Txirrindularitza. Euskal Herriko Itzulia: azken etaparen kronika

Bakarrik eta libre doa

Erlojupeko saio bikaina eginda, Alberto Contadorrek hirugarrenez irabazi du itzulia; espero bezala, Tony Martin izan da nagusi etapan
Alberto Contador (Tinkoff-Saxo), ahalegin betean, helmugara iristear, atzo, Markina-Xemeinen (Bizkaia).
Alberto Contador (Tinkoff-Saxo), ahalegin betean, helmugara iristear, atzo, Markina-Xemeinen (Bizkaia). MIGUEL TOÑA / EFE

Unai Zubeldia -

2014ko apirilak 13

«Bakarrik eta libre badoa...». Imanol Urbietak kantari jarri zuen Euskal Herri guztia. «...Bakarrik eta libre gaztea. Poltsikoan eskuak, oinak arrastaka. Luzea da bidea». Gazteena izanda dago Alberto Contador (Tinkoff-Saxo), baina bakarrik doa. Berriz ere bakarrik doa. Iragan ez urrunean, ibili da oinak arrastaka. Baina bi eskuak poltsikoan sartuta irabazi du, hirugarrenez, Euskal Herriko Itzulia. Aspaldiko alderik handienarekin. «...Luzea da bidea». Frantziako Tourra daukalako begiz jota. Gaintzan erasoa jo eta Markina-Xemeinen bakarlanean erakustaldia emanda, Contadorrek dotore biribildu du denboraldi hasiera. Aurkariei batere aukerarik eman gabe, abisua bidali die Tourrerako faboritoei. Inoiz joan bazen, itzuli da Contadorrik onena.

Eta sailkapen nagusia aztertu besterik ez dago horretaz jabetzeko. 49 segundo Michal Kwiatkowskiri (Omega Pharma), 1.04 Jean-Christophe Peraudi (Ag2r), eta 1.07 Simon Spilak (Katuxa) eta Alejandro Valverderi (Movistar). Hankapean ibili ditu aurkari guztiak, eta hankapean lasterketa bera. Talde sendo-sendoarekin, Gaintzan eta Arraten estututa, eta herenegun Markina-Xemeinen eutsita, barrua askatu du espainiarrak. Bakarrik eta libre dabil berriz ere Tinkoff-Saxoko taldeburua. Eta Frantziako Tourra dauka, jada, parez pare. Gaztetu egin da urtebetean.

Etapako lehia eta sailkapen nagusikoa. Bi errealitate elkartu ziren atzo Markina-Xemeinen. Eta etapakoak munduko txapelduna lanean hastearekin batera amaitu ziren. Tony Martinek (Omega Pharma) ez zuen igo Gontzagaigana. Ez da posible. Beste ibilbideren bat egingo zuen alemaniarrak lehen zatian. Ezinezkoa da hain tarte txikian hainbesteko aldeak ateratzea. Etzanda egoteko daukan gailurik kutunenari 58 hortzeko platera jarrita, egungo erlojupeko munduko txapeldunak dantzan jarri zituen Markina-Xemein inguruan dauden radar guztiak. Ondo bidean, isunik ez zaio iritsiko Aulesti aldetik, baina merezi zituen atzo batzu-batzuk.

Tarteko erreferentzian astindu handia eman ziolako ordura arteko denborarik onenari: Ion Izagirrerenari (Movistar). 20.01. Horixe zen ormaiztegiarraren denbora. Oso ona. Eta 19.21 egin zuen alemaniarrak. Ondoren iritsi ziren gainerako erreferentziak, eta inork ezin menderatu alemaniarra. Contador bera gerturatu zitzaion gehien, zazpi segundora. Baina ezin hark ere. Egia da Tony Martinek indarrak ez zituela neurtu oso ondo, bigarren zatian askok ondu zutelako haren denbora. Urrutira joan gabe, segundo bakarra atera zion Ion Izagirreri azken hamabi kilometroetan. Baina 38.33 minutuko denbora eginda, aise ondu zuen Tom Dumoulinen denbora. Etapa garaipenak Urdazubin eta Markina-Xemeinen, eta taldearen alde lan dotorea Gasteiz aldean, Zaldiaranen gora, eta Arrateko azken igoerara bidean. Itzuli bikaina egin du alemaniarrak, eta gorputz gihartsua puntu-puntuan jartzen ari dela berretsi du.

Valverde, oso makal

Eta, egiari zor, lehen erreferentzia horretan bertan amaitu zen sailkapen nagusirako borroka ere. Contadorrek errespetu handia zion Alejandro Valverderi (Movistar), baina Movistarrekoak liderrarekiko 40 segundo galdu zituen lehen erreferentzia horretan. Akabo. Indarrean zihoan Kwiatkowski, baina Contadorren atzetik poloniarra ere, sei segundora. Markina-Xemeinen gozatuz itxi zuen liderrak Gaintzan gozatuz hasitako zirkulua. Contador, Kwiatkowski eta... Podiumeko hirugarren koska geratzen zen zehazteko, eta Jean-Christophe Peraudek (Ag2r) baliatu zuen Valverderen hutsa. Gehiegi agertu gabe ere, itzuli ona egin du frantziarrak, eta hirugarren postu ona lortu du beretzat aproposegia ere ez zen ibilbidearekin.

Aipagarria izan zen Spilak-en lana ere, etapan eta sailkapen nagusian laugarren postua lortuta. Eta pena Mikel Landak (Astana) erlojupekoan lehen hamarren artean zeukan postua galdu izana. 14. postuan amaitu du arabarrak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

PCR probak, Gurutzetako ospitalean. ©Luis Jauregialtzo, FOKU

Gutxitu egin dira egun bakarrean atzemandako kasuak

Uxue Rey Gorraiz

Beste 519 positibo detektatu dituzte Bizkaian, Gipuzkoan eta Araban. 36 gaixo ospitaleratu dituzte azken egunean, bezperan baino 13 gutxiago.

Bainako Oihana ikastolako eta Estitxu Robles kolegioko ikasleak ©Gillaume Fauveau

Ziburuko eskolan agerraldi bat atzeman dute

Oihana Teyseyre Koskarat

Eskualdeko Osasun Agentziak agerralditzat jo du Aristide Briand eskolako kasuen agertzea. Zazpi haur kutsatu dira, gutxienez.

Mekanikari bat lanean, iragan apirileko irudi batean. ©Jon Urbe / FOKU

Ekonomia %19,5 jaitsi da bigarren hiruhilekoan, aurreikusi baino pixka bat gutxiago

Imanol Magro Eizmendi

Langabezia datuetan ere arindu egin dira uztailean eginiko aurreikuspenak: %17,2 izan zen tasa

 ©Raul Bogajo / Foku

Ziurtasunik ez ikasle pisuetan

Maria Ortega Zubiate

Ikasle pisuen egoerari buruzko kanpaina bat jarri du abian Euskadiko Gazteriaren Kontseiluak. Ziurgabetasunaren aurrean, klausulak eta halakoak jartzen hasi dira.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna