UHINETATIK TIRAKA

Hiru hankakoa

Xabier Lasa -

2019ko apirilak 21
Iragarpena. ETB2, RE eta Radio Vitorian lekua egingo die euskaraz egindako adierazpenei. Modu naturalean. Halaxe ziurtatu zuen behintzat Maite Iturbe EITBko zuzendari nagusiak, Gasteizko legebiltzarrean martxoan egin zuen agerraldian. Ildo estrategikoen planean sartu dute asmo hori, eta beraz, laster hasi beharko genuke igartzen nola gauzatzen den. Hasteko eta behin, ikusteko dago segundo batzuen iraupeneko adierazpenetara mugatuko ote den, ala gehiagorako bidea emango ote duen.

REren kasuan. Hor eragiten du ikusminik eta morborik handiena Iturberen iragarpenak. Ez aspalditxoan euskarari ateak irekitzen ari diren zenbait esatari jakinekin, baizik eta guztiok buruan dauzkagun beste oihartzun handiko horiekin... Ea konpromisorik hartuko ote duten, harraraziko ote dieten, eta hartzekotan, norainokoa izango ote den... Iruzurra bailitzateke esatari batzuen esku uztea euskararen ardura, eta bien bitartean besteak «liberatzea», kasta pribilegiatukoak balira bezala.

Hiru hanka. Benetakoa bada euskarazko adierazpenak gaztelaniazko komunikabide publikoetan eta —ez publikoetan— natural txertatzeko konpromisoa, alde anitzek eduki beharko dute garbi zer dagokien. Zuzendaritzei, bere meneko kazetariei irizpideak ondo markatzea, eta betearaztea. Kazetariei, elkarrizketara gonbidatu behar duten horri euskara erabiltzeko aukera erreala planteatzea, eta horretara animatzeko estrategiak menperatzea. Euskal hiztunek osatzen dugu hirugarren hanka, ezinbestekoa. Horretan, kanpaina publiko baten edo delako ziztada suspertzaile baten premia igartzen da euskal hiztunon artean, indarrean daukagun mentalitate atabikoa iraultzeko, errespetuaren kontzepzio okerrarekin zerikusia duena.

Geure esku. Asko daukagu egiteko, eta horren ispilu izan daiteke Jose Maria Arizmendiarrietaren gainean ETB2n herenegun ikusi genuen El hombre cooperativo dokumentala. Iaz estreinatu zen ordu eta erdiko ekoizpenean 40 testigantza emaile agertzen zaizkigu, Debagoiena aldekoak gehienak eta euskal hiztunak zalantzarik gabe. Bada, horietatik bakarra da, Joxe Azurmendi, euskaraz mintzatzen dena, azpitituluekin. «Nahiago dut euskaraz egin, ez bazaizue axola; jar ditzakezue azpitituluak» esateko lizentzia soilik pentsalari eta euskaltzale konprometitu ospedunen esku dagoela uste badugu, jai daukagu.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna