UHINETATIK TIRAKA

Dr. Jeyll eta Mr. Hyde

Xabier Lasa -

2019ko urriak 6
Alonsoren bitasuna. Bikote ohiari tratu txar fisiko eta psikologikoak eragiteagatik Miguel Alonso Belza Donostiako abokatu ospetsuari zazpi urteko kartzela ezarri diotela eta, atzera begira jarri gara Herri Irratiko entzule izan ginen asko, ziur. Gogora etorri zaizkigu Mariano Ferreren saioaren osteko tertulietan abokatuak eta Mikel Aramendik eskaini ohi zizkiguten xextra dialektiko ezin ilustragarriagoak, euskal auzia, biolentzia, justizia... gaitzat hartuta. Espainiako justiziak gaizkile konpultsibotzat jo duen gizona estatu aparatu guztien bondadeak —justiziarenak, batik bat— defendatzeagatik eta euskal gizarteko sektore batek eragiten zuen biolentzia gaitzesteagatik nabarmentzen zitzaigun tertulian.

Iranchutik Machora. Marta Macho zientzia dibulgatzailea jarri dute Arantxa Urretabizkaiarekin batera irailaz geroztik A tres bandas tartean, MQP asteburuetako magazinean (larunbatetan, 11:10ean). Aktualitateak isurtzen duen matxismoa —makroa eta mikroa— detektatzeko betaurreko moreak janzten dituen tarte galdu ezinekoaz ari gara, Almudena Cacho gai jartzaile eta Goizalde Landabaso entzuleen iritzien laburbiltzaile dituena. Urretabizkaiak Maria Unanue izan zuen bikote hastapenean, Irantzu Varela azken urteetan. Gizartean indartsuki eta argumentuz zamatuta adierazten ari den feminismo berrituaren ordezkari perfektuak ziren Unanue eta Varela. Bazirudien haien aktibismoa eta Urretabizkaiaren eskarmentuaren ahotsa konbinatu nahi izan zituztela. Oraingoan, moldez eta edukiz pareko diskurtsoak dituzten bi ahotsen aldeko apustua egin dute.

Belarri tiradizoa. Txorierri egunero hirutan zeharkatzen duen kamioilari-entzule baten mezu gordina irakurri zuen Maider Martinek ostegunean Boulevard saioko albistegian. Gehienetan errepideei buruzko informazio okerra eta denboraz kanpokoa helarazten dutela leporatu zien kazetariei. Hari erantzunez, Dani Alvarezek adierazi zuen derrigortuta daudela Ertzaintzaren eta Foruzaingoaren informazio ofiziala ematera, eta ezin dutela hori kontrastatu. Barkamenak eskatu zituen, egia bada informazio okerrarena. Kamioilariak dioena egiazkoa balitz, badute zer hobetua instantzia ofizialek eta EITBk. Ez baita oso ulergarria euren arteko komunikazio baldar hori, XX. mendekoa dirudiena, teknologia hipermodernoen aroan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna