Meategietan barrena
Arditurri Eguna egingo dute gaur, Oiartzunen zazpigarrenez (Gipuzkoa). Arditurri meatzaritza gunea ezagutzeko hainbat ekintza antolatu dituzte; goizean hasi eta eguerdira arte izango dira. Meategiak bisitatzeko aukera izango dute bertara biltzen direnek. Doan izango dira sarrerak oinarrizko bisita eta bisita sakona egiteko, 10:00etatik 14:00etara. Ordu tarte horretan Arditurriko meatzaritzaren inguruko argazki erakusketa izango da. Abaraxka ludotekak haurrentzako tailer eta jolas dinamizatuak antolatu ditu, 10:30etik 13:00etara. Gainera, haur-proba erronka antolatu dute gaur, Oiartzunen. Parte hartzaileek txanoak eta kamisetak eskuratzeko aukera izango dute. Irabazleek Arritxulo aterpetxean familiarekin asteburua igarotzeko saria lortuko dute. Proba 10:30etik 12:30era egingo dute.
Meategiak ezagutarazteko
Igeldoko Arrano Etxean sendatutako hainbat hegazti askatuko dituzte 12:00etan. Meategietatik abiatuta, oinez bost minutu inguru egin ostean, hegaztiak askatzeko gune egoki batera iritsiko dira bisitariak. Igeldoko Arrano Etxean gaixorik edo zauriturik dauden hegaztiak sendatzen dituzte. Zentroaren helburua da gaixo dauden animaliei, berriz ere, ingurune naturalean bizitzeko aukera ematea.
Giza proba erakustaldia 13:00etan izango da: Emarri taldekoek harri-tiratzea egingo dute. Jateko eta edateko aukera izango da festa egun honetan, 10:00etatik 14:00etara. Ekitaldiaren helburua da meategien eta Aiako Harria parkearen ingurunea ezagutaraztea.
Arditurri Eguna
Gaur, 10:00etatik aurrera,Oiartzunen (Gipuzkoa).
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
