Noiz sortua: 2019-12-15 00:30:00

ATZEKOZ AURRERA

«Hurrengoa belodromoan»

Egunean Behin aplikazioaren lehen finala jokatu dute 102 lagunek Azpeitiko Sanagustin kulturgunean. Eneko Agirrezabal segurarrak irabazi du txapelketa arrakastatsua.
GORKA RUBIO / @FOKU Tamaina handiagoan ikusi

Jakes Goikoetxea -

2019ko abenduak 15
Ikusleen eta parte hartzaileen txaloak; finalistak, irabazlea eta babesleak oholtzaren gainean; eta Kike Amonarriz aurkezleak, erdi brometan, erdi serio, erronka jo die antolatzaileei, Eibarko (Gipuzkoa) Codesyntax enpresako arduradunei: «Hurrengoa belodromoan». Donostiako belodromoaz ari da, milaka lagun har ditzakeen kirol azpiegituraz.

102 parte hartzaileko finala ondo atera baita Azpeitiko Sanagustin kulturgunean (Gipuzkoa). Egunean Behin aplikazioko azken hilabeteetako jokalaririk onenak bildu dituzte, final batean. Ez dira edozein. Astean 50.000 pertsonak baino gehiagok jokatu dute partidaren bat sakelakoetarako euskarazko aplikazioan. Berez joko indibiduala dena, norberak nahi duenean egitekoa, saio kolektibo bihurtu dute.

Parte hartzaile adina ikusle elkartu dira. Finalistak, izena eta zenbaki bat paparrean, mahai txikietan; ikusleak, horietako asko parte hartzaileen lagun eta senideak, mahaien atzean.

Jokalarien artean bi tribu mota daudela esan du Kike Amonarrizek: «segurolak», erantzuna seguru jakin arte sakatzen ez dutenak, eta «behatz arinak».

Txalo artean hasi da finala. Txaloak finalistei eta txaloak Codesyntaxekoei, Amonarrizek nabarmendu duen moduan, «hau ez baita normala, lorpen hau gutxitan izan baita Euskal Herrian euskarazko produktu batekin». Asteko 50.000 parte hartzaileez ari da.

Finalistek lau partida jokatu dituzte beren sakelakoetan. Ohi bezala, hamar galdera eta bakoitzean hiru erantzun aukeran, ahalik eta zuzenen eta azkarren erantzuteko. Ikusleek pantaila erraldoi batean ikusi dituzte galderak, banan-banan, Amonarrizek azalduta. Galderak azaldu ahala, ikusleen arteko erantzunak, ahapeka.

Finala ez da ondo hasi. Bost puntu lortu dituzte batez beste, eta ia minutu bat behar izan dute erantzuteko. «Nik uste nuen gaur onenak etorri direla», kargu hartu die Amonarrizek.

C bitamina eta krokodiloak

Partida bakoitzaren ondoren, sailkapena. Eta mikrofonoa sailkapeneko buruentzat, Amonarrizen eztenak jasotzeko. Bildutakoek ikasi dute mahatsak limoiak baino C bitamina gehiago duela, euskal izena daukan historiaurreko krokodilo mota bat dagoela (Musturzabalsuchus)...

Lau partidaren ostean, hamar lagun sailkatu dira oholtza gaineko azken partidara. Eneko Agirrezabal segurarrak irabazi du. Azken saioaren aurretik ere bera izan da onena. «Zortea izan da asko» esanez arindu nahi izan du emaitza. Erakutsi du Egunean Behinen korrika egiten bezain ondo moldatzen dela —2.14.36ko marka egin berri du Valentziako maratoian, 1.02.18koa Behobia-Donostian—.

Irailean hasi zen jokatzen, lehengusu batek gomendatuta. «Lehen astean hirugarren bukatu nuen, baina hurrengo asteak ez ziren hain onak izan». Euskal kulturari buruzko galderak kostatzen zaizkio gehien; geografiakoetan, berriz, ondo moldatzen da. Egunean Behineko jokalari askok bezala, hainbat taldetan parte hartzen du: herriko batean, unibertsitateko lagunenean, kuadrillakoan eta lanekoan.

Leire Alberdi eibartarra ere sartu da hamar onenen finalean. Finalean ez du nahi bezain emaitza ona lortu, ordea: «Oso urduri nengoen, eta ez dut denborarik hartu galderak behar bezala irakurtzeko. Askotan lehen erantzuna zapaldu dut, bat zapaltzearren, eta emaitza halakoa izan da; hamarretik lau asmatu ditut».

Egunean Behinen erakargarritasuna nabarmendu du, arrakastak zerbait esan nahi duela: «Euskararekin ondo pasatzeko aukerak ere badauzkagu».

Albiste gehiago

Martxoaren 30ean eguneratua, 14:00etan. ©BERRIA

Koronabirusaren azken datuak

Berria

Euskal Herrian 8.225 gaixok eman dute positibo koronabirusaren proba eginda, administrazioen arabera. 400 hil dira. COVID-19 gaitza izandako 1.807 pertsonari eman diete alta. Grafikoak, albiste barruan.

Iruñeko kaleak, hutsik. ©Iñigo Uriz / Foku

Jaurlaritzak agiri bat prestatu du lanera joan behar dutenentzat

Berria

Espainiako Gobernuak atzo onartutako dekretua indarrean da, eta funtsezkoak ez diren jardueretan aritzen diren langileek etxean geratu beharko dute gaurtik aurrera. Urkullu ez dator bat neurri horrekin, ezta patronala ere. Txibitek, Europara begira, Sanchez babestu du, eta onartu du egoera «oso konplexua» dela, baina hobe litzatekeela jarduera ekonomikoa ez geratzea eta erabaki hori malgutzea.

Ospitale bateko larrialdietako sarrera ©Jon Urbe / Foku

Koronabirusa zuten 400 pertsona hil dira Euskal Herrian, eta 8.225 pertsona kutsatu

Irati Urdalleta Lete

50 pertsona hil dira atzotik, eta 452 pertsona gehiagori atzeman diete birusa.

Maria Txibite, bideokonferentzia batean, iragan astean ©Nafarroako Gobernua

Txibitek ez zuen nahi dena gelditzea

Joxerra Senar

Autonomia erkidegoek funtsezko jarduerak zer diren zehazteko aukera eskatu diote Pedro Sanchezi, eta dekretua ezartzeko epea malgutasunez ezartzeko aukera.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna