakiko du nolakoa izango den fase hori».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna